1A Yicu änï gïbälükänü ngwüꞌrü yaanu ngwoꞌre kündär güngün. 2A ngwüjï ngweꞌte äpïjä dïjü diru dirga ndralu kïlälälü. Anni ma Yicu engga ämnïng Ngwaalu gwegen, ngwube ci dirga ndoo, “Mätï liguri gwani gïjï güny, ke gwunga gwuma aar ang düdänïjänü.”

3A ngwujaꞌri ngwee gäbïcï ngworta ngwoko ngwudi yobo aar äbïngïnï giyigoranu yegen aar ari, “Gur nggee garu ngwulem!”

4A je Yicu lenge yigor yegen, ngwuje be ci nu, “Ange gwuru ngaa be ätï ngwujaꞌri ngwee ngwuki giyigoranu yalu? 5Yiru ange yanni yojemana, ndi ari, ‘Ke gwunga gwuma aar ang düdänïjänü,’ na ndi ari, ‘ꞌDïꞌrü ang ele’? 6A be nunnu ngaa lenge ndi ari Gïjï gidi Dïjï dümnä gätï yelenya ngene gïdïyängälü ndi düdänïjï ngwüjänü ndi ke gwegen.” No ngwuci dirga ndoo, “ꞌDïꞌrü ang ape gïlälälü gunga ang ele ꞌdunu.”

7A gur ꞌdïꞌrï ngwele ꞌdunu. 8Anni ma ngwüjï engga yiꞌral giyoo, aar dibi aar ortada Ngwaalinga ätä gwe gwüngün ngwüjü ngwümnä yiima nono giyee.

9Anni ju Yicu ndi ele ngenone, ngwengga guru gani Mätä gijalu ngwaalu ngwudi uti dulba. Ngwuci, “Gwujaniny.” A Mätä ꞌdïꞌrälü ngwugwujani.

10A ji a Mätä urnidi Yicung yïrnü ꞌdunu na ngwudulba ngwonyadu na lanni lati aar je ci liki ila aar le eny na ngwooꞌra ngwüngün. 11Anni ma Ngwübärrïjï engga yiꞌral aar je ꞌti jädänü, aar otaci ngwoꞌralu ngwüngün, “Ange gwuru ati be doorta dalu emadi ngwudulba ngwe na lanni liki?”

12Anni mung ꞌdingini no, ngwuje be ci, “Läꞌtüdï lanni luꞌru nono lati ele gidima, aar be ru lanni lümä. 13Ïndär ngaa lengeda ngwujaꞌri ngwee ngwaru nu, ‘Äny gwubupa ïnäng nggwaꞌti bupa mïꞌrïnïng nono.’ Ndi ari äny gwaꞌti ïndädï ndi nje urnidi lanni lïdünälü, nyi be ilada ndi nje urnidi lanni liki.”

14A be ngwooꞌra ngwudi Yuwana ila aar otacalu, “Awa ndi ari änyängä na Ngwübärrïjï lati määtä ngwädä, aaꞌti be ngwooꞌra ngwunga mätï ngwädä?”

15A je be Yicu ci nu, “Awa a be ngwürnü ngwudi gur gidi agu runi aar le be ji! Gaji ga ji gila ma aar je apada guru nggo gadi agu, la be määtä ngwädä.

16Dïjï daꞌti dati ape direda diyang ngwugatada gidired diru duꞌrin, ndi ari dired danni diyang da ronyadi dokta diredanu ndoo duꞌrin da ke da geꞌte gubuꞌru gikana. 17Na dïjï daꞌti dati ape diꞌrica diyang ngwübäläjï gïdürädänü diru duꞌrin. Mung bäläjï, düräd da ubi, diꞌrica da bälädälü mbüny na düräd da geradalu, bärï, lati bäläjï diꞌrica diru diyang gïdürädänü diru diyang na ꞌdün ngwa jayi nono.”

