Hay Namoltaan Miriam
1Ya unat goh inahawan Moses han babain i'Ethiopia ya pinahiw da Miriam ay Aaron. 2Ya inaliday, “Undan hi Moses ya anggay di pi'hapitan Apo Dios? Undan agguy goh ni'hapit ay dita?” Ya dengngol Apo Dios nan inalida.
3(Hi Moses ya mumpa'ampan tagu, ya nidugdugah din nangipa'ampaanah odolna ya un an amin nan tataguh tun luta.)
4Ya himbumagga ya ni'hapit hi Apo Dios ay da Moses, ya hi Aaron, ya hi Miriam an inalinay, “Da'yun tulu ya umuy ayuh nan way Tuldan Abung hi wada' an Dios!” At limmahundan tulu, ya immuyda. 5Ya nun'ohop han bunut an awadan Apo Dios an ay tu'ud, ya nihinah nan pantaw di Me'gonan an Kuwaltu, ya inayagana da Aaron ay Miriam. At immuyda ta neheggondan duwa, 6ya inalinay, “Donglonyuh ten alyo'!
Gulat ta honogo' nan propeta ta middum ay da'yu
ya mumpa'innilaa' ay hiya ti nan pun'enapanday pi'hapita'.
7Mu nat'on di ato' an mi'hapit ay Moses an baal'un na'na'unnud,
at hiyay nange'koda' an amin hinan tatagu' an holag Israel.
8Ti mi'hapita' ay ya mi'haggangana' ay hiya,
ya ibaga' di pohdo' an alyon,
ya innilaona ti bo'on hay nipa"el di hapito' ay hiya.
Ya anggay hiyah nannig hi aat'u.
At anaad ta adi ayu tuma'ot
ta hapitonyuy nappuhih aat Moses an baal'u?”
9Ya ma'abbungot hi Apo Dios ay dida, ya tinaynana dida.
10Ya unat goh na'ubah din bunut hidih nan pantaw di Me'gonan an Kuwaltu ya himbumagga ya napalla' hi Miriam an pimmaha' an ay dalallu. Ya unat goh tinnig Aaron hi Miriam an numbo'on di aatna 11ya inalin Aaron ay Moses di, “Apu, adim ni' ahan idat ay da'mih ten moltamin dumalat nan amanangpahmih numbaholanmi! 12At adim ni' aton di umat hina ay hiyan matagu mu paddungnay nanattoy ti mi'id di pangngel di odolna!”
13Ya numpahpahmo' hi Moses ay Apo Dios an inalinay, “Apu an nabagbagtu! Ipa'adaogmu ni' ahan hiya!”
14At tembal Apo Dios hi Moses an inalinay, “Gulat ta binainan amana hiya ya undan adi mabainan at mipo"oy hi pituy algaw? At okod hiyan milahhin hinan immapalanyuh pituy algaw ta malpah ay di pituy algaw ya unyu hiya pumbangngadon.” 15At inlahhindah Miriam hi pituy algaw, ya agguyda nakak hinan immapalanda, at nan tatagu ya agguyda nakak ta engganah un numbangngad hi Miriam ay dida.
16Ya unat goh nalpah hene ya tinaynan nan tatagud Hazeroth ta impadehdan numbotan ta engganah unda dimmatong hinan Mapulun an Paran ta hidiy immapalanda.