Hay Nangabakan nan Holag Israel hinan iCanaan
1Ya nan alid Arad an iCanaan hidid Negev ya dengngoldan na'uy nan holag Israel an wadadah nan kulhah ad Atharim ya immuy nan tindaluna ta ginubatda dida, at penlohday udum an holag Israel. 2Ya ni'tulag nan holag Israel ay Apo Dios an inaliday, “Gulat ta ipa'abakmun da'mi daten tatagu at ubahonmi goh nan babluyda.”
3Ya inabulut Apo Dios nan inalida, at binadangana dida ta inabakda nan i'Arad. At numpatoyda didan amin, ya numpa"idan amin nan siudadda. Ya nginadnandah nen babluy ta ad Hormah.
Nan Gambang an Niyammah Umat hi Ulog
(Jn. 3:14)
4Ya tinaynan nan holag Israel nan Duntug an Hor ta ene'wadah nan dalan an miyuy hinan Mumbolah an Baybay, mu inlikawdah nan lutad Edom. Mu la'tot ya himmigada nan tatagun dumanallanan, ya nunlilida. 5At numpahalda da Apo Dios ay Moses an inaliday, “Anaad ta enekak da'mih ad Egypt ta inyali da'mih tu ta hitun mapulun di atayanmi? Ya ten mi'id goh di ma'an, ya danum, ya ten la'tot ya nahengla amih nan gunmi onon!”
6At hennag Apo Dios di atata'ot an ulog hinan awadanda, at do'ol di nun'alatdah nan tatagun holag Israel, at do'ol di nun'atoy. 7Ya immuy nan tatagun Moses, ya inaliday, “Numbahol ami ti nappuhiy hinapitmih aat Apo Dios ya umat goh ay he"a! At ad ugwan ni' ya munluwalu'an Apo Dios ta pakakona nan do'ol an ulog!” At inluwaluan Moses nan tatagu.
8Ya inalin Apo Dios ay Moses di, “Iyammam nan gambang hi umat hi ulog, ya impautmuh nan utdu' di hul'ud, ya inluhadmu ta wa ay ta itangad nan na'alat enen nipaut an ulog ya pumhodda an adida matoy.” 9At inyamman Moses nan gambang hi umat hi ulog, ya impautnah nan utdu' di hul'ud ta wa ay ta itangad nan na'alat enen nipaut an ulog ya pumhodda an adida matoy.
Hay Dimmatngan nan Holag Israel hi ad Moab
10Ya inaynayun nan holag Israel an numbaat ta nidatongdah ad Oboth, ya hidiy nungkampuanda. 11Ya impadehda goh ta tinaynandad Oboth ta dimmatongdah nan mapulun hi ad Iye Abarim, ya hidi goh di nungkampuandah nan hinagang ad Moab hi immapit hi buhu'an di algaw. 12Ya numbotanda goh ta immuyda nungkampuh nan Hadog an Zered. 13Ya numbotanda goh ta immuyda nungkampuh nan way pangngel di pingit nan Wangwang an Arnon an wah nan mapulun an nida"it hinan hakup di holag Amor. (Nan Wangwang an Arnon ya igad hi numbattanan di iMoab ya nan holag Amor. 14At hiyah te nitudo' hinan Liblun di Ni'gubagubatan Apo Dios an inalinay,
“Hidi ya wada nan Waheb ad Suphah an nan daplah,
ya hidi goh hinan Wangwang an Arnon.
15Ya minaynayun hi engganah nan lihad hinan nundotalana,
ya niyatam hi ad Ar,
ya niyatam goh hinan igad hi ad Moab.”)
16Ya nakakdah di ta numbotanda ta immuydad Beer, ya hidiy awadan nan obob, at inalin Apo Dios ay Moses di, “Amungom nan tatagu ta idata' didah danum.”
17Ya hidiy nangikantaan nan holag Israel eten kanta:
“Bubun, pun'ibuhu'muy danummu,
at apngaon da'ah kanta.
18Ikantamiy aat ten bubun an linhu'an nan imbabaluy di ali
ti linhu'an nan a'ap'apu an hay hul'udday nunluhu'da.”
