Nan Hapit Apo Dios

Hay Nan'ugan nan i'Israel ay Apo Dios
1Ya inalin Apo Dios di,
“Ipagangohyu nan talampet ta mangipa'innila
an na'uyday umat hi agila an mangubat hitun numbabluya'
ti agguyyu inat din nunhahappitanan tu'u,
ya nginohoyyu nan Uldin'u.
2Manu ti munluwalu ayu
ti inaliyuy inilaa' an Ha"in hi Apo Dios.
3Mu layahyu ti agguyyu inunud nan Uldin'u,
at hiyanan na'uyda mahkay di buhulyu ta pumpudug da'yu.
4Ti hay oha goh ya numpili ayuh aliyu ya ap'apuyu an agguyyu inyal'alin Ha"in.
Ya inyammayu goh nan silver ya balitu' hi bulul ta dinayawyu,
at hanay dumalat hi a'ubahanyu.
5Da'yun iSamaria,
adi' ahan pohdon nan inyammayun umat hi kilaw di baka ta dinayawyu!
Nidugah di bungot'un da'yu!
At anuud nin di pumhodan di ugaliyu?
6Henen gunyu dayawon ya un hay inyamman di i'ibbayun holag Israel damdama!
Mu Ha"in ya anggay di immannung an Dios,
at hiyanan henen gunyu dayawon ya mapa"i ta mun'agimu'.
7Ya mi'id di hulbin nan ato'atonyu ti ta"on hi un ayu munhabal ya ma'upohda.
Ya wa ay goh di nalamhanan ya nan buhulyuy mangan.
8At napa"i ayu mahkay an i'Israel
ti ad ugwan ya hay pannig nan tataguh nan abablubabluy ya mi'id di hulbiyu.
9Ti umat ayuh nan atap an dongki an un okod hi umay'ayana.
At ta"on un ad Assyria ya immuy ayun numpabadang,
ya immuy ayu goh numbayad hi udum an babluy hi mangibaliw ay da'yu.
10Mu ta"on un ayu gun mumpabadang hi udum an babluy ya amungo' damdama da'yu
ta iyabulut'u ta paligligaton da'yuh nan ali ya ap'apun di Assyria.
11Manu ti do'ol di inyammayuh pange'nonganyuh a'aliwan di baholyu,
mu un at goh hay a'ud'udman di pumbahbaholanyu.
12Ti nan me'nong ya nan aton an mange'nong ya impitudo"u,
mu agguyyu inunud.
13At hiyanan ta"on hi unyu e'nong ay Ha"in nan ma"aphod an animalyu ya gunyu inan danen ene'nongyu
mu adi' abuluton hana ti mipapanomnom ay Ha"in nan baholyu.
At hiyanan moltao' da'yu ta ipiyuy'u da'yu goh ad Egypt ta mumbalin ayuh himbut.
14Ya mahiw ayun i'Israel an gun mangiyammah a'abung nan aliyu,
mu inaliwanyu nan nunlumun da'yu.
Ya ta"on un da'yun iJudah ya taganyuy paphod hinan nun'ihamad an allup nan numbabluyanyu,
mu ipa'ali' di apuy ta moghob an amin nan gunyu inyamma.”

*8:1 Hay ipa"elna ya ad Assyria.

†8:4 Natoy nan Alin hi Jeroboam II hidin 753 B.C., ya hidin nehnod an himpulu ta tulun tawon an naluh ya waday leman nahayhaynod an a'alid Israel: (1) hi Zechariah (II Ki. 15:8-12), ya (2) hi Shallum (II Ki. 15:13-16), ya (3) hi Menahem (II Ki. 15:17-22), ya (4) hi Pekahiah (II Ki. 15:23-26), ya (5) hi Pekah (II Ki. 15:27-31).

‡8:5 Hiyah ne duwan bulul an impiyamman nan Alin hi Jeroboam I (930-909 B.C.) ad Bethel ya ad Dan (I Ki. 12:28-33).

§8:10 Duway mabalin hi ngadana ti (1) nan Alin hi Shalmaneser V, unu (2) nan Alin hi Sargon II (bahaom nan footnote di Hos. 10:6 ta innilaom di aatdan duwa).

*8:13 Nan Alin hi Jehoahaz (unu Shallum) an nun'alih tuluy bulan ad Judah hidin 609 B.C. ya nipiyuy ad Egypt hidin Alin hi Neco (II Ki. 23:33-34; Jer. 22:11-14).