1Do nakabaw danaw no soli ni Āri Ekserses, nanakem naw pinarin naw ni Basti kan iyaw nakapangikeddeng naw so maikontra dya. 2Sinpangan na, inbahey dan mamagbagaw a masinged di āri a kon da, “Āngo ta dyi ka maychichwas siras mapipintas saya babbalāsang a birhin a para dyimo mo āri? 3Mamidi ka dyirad opisyalis mo saw do kāda probinsya do dya pagāryan a mangyangay siras tabo mapipintas saw a babbalāsang a birhin do pagyanan dayan mababakes do palasyowaya do dya a Sosa a sintro no pagāryan. On, ipaaywan ta sa di Hegay a iyaw yonokwaw ni āri a mangay-aywan siras mababakes mo saw tan papintasen na sa. 4Iyanchiw balāsangaw a kasdayan kapangdidiw mo, hapen mo a rēyna a tādi ni Basti.”

Chinadaw ni āri iyaw nya a binata da dya. Dawa, nawriw inonotan na.

5Do dawri do Sosa, myan asa Jodyo a yapo do trībo ni Benhamin a mayngaran so Mordokeo a pōtot ni Hair a pōtot ni Semay a pōtot ni Kis. 6No pinarin Nebokadnessar a āri do Babilonya, ki inakaw na saw tawotawo no Joda a nabahod.* Si Kis, ki asa dyira a naakaw yapo do Jerosalem kontodo si Jekonya a āri do Joda. 7Si Mordokeo, ki myan kasinsin na a mabakes a mayngaran so Ester. As no ngaran na do Hebreo, ki Hadassah. Pinarakoh ni Mordokeo si Ester maynamot ta nadiman dana saw inyapwan na, kan inbidang narana anak na. Si Ester, ki makadadaw a balāsang kan kakoskostwanaw inaynawan na.

8Do nakaipakatoneng danaw no inkeddengaw ni Āri Ekserses, āro a babbalāsang naiyangay do Sosa kan naipaaywan sa di Hegay. Aran si Ester, ki naiyangay do palasyowaw ni āri, kan naitalek di Hegay a mangay-aywan so pagyanan daw no mababakes. 9Nahwahok ni Ester si Hegay. Dawa, chinadaw na kan nyeng na inrogi a papintasen, kan tinorohan na pa so machitatārek a mākan. Myan saw tinongdo ni Hegay a papito a mababakes a yapo do palasyo a magsīrbi di Ester, as kan pinayadis nas Ester kan magsirsīrbi saw dya do kagaganayanaw a kwarto.

10Inlīmed ni Ester a iya, ki asa a Jodyo maynamot ta nawriw inbilin dya ni Mordokeo. 11Kararaw a homnabahabas si Mordokeo do atataw no pagyanan dan mababakes saw tan matonngan na an maypāngo dana si Ester kan an āngo danaw mapariparin dya.

12Sakbay no naibatang a kaiyangay no kāda balāsang do yanan ni Āri Ekserses, machita patayokahen naw asa poho kan dadwa a kabohan a kapagpapintas a naikeddeng para dyirad mababakes. On, kāda balāsang, machita naw anem a kabohan a maptoptosan so lana no mirra kan anem a kabohan iyaw bangbanglo kan pangpapintas saw. 13As no kangay no balāsang a yapo do pagyanan daw no mababakes a komwan do palasyo a yanan ni āri, mapalobōsan kāda asa a magpapintas sigon do chakey na. 14Mangay daw an mahep, as an mabekas dana maiyangay do matarekaw a pagyanan dan mababakes do aywan ni Saasgas a iyaw yonokwaw ni āri a mangay-aywan siras babbaket saw. Maybidi paba di āri malaksid an chadaw ni āri kan ipatawag naw mismwaw a ngaran na.

15Si Ester, ki pōtot a mabakes ni Abihail a marāan ni Mordokeo, as pinarakoh ni Mordokeo si Ester a akmay anak na. Do karapit danaw no ka si Ester maiyangay di āri, nawri lang pinaylaylay naw binahey naw ni Hegay a iyaw yonoko a mangay-aywan so mababakes saw. As tābo nakaboya dya, ki inanyib da. 16Do dāwri, naiyangay si Ester di Āri Ekserses do palasyo, do chapapitwaw a katawen no nakapagāri na, do chaasa poho naw a kabohan a mapangaranan so Tebet.

17Si āri, ki nakadidiw di Ester so kapateg kan kadaw a mangamangay pa kan kadwan saw a babbalāsang. Dawa, kinoronaan na si Ester, kan pinayparin narana a rēyna a tādi ni Basti. 18Sinpangan na, namarin si āri so rakoh a pista a pammadāyaw na di Ester, as nakaāwis na siras tabo magtotoray naw kan tabo opisyalis na do pagtorayan na. Inpakatoneng na a iyaw nawri, ki araw no kapaynaynahah do tabo probprobinsya, as kan siboboslon si āri a nangibōnong dyira so rigrigālo a yapo kadādam na.

19Do kapaychichipeh daranaw a minirwa no babbalāsang saw a birhin, nadotokan narana ni āri si Mordokeo a asa opisyal, kan nachidisna dyirad kadwan saw a opisyalis a myan do rowanganaw no palasyo ni āri. 20Ki si Ester, nāw na intayotayo ka-Jodyo na a akmas inbilin naw dya ni Mordokeo. As nāw na inanohdan si Mordokeo a akmas nakapanganohed naw dya do kadēkey na paw.

21Kadama naw ni Mordokeo a maydiydisna do rowanganaw no palasyo, myan saw dadwa a yonoko ni āri a maggwardya do pantawaw no kwarto ni āri a sa Bigtana kan Teres. Sira dadwa, ki nakasoli sa di āri kan inpangta da a dimanen. 22Ki natonngan ni Mordokeo pangta daw kan inbahey na di Rēyna Ester. Otro si Ester, inbahey na di āri a si Mordokeo, ki nadngey na mismo pangta da dya. 23Do nakaosisa naw no nya naipadāmag kan natonngan a oyod, binītay da saw dadwaw. Naitolas nya naparin do salapen āri do librowaw no pakasaritāan no pagāryan.