No Kinasīrib
1No maganay so pakasaritāan, ki maganaganay kan mabalor a bangbanglo.
No araw a kadiman, ki maganaganay kan araw a kaiyanak.
2Maganaganay mangay do bahay dan magdongdong-aw
kan kangay do bahay dan pagragragsakan.
Ta no kadiman, ki dawri a tabo pachipandan.
Dawa, tabo sibibyay, ki machita a ipapōso da.
3No kaliday, ki maganaganay kan kamimyeng.
Ta no maliday a rōpa, ki mangbāliw so myan do pōso.
4No kapangtokto no masīrib a tawo, ki iktokto naw kadiman.
Ki no kapangtokto no abos arang, ki kapagragragsak.
5Maganaganay mangadngey so kapaydabdab no masīrib
kan mangadngey so kanta a pagdāyaw dan abos arang.
6Akmas kapaytitiriktik no manōlok a mohamoha a masososohan,
komwan kamimyeng dan abos arang.
Aran nya, ki abos sinpaspangan.
7No kaidadanes no masīrib, ki payparinen na a abos arang.
As no pasoksok, ki dyīdohen naw aktokto.
8Maganaganay tawsan no aran āngo kan iyaw rogi naw.
As maganaganay kaānos kan iyaw kapangas.
9Malisto kaba somoli.
Ta no kasoli, ki idolin no abos arang do irahem na.
10Batahen mwaba a, “Āngo ta maganaganay kaychowa kan changori?’’
Mainsīriban abaw nya kapanahenahes.
11Kinasīrib a akmas tāwid, ki maganay,
kan kaganayan dyirad sibibyay pa.
12Akmay kwarta a pagkamītan,
komwan kinasīrib.
Ki no kaganayan no kinasīrib, ki nya:
mapahay naw byay no mangig-igpet sya.
13Iktokto mo pinarin no Dyos:
Sino makatalineng so pinarin na a dyido?
14Do araw a maganay no kayayan, ki masoyot ka.
Ki do araw a kariribok no kayayan, mangtokto ka:
Si Āpo Dyos namarin sira dadwa
tan dyi mo a matonngan maynamot do masakbayan.
15Do abwayas sinpaspangan a byay ko, ki naboya ko saw nya dadwa:
No malinteg a tawo, ki madiman do kinalinteg na.
As no marahet a tawo, ki manaro byay na do karahet na.
16Ibidang mwabaw inawan mo a taywara malinteg.
As batahen mwaba a rakoh kasīrib mo.
Āngo ta rārayawen mo inawan mo?
17Inolay mwabaw inawan mo a manghanyib a mamarin so marahet.
As mayparin kaba a abos arang.
Āngo ta madiman ka masāpa?
18Maganay a kamten mo asaya a ballāag,
as kan aryan mwabaw chadadwa na.
Ta no tawo a manganyib so Dyos, annadan na tabo.
19No kinasīrib, ki payparinen naw masīrib a tawo a mabilbīleg pa
kan asa poho a magtotoray do syodad.
20Syirto abaw malinteg a tawo do tanaya
a mamarin so kosto kan dya polos a maygatos.
21Ikāso mwabaw kāda chirin a ibahey no tawo,
ta āngwan madngey mo tobotoboyen mwaw a mangabay dyimo.
22Ta chapatak mo do irahem no pōso mo
a aran imo a mismo, ki masanyib ka a nangabay so kadwan.
23Tabo nya, ki napaneknekan ko do kinasīrib, kan binata ko a kon ko,
“Ikarigātan ko somīrib.’’
Ki āwan, kāya kwaba.
24Tabo nyaya naparin, ki mateng do kapakaāwat no tawo.
Mararahem a adayo kan matokod aba no aran sino.
25Dawa, tinādyan ko kapangaktokto ko a makatoneng,
imbistigaran, kan chichwasen iyaw kinasīrib kan kailawlawag no tabo,
kan tan maāwatan ko iyaw karahet no abos arang
kan iyaw kabon arang a kinaattit.
26Natonngan ko a makpakpad kan kadiman
iyaw mabakes a akmay totolo,
as no pōso na, ki akmay sīgay.
No kakamay na, ki akmay kadina.
Iyaw tawowaw a madaw so Dyos, ki madichanan na.
Ki iyaw maygaygatosaw, kemkeman na.
27Bata no Mangnanawowaw a kāna, “Nyaw natonngan ko:
“Do kaparapa ko so asa do asa pa
tan mapatakan ko paytābwan na
28do ranan ko a maychichwas a dya makadongso,
nakachichwas ako so asa a malinteg a mahakay do yanan dan rinībo,
ki abaw aran asa a malinteg a mabakes a myan dyira tabo.
29Nya lang nasarākan ko:
Pinarin no Dyos tawotawo a malinteg,
ki somniwal sa do kapaychichwas so āro a pamosposan.”