28
Tupàn uzepyk putar Izaew ywy rehe har wanehe nehe
1 Tupàn uzepyk putar Xamari tawhu rehe nehe, — Tawhu ikatuahy ma'e, i'i uka'u ma'e Izaew ywy rehe har wà.
Pepuhareko a'e tawhu ywy katu rehe wapyk ma'e nehe.
A'e pe har uka'u waiko wà.
Tawhu ipuràgaw ukàzym iko.
Nuzawy kwaw ma'eputyr uxinig ma'e kwer.
2 Tupàn Tuweharupi Wiko Ma'e omono kar putar amo awa ikàg ma'e ukyze 'ym ma'e a'e nehe.
Ur putar àmànita ikyrahy haw ài nehe.
Nuzawy kwaw ywytuaiw tàpuz heitykar nehe.
Nuzawy kwaw àmànuhu ikyr haw nehe.
Umuaiw putar ma'e paw imumaw pà nehe.
3 Xamari, — Tawhu ikatuahy ma'e, i'i uka'u ma'e Izaew ywy rehe har wà.
Zauxiapekwer upyropyrog putar a'e tawhu heityk pyrer rehe wà nehe.
4 Tawhu ipuràg ma'e a'e, ywy katu rehe wapyk ma'e a'e.
Ipuràgaw ukàzym putar nehe. Nuzawy kwaw ma'eputyr uxinig ma'e kwer nehe.
Nuzawy kwaw ma'e'a kwer pi her ma'e iapyw ma'e ipy nehe, kwarahy mehe har nehe.
Izi'itahy ku'em mehe amo opo'o i'u pà.
5 A'e 'ar mehe Tupàn Tuweharupi Wiko Ma'e Ikàg Wera'u Ma'e wiko putar ma'eputyr ipuràg ma'e àkàg rehe har romo iapo pyrer ài nehe.
Omono putar a'e àkàg rehe har wemiaihu izuka pyr 'ym wanupe nehe.
6 — Urepurapo kar wer ikatu ma'e rehe teko wanupe ure, i'i putar pureruze'eg ma'e wà nehe, ta'e Tupàn uma'ereko putar wapy'a pupe nehe xe.
Amo zauxiapekwer ume'egatu tawhu weko haw rehe uzekaiw pà wàmàtyry'ymar wanuwi.
Tupàn umupytu'u kar putar a'e zauxiapekwer wakyze re a'e wà nehe no.
Tupàn uzepyk Zuta ywy rehe har wanehe
7 Amo teko wata oho waiko uka'u pà wà, ta'e ui'u win tetea'u pupe wà xe.
Nupuner kwaw upu'àmaw rehe wà, ta'e ui'u kàwiahy tetea'u pupe wà no xe.
Xaxeto a'e wà, Tupàn ze'eg imume'u mua'u har a'e wà no, wiko uka'u pà u'au'ar pà wà.
Tupàn wexak kar ma'e hexak pyrer 'ym uze'eg imume'u har wanupe. Uka'u hexak mehe wà. Nukwaw katu kwaw wà.
Xaxeto uka'u a'e wà no. A'e rupi nukwaw kwaw teko waneruze'egaw wà no.
8 Wahuhuk awer upyk ywyrapew wama'ereko haw a'e.
Naheta kwaw ni pitài ikatu haw ywyrapew rehe.
9 Uze'eg zemueteahy herehe, uzehezehe upuranu pà wà.
— Mo rehe ko Tupàn ze'eg imume'u har ipurumu'e wer iko, i'i uzeupeupe wà.
— Aipo ukwaw Tupàn ze'eg imume'u katu haw zanewe, i'i wà.
Aipo zaiko memyr ukamu romo ma'e kwer romo zane.
10 Zanerereko kwarer ài kuzàtài ài a'e.
Ipurumu'e wer zanerehe pape imugeta haw izypy mehe har rehe a'e, i'i wà.
11 Aze napepurenu wer kwaw heze'eg rehe nehe, a'e mehe Tupàn Tuweharupi Wiko Ma'e uze'eg putar peme a'e nehe.
Umuze'eg kar putar teko amo ae ywy rehe har amo ae ze'eg rupi uze'eg ma'e a'e wà nehe.
A'e umume'u putar Tupàn ze'eg peme a'e wà nehe.
12 Kwehe mehe aze'eg nezewe peme.
— Tupàn pemupytu'u kar putar nehe.
Pemonokatu putar ma'erahy haw wi ma'uhez haw wi xe a'e nehe.
Xe peàmàtyry'ymar nuzapo kwaw ikatu 'ym ma'e peme nehe, a'e peme.
Napepurenu wer kwaw heze'eg rehe.
13 A'e rupi Tupàn pemu'e putar zemu'e haw izypy mehe har rehe nehe.
Penereko putar kwarer ài a'e nehe.
Na'e pezeagaw putar peata pà nehe. Kwarera'i u'ar ukupe kutyr.
Nezewegatete peneko haw iaiw wera'u putar nehe. Amo pemuahy kar putar wà nehe. Pe'ar putar ywykwar miar ipyhykaw pupe nehe. Pepyhyk putar pemunehew pà wà nehe.
Peme'egatu peneko haw ikatu mua'u ma'e rehe nehe, i'i
14 Tuwihaw Zeruzarez pe har a'e wà,
awa wiko wera'u ma'e ko teko waneruze'egar wà,
peinu Tupàn Tuweharupi Wiko Ma'e ze'eg nehe kury.
