Hay Aat nan Numbino'ob'on an Punligatan Hitun Luta
1Ya tinnig'u goh nan numbino'ob'on an punligatan hitun luta
ti lumugwalugwada nan mipaligligat,
ya mi'id ah bumadang ay dida ti nidugah di abalinan nan mangipaligligat ay dida.
2At hiyanan hay ninomnom'u ya alyo' di,
“On'onayna din nun'atoy ya un nan matagu!
3Mu on'onayna goh damdama at ahan nan tagun agguy nitungaw
ti agguyna tinnig nan nun'appuhin ma'ma'at hitun luta!”
4Ya na'innilaa' goh an manu ay ibibi'ah nan tagun tumamutamu ta umadangyan ti dumalat nan amohnah nan gina'un nan heneggona. Mu hana ya mi'id di hulbina an ay nan tuyup di pudpuduggon!
5Ya alyonday,
“Nan manangpah an tagu ya unna yoyo'non di ngamayna,
at hay hinaangnay mamatoy ay hiya.”
6Mu on'onayna damdamah un ta"on un itang di wada mu ta malenggoptaat
ya un han tumamutamu ya naliligatan an un ay nan tuyup di pudpuduggon!
7Ya na'innilaa' goh han ohan mi'id di hulbina,
8an nan tagun umu'utun ya mi'id di imbaluyna,
ya mi'id ah a'agina,
mu tumamutamu an adi ahan mun'eblay an gunna udman nan inadangyana.
Ti agguyna ahan ninomnom di hay pangidatanah nan intamutamuna,
at mid hulbin hana an un nunligligat.
Hay Amaphodan di Way Pi'yibba
9On'onayna nan duwa ya un nan oha
ti nan duwa ya do'do"ol di tamuanda.
10Ti gulat ta magah nan oha at wada nan ibbanan mamadang ay hiya,
mu agogohgoh nan tagun un oh'ohha ti gulat ta magah at mi'id mamadang ay hiya!
11Nan ahitungnin ya mundulpig nan duwan molo',
at hindodolnatda,
mu hay aton mah nan un ohan dumolnat?
12Ya wa ay goh di dumatong hi buhul ya mi'id di mapto' hi un abakon nan un ohan tagu,
mu wada ay di pi'yibbana ya mid mapto' ya diday mangabak.
Ya hiyah ne nan gunda alyon di,
“Nan natullun nalulug an talin ya nalot hi mapogtang.”
13On'onayna nan nawotwot mu nanomnoman an unga ya un nan nala'ay mu agguy nanomnoman an ali an adina unudon nan mitugun ay hiya. 14Ti ta"on un unga ya nawotwot unu nalpuh baludan ya mabalin an mumpapto' hinan babluyna. 15Ya tinnig'un amin nan aat di tataguh tun luta, ya ininnila' an waday ohah nan ungungan mamnoh hinan haad nen ali. 16Ya manuh hopapna ti do'olday mangunud ya bumadang ay hiya, mu awni ta hay umangunuh at pihulonda. At mi'id di hulbina an un ay nan tuyup di pudpuduggona!