1Abon zin niina ademzei ɔl demziin ci aganɔ been gɔl o Joowo een didi. 2Tilo ɔl o mac adikir kegenyit kaale dook, ma azooni eleeti kaale o gɛr, ka kanyayit niigi tuwɛn been rɛɛzɔnɛt ceen didi, ma amɛz piryakzɛt. 3Bodo buk tilo ŋaai o adikir ka kabaayit niigi baayiz o ŋaai o anycek zinzeeti ugeec Jook. Alaŋ abon ŋaati aŋɔmtin, karabɔŋ een ŋaati arɛɛzi nyaantanɛ. Bar abon adɛmɛz niigi kaal ci abon, 4ka kedemezit niigi gɔnɔgi o ŋaan een nyamɛka gɔl ci ka kɛrɛɛzti niigi eet ugeec been dɔl ugeec. 5Ka buk kagamit niigi eleeti ugeec, ma azooni zinzeeti ugeec kaale o gɛr, ka kiziti niigi ŋaai ci abon korginu, ma azii eet ugeec juruŋ. Mã agɔɔn niigi nɔkɔ, akɔm koca eet ci azɔɔz kaviyak o Joowo gɛrzɛ.

6Abon buk aricanei lɔgɔzɛt kagamit eleeti. 7Zin buk niina alye unun maany abon kaala o agoon dook eegin kaal ci abon ka kizi yabziinok ci ayayiz ɔl ogɛn. Arek ziniz demziin. Dɛmɛz ɔl juruŋ. 8Dɛmɛz ɔl zoozowe o abon een didi, ka ɔl o amarninet ageet kanyayit alyaan, eeci akɔm niigi gi ci gɛr ajowa ka kokonycet ageet.

9Tilo gabara ween mirɔk atuwe kiziiyit ɔl o agama nɔɔgɔ. Abon agoonek niigi nɔɔgɔ kaal dook juruŋ ka kanycek niigi nɔɔgɔ kataltɔ. Alaŋ abon ŋaati adaŋɔn niigi kibeen ɔl o agama nɔɔgɔ, 10karabɔŋ bar agɔrɔz kaal cigeec. Bar abon ayelzek niigi nɔɔgɔ vɔlkɔcɔn ki bonat uneeŋ gɔɔn abonan tup. Gole nico eyelizta koca niigi titinyɔn o demziin o akati Jook ween ruguzoi onai kaale o agɔɔn niigi dook.

11Eeci ayelza Jooi dɛtɛn onin ka korogozi ɔl dook. 12Dɛtɛn zin nico nɛɛn o anyet ageet kotoŋit baayiz ci ɔl o alaŋ aga Jook, ma anyet buk kotoŋit reezinɛt o kaal o loocu, ma anyet ageet kabaayit looce nico baayiz ci kagami zinzeeti, ki baayiz ci abil tɔp, been baayiz ci kabaayi gole ci ɔl o aga Jook. 13Abon kagɔɔn naaga nɔkɔ ŋinti ŋaan rak karɛwi naaga iiten o talniinto abadaan Yesu o. Ŋaan zin iitene nice ayelzai diŋdiŋɔni o Yesu Kiristo ween Jook onai adikir, ma een ruguzoi onai. 14Iirik niini ɛlɛ onin ŋaaten ageet ka kɛɛlawet ageet gerzitine onai dook, ma uwuyet niini ageet kiziti ɔl cigin abon vɔɔr zinzeeti, ma anyet kereezit gooni ci kagɔɔni kaal ci abon doon.

15Demezek zin kaal nicoko ɔl. Abon adizkei niina nɔɔgɔ kaale o abon, ma agernyei nɔɔgɔ kaale o gɛr. Tugu nɔkɔ alaazete cun baal anyin Jooi o dook. Má anyi nɔɔgɔ kepeztin ineet.