15 Peze'eg peiko nezewe.
— Uruzapokatu ureze'egaw màno haw rehe we ure.
Uruzapokatu tuwe ureze'egaw umàno ma'e kwer wapyta haw rehe we.
A'e rupi iaiw paw uhua'u ma'e tur mehe
nurupuraraw kwaw ma'erahy ure nehe, peze peiko.
Temu'emaw rehe pezeruzar peiko.
— Ma'e rehe uremunar haw urepyro putar nehe, peze peiko.
16 A'e rupi Tupàn Tuweharupi Wiko Ma'e Zanezar uze'eg nezewe kury.
— Amuapyk amo ita hereko Xiàw rehe ihe kury.
Ita hekuzar katu ma'e a'e. Aexaexak a'e ita ihe.
A'e ita upyta putar amo ita heràpuzuhu wy pe har iahykaw rehe a'e nehe, imuàtà katu pà a'e nehe.
Amuapyk ko ze'eg hehe.
— Tupàn rehe uzeruzar ma'e nukyze kwaw wà, i'i ze'eg ita rehe har.
17 Teko umuà'ygatu pàrirogaw ita inemo apyr har pupe wà. Nezewegatete apureruze'egatu hekatuahy haw pupe ihe no.
Naheremu'em kwaw nahemunar kwaw waneruze'eg mehe nehe
Peiko pezeàmimaw ikatu 'ym ma'e rehe. Napemigatu kwaw a'e.
Àmànita umumaw ma'e.
'Y uwyrykahy ma'e weityk ma'e heraha. Nezewegatete amumaw putar penemu'emaw peneko katu haw romo iapo pyrer ihe nehe.
18 Màno haw rehe we peze'eg awer penemiapo katu kwer uzemumaw putar nehe.
Umàno ma'e kwer wapyta haw rehe we peze'eg awer penemiapo katu kwer uzekazeka putar upaw pà nehe no.
Iaiw hawhu tur mehe
peneraha putar 'y uwyrykahy ma'e ài nehe.
19 Teko ma'erahy ipuraraw paw nànàn pepuraraw putar wainuinuromo pe nehe no.
Tuweharupi ur putar nehe: ku'em mehe, kwarahy heixe re nehe no.
Tupàn ze'eg pitàitàigatu werur putar pekyze haw ipyahu ma'e nehe.
20 Peiko putar awa a'e ze'eg kwehe arer hemimume'u kwer ài nehe.
— Iker haw iaikwera'i. A'e rupi a'e awa nupuner kwaw u'aw haw rehe hehe.
Izewànaw ipixika'i a'e. A'e rupi nupuner kwaw uzepykaw rehe ipupe, i'i a'e ze'eg.
21 Na'e Tupàn Tuweharupi Wiko Ma'e upu'àm putar a'e nehe, ywytyr Perazi her ma'e rehe upu'àm awer zàwe a'e nehe.
Wikwahy putar nehe, ywyàpyznaw Zimeàw her ma'e rehe ukwahy awer zàwe nehe no.
Uzapo putar wemiapo putar haw nehe.
Teko nukwaw kwaw hemiapo ràm a'e wà.
Uzapo putar uma'ereko haw nehe no.
— Màràzàwe tuwen aipo pa, i'i putar teko ima'ereko haw hexak mehe wà nehe no.
22 A'e rupi pepytu'u pepuka re nehe.
Aze mo nan, kyhàhàmtàtà pezeàpixipixi haw uzemumikahy wera'u putar nehe.
Ta'e ainu Zanezar Tupàn Tuweharupi Wiko Ma'e ize'eg mehe ihe xe.
— Pemumaw ko ywy paw nehe, i'i a'e.
Tupàn ima'ekwaw paw
23 Peinu heze'eg àwàm nehe. Pezekaiw heremimume'u ràm rehe nehe. 24 Ywy imuàgà'ym mehe ma'e itym 'ym mehe we awa numumaw kwaw u'ar paw ywy heruwaruwak pà a'e. Uhàwykàz. Uma'ema'e ywy no. 25 Na'e umuhym no. Na'e utym ma'eà'yz enero her ma'e. Utym ma'eà'yz kumin her ma'e no. Utym arozràn xirik her ma'e, arozràn xewar her ma'e no. Amo ae arozràn utym watym àwàm ikatu ma'e rehe no. 26 Uzapokatu ma'e paw a'e, ta'e Tupàn umu'e ikatu ma'e iapo haw rehe a'e xe. 27 Enero ipo'o re, kumin ipo'o re numuhem kar kwaw iapirer ita ipuhuz ma'e pupe. Umuhem kar ita ipuhuz 'ym ma'e pupe, pixika'i ma'e pupe. 28 Arozràn inupànupà mehe nunupàahy kwaw. Nuzukazuka kwaw arozràn. Ukwaw itahu iapu'a ma'e heruwakaw haryw rehe aroz ràn ihaihaw 'ym pà. 29 Tupàn Tuweharupi Wiko Ma'e Ikàg Wera'u Ma'e ukwaw kar nezewe haw iapo haw izupe. Tupàn hemiapo putar àwàm ikatuahy. Ukwaw katu wyzài ma'e iapo haw.