29
Uze'eg Zeruzarez rehe a'e
1 Pepuhareko Zeruzarez Tupàn pe imonokatu pyrer nehe.
Kwehe mehe tuwihawete Tawi uzapo weko haw a'e pe.
Pemumaw amo kwarahy
mynykaw Tupàn imuwete haw iapo pà nehe.
2 A'e re Tupàn uzepyk putar a'e tawhu Tupàn pe imonokatu pyrer her ma'e rehe nehe.
A'e pe har uzai'o putar wà nehe. Uzemumikahy putar wà nehe no.
Tawhu nuzawy kwaw Tupàn henataromo ma'ea'yr hapy haw tuwykwer tetea'u rehe har nehe.
3 Tupàn omono kar putar zauxiapekwer tetea'u tawhu pe wà nehe, iàmàtyry'ym kar pà wanupe wà nehe.
A'e zauxiapekwer a'e wà, tawhu pe har wàmàtyry'ymar a'e wà, umàmàn putar tawhu izywyr wà nehe.
Uzapo putar pàrirogaw rehe uzeupir àwàm wà nehe. Uzeupir putar hehe tawhu pupe wixe pà wà nehe.
4 Weityk putar tàpuz paw wà nehe.
A'e pe har u'ar putar ywy rehe upyta pà wà nehe.
Uze'eg putar tekwe ài wà nehe.
Hewowo putar wà nehe. Uze'eg putar imuhemahy 'ym pà tekwe ài wà nehe no.
5-6 Na'arewahy tàrityka'i
Tupàn Tuweharupi Wiko Ma'e Ikàg Wera'u Ma'e uzàmàtyry'ym putar wàmàtyry'ymar oho a'e wà nehe kury. Ni amo nuàro kwaw tur àwàm wà nehe.
Zauxiapekwer amo ae ywy rehe arer romo wanekon wà.
Wànoànog putar nehe. Ywy uryryryryz putar nehe no. Wànoànogahy putar nehe.
Ur putar ywytuaiw nehe. Àmànuhu ukyr putar nehe no. Tata ma'erapy har ur putar nehe no.
Umuigo kar putar wàmàtyry'ymar ywy imuku'iahy pyrer romo wà nehe.
Nuzawy kwaw ka'api'i uxinig ma'e kwer ywytu hemiraha kwer wà nehe.
7 Tupàn pe ma'ea'yr hapy haw rehe ipurumuaiw wer har wà nehe,
zauxiapekwer tawhu izywyr har paw wà nehe, pàrirogaw rehe uzeupir haw iapo har wà nehe no,
a'e paw ukàzym putar puahu haw zanewi uhemaw ài wà nehe, ma'e hexak awer ukàzym ma'e kwer ài wà nehe.
8 Teko ywy nànànar Xiàw ywytyr iàmàtyry'ymar wà nehe,
nuzawy kwaw awa ima'uhez katu ma'e umai'u haw rehe upuahu ma'e wà nehe.
Ume'e mehe ima'uhez we a'e.
Nuzawy kwaw awa iziwez katu ma'e uwi'u haw rehe upuahu ma'e wà nehe.
Ume'e mehe iziwez we a'e.
Zeruzarez pe har wamumuranu haw
9 Peiko wiwi iranaiwa'u ma'e romo nehe, aze peneko wer nehe.
Peiko wiwi hehàpyhà 'ym ma'e romo nehe, aze ikatu wera'u nezewe haw peme nehe.
Aze pei'u win pupe nehe, aze pei'u kàwiahy pupe nehe, peka'u he'o ma'e ài peata e pà nehe.
10 Ta'e Tupàn Tuweharupi Wiko Ma'e pemuger kar tuwe a'e xe.
Upyk peàkàg. Pemuzeàpumi kar a'e.
Peàkàg a'e wà, peneha a'e wà no, wiko Tupàn ze'eg imume'u har romo a'e wà.
Tupàn wexak kar zepe ma'e puahu pe har zàwenugar a'e awa wanupe a'e. Nuexak kwaw wà.
