1মুছা নবীয়ে এওখান কইলা, “মাবুদে বাতছেলল, আহলিয়াব আর অইন্য কারিগর অকলরে আখল-বুদ্ধি দান করলা, যাতে তারা পবিত্র এবাদত খানার হকল কাম-কাজ করতা পারইন। মাবুদে যেলা হুকুম করছইন, অউ লাখান তারা যানু এবাদত খানার হকলতা বানাইন আর হাজাইন।”

2অউ কাম করানির লাগি মুছায় বাতছেলল আর আহলিয়াবরে আনাইলা। মাবুদে যেতা উস্তাদ কারিগর অকলরে আখল-হেকমত দিছইন, আর ই কাম করার লাগি যেরার দিলো খাইশ পয়দা অইছে, মুছায় তারারেও আনাইলা। 3তারা আইয়া পবিত্র এবাদত খানা বানানির লাগি, বনি ইসরাইলর দেওয়া লিল্লার হকল মাল-ছামানা মুছার গেছ থাকি সমজিয়া নিলা। মানষে খুশি অইয়া নিজর ইচ্ছায় পরতেক দিন বিয়ানে আরো চিজ অকল আনিয়া অনো লিল্লা দিতা। 4যে উস্তাদ কারিগর অকল এবাদত খানার কামো আছলা, তারা ইতা দেখিয়া, নিজর কাম থইয়া আইয়া মুছারে কইলা, 5“মাবুদে যেতা যেতা বানানির হুকুম দিছইন, ইতা বানানির লাগি মানষে দরকার থাকি আরো বেশি মাল-ছামানা লইয়া আইরা।”

6তেউ মুছার হুকুমে মানষে হকল বনি ইসরাইলরে জানাই দিলা, এবাদত খানা বানানির লাগি, কেউ যানু আর কুনু মাল-ছামানা লিল্লা না দেইন। অউগি মানষে লিল্লা দেওয়া বন্দ করলা। 7কারন এবাদত খানার কামর লাগি দরকার থাকি আরো বেশি চিজ যোগাড় অইগেছিল।

8বাদে কাম কররা উস্তাদ অকলে পেচাইল সুতার দামি সুতি কাপড়, লিলুয়া, বাইংগনি, আর লাল সুতাদি বানাইল দশ টুকরা কাপড় দিয়া আল্লার ঘরর পর্দা বানাইলা। আর উস্তাদ অকলে এর উপরে কারুবী অকলর ছবি বাইন করলা। 9পরতেক টুকরাইন এক মাপর আছিল, লাম্বায় আটাইশ আত আর পাশে চাইর আত। 10বাদে পাচখান-পাচখান করি এখানো জুড়া দিয়া বড় করি দুখান তেরপাল বানাইলা। 11আর দুইও তেরপালর পাশর এক কিনারো, লিলুয়া সুতাদি হুকর ফুড় দেওয়া অইলো। 12অউলা পয়লা তেরপালর কিনারো পইঞ্চাশগু হুকর ফুড় আর দুছরা তেরপালর কিনারো পইঞ্চাশগু হুকর ফুড় লাগাইল অইলো। ই দুইও হুকর ফুড় এগু আরেগুর উল্টামুখা করা অইলো। 13বাদে সোনাদি পইঞ্চাশগু হুক বানাইয়া হউ হুকর ফুড়র মাজেদি হারাইয়া, বড় দুইও তেরপালরে জুড়া দেওয়া অইলো। তেউ এখান ঘর তিয়ার অইলো।

14আল্লার ঘরর চালর লাগি ছাগলর রুমা দিয়া তেরপালর লাখান এগারোখান টুকরা বানাইল অইলো। 15ইতা পরতেক খান একই মাপর আছিল, তিশ আত লাম্বা আর চাইর আত পাশ। 16অন থাকি পাচ টুকরা একলগে জুড়া দিয়া বড় এক তেরপাল বানাইলা। আর বাকি ছয় টুকরা জুড়া দিয়া, আরোখান বড় তেরপাল বানাইলা। 17পয়লা বড় তেরপালর পাশর এক কিনারো পইঞ্চাশগু হুকর ফুড় লাগাইলা, আর দুছরা তেরপালোও অউলা লাগাইলা। 18বাদে পিতল দিয়া পইঞ্চাশগু হুক বানাইয়া হউ হুকর ফুড়র মাজেদি হারাইয়া, অউ বড় দুইও তেরপাল এখানো জুড়া দিলা। তেউ ই দুইও তেরপাল মিলিয়া এখান ছানি অইলো। 19লাল রংগ করা মেড়ার চামড়াদি এর উপরর ছানি বানাইল অইলো, বাদে ফু’র চামড়াদি আরোখান ছানি তৈয়ার করিয়া এর উপরে গুরি দেওয়া অইলো।