Ya la'tot ya nakakdah nan mapulun ta immuydad Mattanah. 19Ya numbotanda ta immuydad Nahaliel. Ya nakakdad Nahaliel, ya immuydad Bamoth. 20Ya nakakdad Bamoth ta immuydah nan nundotalana an hakup ad Moab ta engganah nan buludnah nan Duntug an Pisgah an a'amangan din mapulun.
Hay Na'abakan nan Alin hi Sihon
(Deut. 2:26-37; Psa. 135:11-12; 136:19)
21Ya nunhonag nan holag Israel hi umuy ay Sihon an alin di holag Amor, ya inaliday,
22“Iyabulutmu ni' di pange'wanmih nan babluyyu. Ya adimi ibahhaw an e'wah nan way payawyu, unu nan nuntanomanyuh nan greyp. Ya adimi inumon di danum hinan bubunyu. Mu hay pange'wanmi ya nan Kulhan di Ali ta nangamung unmi lauhan nan babluyyu.”
23Mu agguy ahan inyabulut Sihon di nange'wan nan holag Israel hinan babluyda. At inamungna nan tindaluna ta immuyda ginubat nan holag Israel hinan mapulun ad Jahaz. 24Mu nangabak nan holag Israel, at numpatoyda dida, at hinakupda nan lutada an nete"ah nan Wangwang an Arnon ta engganah nan Wangwang an Jabbok, mu adida pa"ahgop hinan babluy di holag Ammon ti nihamad di allup nan igad di babluyda. 25At hinakup nan holag Israel an amin nan siudad nan holag Amor, ya niddum ad Heshbon ya nan nun'eheggon hinan nunlene'woh an abablubabluy. 26Ti ad Heshbon ya siudad an nunhituwan Sihon an alin di holag Amor an din nangubat hinan alin di iMoab, ya inabakna dida, at hinakupnan amin di lutada ta engganah nan Wangwang an Arnon. 27At hiyaat un nan nangitudo' hi kanta ya alyonay,
“Umali ayud Heshbon
ta ipaphod tu'u nan napa"in siudad Sihon!
28Ti wada han apuy an nalpud Heshbon
an dumaladalang hinan siudad Sihon,
at immuy ta nunggohobna nan siudad ad Ar an hakup ad Moab
an awadan nan atata'nang an duntug an ma'amang hinan Wangwang an Arnon.
29Mahmo' nan iMoab ya da'yun tatagun mundayaw ay Chemosh
ti inyabulutnan ipaploh nan linala'in limmayaw ya nan binabai ta himbut Sihon an alin di holag Amor!
30Mu mabi'bi'ah ami ya un dida,
at nun'a'ubahda ya ta"on nan babluyda an nete"ad Heshbon ta engganad Dibon!
Ya nun'iwalitangmi didan mete"ad Nophah ta engganah ad Medeba.”
31At nunhitu nan holag Israel hinan lutan di holag Amor.
32Ya unat goh numbangngad din hennag Moses an immuy nunhi'im eden babluy ad Jazer ya ni'gubatda nan nun'eheggon an babluy, at nangabakda nan holag Israel, at penlohdah den siudad, ya numpakakda nan holag Amor an numpunhituh di.
Hay Na'abakan nan Alin hi Og
(Deut. 3:1-11; Psa. 135:11-12; 136:20)
33Ya imbaweng nan holag Israel di nange'wanda ta nan kulha an miyuy ad Bashan di enengwada. Mu nan alid Bashan an hi Og ya initnudna nan tindaluna ta umuyda damuwon nan holag Israel ta gubatonda didad Edrei.
34Ya inalin Apo Dios ay Moses di, “Adim ta'tan hi Og ti baliwa' da'yu! At an amin nan tataguna ya nan lutana ya idat'un da'yu. At hay atonyu ya umat hinan inatyun Sihon an alin di holag Amor an nunhitud Heshbon.”
35At pinatoyda nan Alin hi Og, ya ta"on nan imbabaluyna, ya an amin nan tataguna. At mi'id ahan di na'angang hi ohah matagu. Ya hinakupdan amin an penloh nan numbabluyan Og.