18Anni mung ji ndi ondaji ngwujaꞌri ngwee a deleny deꞌte ila ngwüjürbäcälü yirku ye ngwuci, “Gera güny gima ayi gweneno. A be ila ang alliji guy nono, ga midi.” 19A Yicu ꞌdïꞌrï aar gwe ele na ngwooꞌra ngwüngün ele ꞌto.

20A no, a daw deꞌte dati bäläjï yïnälü dätï ngwüdläyü ꞌdï na rom (12), ngwila giluꞌranu lüngün ngwakani direl nono didi dired düngün 21ngwari giligoranu, “Minyi akani direl nono didi dired düngün ꞌdogo, nggwa uꞌri nono.”

22A Yicu gwurlalu ngwengga. Ngwuci nu, “Mätï liguri, gwani gïjï güny. Ämnï gwunga Ngwaalu gwuma ang uꞌriyi nono.” A daw uꞌri nono kaji nggoo geꞌte geꞌte.

23Anni mung änï gïdrü ngwuꞌdun ngwudi deleny ndoo, ngwengga ngwüjü aar elnge gïmärä aar ürrï dula, 24ngwuje ci nu, “Abarar kayanu. Gera gaꞌti ayu a be gindru.” Aar be ärï ngwïmä yïdäpängä. 25Anni ma aar ꞌtäjï ngwüjü kay geꞌte, ngwänï ngwümätä gïjü kuy, ngwüꞌdïꞌrïyälü. 26A ngwujaꞌri ngwee badalu pad ngwaalu ngwoo ku.

27Ju gu Yicu ndi ele ngwaalu ngwoo, ngwüjï rom (2) ngwürïmü ngwäy gwujani aar urnidi dulala aar ci, “Aar ang ïnä gwani Gïjï gidi Däwüd!”*

28Anni ma Yicu ele ngwuꞌdun, ngwüjï ngwoo ngwürïmü ngwäy ïlïjä ngwuje otacalu, “Ngaa lämnä ndi ari äny gwätï yiima ndi ärrï yiꞌral giyee?”

Aar ci, “Yäy, gwani Deleny.”

29Ngwuje be akani ngwäy nono ngwegen ngwuje ci, “Gwani ämnï gwalu Ngwaalu aar gu ru ꞌdanggalu.” 30A ngwäy ngwegen uꞌri nono. A je Yicu girinya ndi ari, “Aaꞌti dïjï dere da gu lenge aꞌtur.” 31Aar be ꞌtü aar bädïyï ngwujaꞌralu ngwani nginde ngwaalu ngwoo ꞌdar.

32Anni ma aar ji ndi ꞌtü, aar apa guru gätïnä ngwüꞌrïllä nono ating ꞌti ondaju aar äpïjä Yicung. 33A anni ma aar gu ꞌtüyï ngwüꞌrïllä, a gur nggoo gigwugwundu ondaji. A yiꞌral dibaji ngwüjälü aar ari, “Yere yaꞌti nje änggädï yiru gu no Yïjïräyïl!”

34A be Ngwübärrïjï ari, “Yiima yiru yidi deleny didi ngwujegoꞌrr yating ye ꞌtüyï ngwujegoꞌro.”

35A Yicu ele gïyündär na giyubanu, ndi enggaci ngwüjü ngwämrä ngwuje ondaci ngwujaꞌri ngwanni ngwujaw ngwani yeleny yidi Ngwaalu ngwuꞌriyi ngwüjü nono gidimdi na ümï. 36Anni mung engga ngwüjü ngwonyadu, aar ïnä ndi ari ngwuju gïdïrbänü aar ꞌti übïdï düwä de, aar ru nono ngwangala ngwanni ngwaꞌti ätï doꞌranu. 37Ngwube ci ngwoꞌra ngwüngün nu, “Yon yonyadu kiruny, a be ngwäänü ngwudi uni ru ngwoko. 38Otacar Delenyalu didi giruny ndi ari ngwükäjä ngwäänä kiruny güngün aar uni yona.”