20বাদে বাবলা লাকড়িদি কয়খান ফ্রেইম বানাইল অইলো। 21পরতেক ফ্রেইম আছিল লাম্বায় দশ আত আর ফাড়ে দেড় আত। 22পরতেক ফ্রেইমো দুগু করি পায়া লাগাইয়া ঘরর হকল ফ্রেইম এক লাখান বানাইলা। 23অউ ঘরর দক্ষিন গালার লাগি বিশখান ফ্রেইম জুইত করলা। 24ই বিশো ফ্রেইমর পায়ার তলে চাল্লিশগু রুপার ভুরা লাগাইলা। পরতেক ফ্রেইমর দুই পায়ার তলে দুগু ভুরা লাগাইল অইলো। 25আল্লার ঘরর উত্তর গালার লাগিয়াও বিশখান ফ্রেইম জুইত করলা। 26ই পরতেক ফ্রেইমর পায়ার তলে চাল্লিশগু রুপার ভুরা লাগাইলা। একো ফ্রেইমর তলে দুগু করি ভুরা লাগাইল অইলো। 27আর পচিম গালার লাগি, মানি খর গালার লাগি ছয়খান ফ্রেইম বানাইলা। 28আর খরর দুইও কুনাত দুখান ফ্রেইম লাগাইলা। 29ই দুইও কুনার ফ্রেইমরে কাছার ফ্রেইমর লগে তলে-উপরে জুড়া দেওয়া অইলো। পরতেক কুনার দুইও ফ্রেইমরে ধারর ফ্রেইমর লগে বাত্তি মারিয়া জুড়া দেওয়া অইলো। 30তেউ আটখান ফ্রেইম আর ষোলগু রুপার ভুরা লাগলো, একো ফ্রেইমর তলে দুইটা করি ভুরা দিলা।

31বাদে ফ্রেইমরে জুড়া দিবার লাগি বাবলা লাকড়িদি কয়গু লাম্বা বাত্তি বানাইলা। 32ঘরর এক গালার লাগি পাচগু বাত্তি, আরক গালার লাগি আরো পাচগু, আর পাচগু বাত্তি খর গালা, মানি পচিম গালার লাগি বানাইলা। 33ফ্রেইমর মাজখানো লাগাইল অউ বাত্তিদি হকল ফ্রেইমর একমাথা থাকি আরক মাথা আটকাই দিলা। 34বাদে ই ফ্রেইম খানাইন সোনাদি লেপিলা। আর বাত্তি লাগানির লাগি সোনার কড়া লাগাইয়া, বাত্তিরেও সোনাদি লেপিলা।

35অউ উস্তাদ কারিগর অকলে দামি সুতি কাপড়দি এখান পর্দা বানাইলা। পর্দার উপরে লিলুয়া, বাইংগনি, লাল সুতা দিয়া কারুবী অকলর ছবি বাইন করলা। 36ই পর্দা টানানির লাগি বাবলা লাকড়িদি চাইরটা খুটি বানাইলা, বানাইয়া অউ খুটিন্তরেও সোনাদি লেপিলা, খুটিন্তর মাথাত সোনার কড়া লাগাইলা। খুটির তলে ভুরা দিবার লাগি রুপার চাইরটা ভুরা বানাইল অইলো।

37তাম্বুর দুয়ারর লাগি লিলুয়া, বাইংগনি, লাল সুতা আর দামি সুতি কাপড়দি নকশা করি এখান পর্দা বানাইলা। 38ই পর্দার লাগি পাচটা কড়া আর পাচটা খুটি বানাইল অইলো। খুটির মাথা আর তল সোনাদি লেপা অইলো, খুটির তলর ভুরার লাগি পিতলর পাচগু ভুরা বানাইলা।