Abhapaafi na bhaana she bhakwanzɨwa kwɨkhala
1Nɨɨmwe mʉbhaana, mubhatinikhaje abhapaafi bhiinyu mwa Mwene, kʉnongwa ye wʉnʉʉwo we wugolosu. 2Ɨndajɨzyo ɨya kwanda ye yɨlɨ nʉ mʉlajɨ yɨkʉtɨ, “Umushindikhaje uyise waakho nu nyina waakho, 3ɨnga ʉsaywe, ʉyɨɨkhale insiku inyinji mʉ nsɨ.” 4Nɨɨmwe mubhayise, mʉtabhandɨlɨzyaje abhaana bhiinyu, lyoli mʉbhasʉngaje ku wusunde na kʉbhamanyɨzya ɨmanyɨzyo zya Mwene uYeesu.
Abhapɨtɨ na bhatumwa she bhakwanzɨwa kwɨkhala
5Ɨmwe mubhatumwa, mubhatinikhaje abhapɨtɨ bhiinyu abha mʉ nsɨ kʉ lyoga na kuyinga. Mubhatinikhaje kʉ mwoyo wonti, anza she mukumutinikha uKilisiti. 6Mʉtabhabhombelaje akhinza we bhakʉbheenya bhʉʉlo, kʉtɨ bhabhapaale. Lyoli mʉbhabhombelaje anza bhatumwa bha Kilisiti, mʉbhombaje kʉ mwoyo zyonti zye zɨkʉmʉkhondezya ʉMʉlʉngʉ. 7Mʉbhabhombelaje kʉ mwoyo ʉwa lʉseshelo, anza she mʉkʉmʉbhombela ʉMwene te kʉmʉbhombela umuntu. 8Mʉmanye kʉtɨ ʉMwene uYeesu akhayɨmʉposheelezya weeka weeka kʉ mbombo yaakwe inyinza ye ayɨbhombaga, abhe mutumwa awe we te mutumwa. 9Nɨɨmwe mʉbhapɨtɨ, mʉbhabhombelaje akhinza abhatumwa bhiinyu sita kʉbhoogofwa. Mʉmanye kʉtɨ ʉmʉpɨtɨ waabho nu wiinyu alɨ weeka kʉmwanya, na kʉtɨ, uwulonji waakwe ku bhonti wa wugolosu, khabhɨlɨ te wa kwɨmɨla.
Ɨvɨlwɨlo vwonti ɨvwa Mʉlʉngʉ
10Ishi ɨne ɨnkʉtɨ, mwonjele kuyisinda mwa Mwene na makha gaakwe amapɨtɨ. 11Kwataji ɨvɨlwɨlo vwonti vwe ʉMʉlʉngʉ akʉʉbhapa, kʉtɨ mʉkhole kuyidinda na madala amabhiibhi aga Seetani. 12Kʉnongwa ye ibho lyɨtʉ te ku kulwa na bhantʉ. Lyoli tukulwa na bhanajeeshi abha mapepu amabhiibhi bhe bhalɨ kʉ nsɨ ye yɨtakʉlolekha pamiiso amazelu, tukulwa na bhamwene bhanaabho, abhapɨtɨ na bha waamʉlo bhe bhakʉtabhaala ɨnsɨ ɨya khiisi.
13Pe shɨnɨɨsho, kwataji ɨvɨlwɨlo vwonti vwe ʉMʉlʉngʉ akʉʉbhapa, ɨnga mʉkhole kufuuya akhabhalɨlo akhi bho. We mwalwa ibho kufishila kʉwʉmalɨlɨshɨlo, mʉtɨbhe she muyisindile. 14Pe mʉyɨlɨnganyaaje. Uwanalyoli wʉbhe ngatɨ lɨlambɨ mʉ masana giinyu, uwugolosu wʉbhe ngatɨ shidindilo pa shifubha. 15Mʉyɨlɨnganyaaje kʉlʉmbɨɨlɨla iNtumi iNyinza zye zɨkʉleeta uwutengaanu, zɨbhe ngatɨ vɨlyatʉ mʉ vɨnama vwinyu. 16Peeka na vɨnɨɨvwo vwonti, ʉlwɨtɨkho lʉbhe ngatɨ shɨpɨnjɨlo insiku zyonti mʉ nyoobhe zyinyu. Ɨnga mwalʉbhombela lʉnʉʉlwo, lutizimanye utusomvu ʉtwa mwoto twe ʉmʉbhomba mbiibhi uSeetani akʉsʉmba kukwinyu. 17Posheelaji uwuposhi ngatɨ nkofwela yiinyu ɨya shɨjela, lyope izwi lya Mʉlʉngʉ lɨbhe ngatɨ mʉfwo ʉmʉpɨtɨ we uMupepu uMufinjile akʉʉbhapa.
18Ishi bhanholo bhaanɨ, mupuutaje impuuto zyonti akhabhalɨlo khonti kʉ makha ga Mupepu uMufinjile. Kʉnongwa ya lɨnɨɨlyo, mʉbhe amiiso sita kulita, mʉjendeelele kubhapuutila abhafinjile bhonti. 19Khabhɨlɨ mumputilaje nɨɨne ɨnga we nabha na khabhalɨlo akha kʉvwɨnsya iNtumi iNyinza, ʉMʉlʉngʉ ampe amazwi aga kʉlonga, ɨnga ɨndʉmbɨɨlɨle ku wudandamazu ɨnsɨɨbho yɨnɨɨyo ɨya Mʉlʉngʉ ye yáamɨle kukwilu. 20Ɨne ne mʉsonteelezwa kʉnongwa yi ntumi zɨnɨɨzyo she poope ishi ɨndɨ mwɨ jeela. Puutaji ɨnga ɨmbe nu wudandamazu ʉwa kʉzɨvwɨnsya anza she yɨkwanzɨwa kʉbhomba.
Ɨndamʉkho ɨzya kʉwʉmalɨlɨshɨlo
21Ʉnholo waanɨ mʉ lwɨtɨkho ʉmʉganwa uTikiiko, umubhombi umusunde ʉwa Mwene uYeesu atɨbhabhʉʉzye she ɨnkʉjendeelela nɨ mbombo zyonti zye ɨnkʉbhomba. 22Ɨnkʉmʉsonteelezya kukwinyu ɨnga abhapanjɨle ɨnongwa zyɨtʉ na kubhajinjizya ʉmwoyo.
23Bhanholo bhaanɨ mʉ lwɨtɨkho, ɨnkʉbhalaabhɨla uwutengaanu, ʉlʉgano nʉ lwɨtɨkho vwe vikufuma kwa Taata ʉMʉlʉngʉ nʉ Mwene wɨɨtʉ uYeesu Kilisiti. 24Ɨnkʉbhalaabhɨla kwa Mʉlʉngʉ kʉtɨ abhalolelaje uwiila bhonti bhe bhamuganile ʉMwene wɨɨtʉ uYeesu Kilisiti kʉ lʉgano lwe lʉtalɨ nʉ wʉmalɨlɨshɨlo.