11 Ko 'ar rehe puahu pe har zàwenugar paw nuzawy kwaw ze'eg pape rehe imuapyk pyrer iwàpytym pyrer peme. Napepuner kwaw ikwaw paw rehe. Aze peraha pape amo pape kwaw par pe nehe, — Emugeta nehe, aze peze izupe nehe, — Napuner kwaw ihe, ta'e uzewàpytym pape a'e xe, i'i putar peme nehe. 12 Aze peze'eg pape kwaw par 'ym pe nehe. — Emugeta nehe, aze peze izupe nehe, — Nakwaw kwaw pape imugeta haw ihe, i'i putar peme nehe.
13 Zanezar uze'eg nezewe.
— Ko teko uze'eg ihewe uzuru pupe wà.
Umume'u hekatu haw weme pupe wà.
Wapy'a muite ihewi wà.
Teko wapurumu'e haw rupi
zo hemuwete wà.
Xo ze'eg imume'u wiwi haw zo ukwaw wà.
14 A'e rupi amupytuhegatu kar wi putar ko teko ihe wà nehe.
Azapo putar ma'e ikwaw pyr 'ym wainuinuromo nehe, azapo putar iaiw ma'e wainuinuromo nehe no.
Ukwaw katu ma'e wà. Nezewe rehe we nupuner kwaw a'e ma'e imume'u haw rehe wà nehe. Nukwaw kwaw a'e ma'e heremiapo ràm wà nehe.
Teko ma'e tetea'u rehe imu'e pyrer nukwaw kwaw a'e wà nehe no, i'i Zanezar.
15 Aze teko umim wemiapo Tupàn Tuweharupi Wiko Ma'e wi a'e wà nehe, uzepyk putar wanehe a'e nehe.
Pepuhareko ipytunahy haw rehe ikatu 'ym ma'e iapo har pe wà nehe. Uze'eg nezewe wà.
— Ni amo nupuner kwaw zanerexakaw rehe wà. Ni amo nukwaw kwaw zaneremiapo wà, i'i waiko wà.
16 Pemono ikatu 'ym ma'e ikatu ma'e hekuzaromo.
Aipo ywyzuwa ikatu wera'u ima'ema'e har zapepo iapo har wi.
Zapepo nuze'eg kwaw nezewe wapo arer pe.
— Naheapo kwaw pe ne, ni'i kwaw.
— Nerekwaw kwaw ma'e iapo haw, ni'i kwaw ywy'a wapo arer pe.
Purupyro haw imume'u haw
17 Nan kwehe tete ka'aete uzeapo putar ma'etymaw romo nehe.
Ma'etymaw uzeapo wi putar ka'a romo wiko pà nehe.
18 A'e 'ar mehe iapyha 'ym ma'e wenu putar ze'eg a'e wà nehe. Amo umugeta a'e ze'eg pape iwàpytym pyrer rehe har wà nehe, ze'eg imuapyk pyrer hexak pyr 'ym wà nehe.
Hehàpyhà 'ym ma'e uhem putar ipytunahy haw wi wà nehe. Upuner putar ma'e hexakaw rehe wà nehe.
19 Tupàn Tuweharupi Wiko Ma'e omono putar turywete haw ma'e hereko 'ymar wanupe nehe.
Tupàn Ikatuahy Ma'e Izaew wazar umurywete kar putar hemetarer 'ym ma'e a'e wà nehe.
20 Ta'e Tupàn umumaw putar wemiaihu wanehe imunar ma'e a'e wà nehe xe.
Uzuka putar uzehe uze'eg zemueteahy ma'e a'e wà nehe.
Amo teko wanupe ikatu 'ym ma'e wemiapo ràm imume'u har a'e wà nehe, ukàzym putar a'e wà nehe.
21 Tupàn umumaw putar amo rehe hemu'em ma'e wà nehe.
Umumaw putar tuwihaw wanupe hemu'em ma'e wà nehe no.
Aze amo hemu'em amo rehe tuwihaw henataromo nehe, aze a'e rupi tuwihaw omono kar amo ikatu 'ym ma'e iapo 'ymar zemunehew paw pe nehe, Tupàn uzepyk putar a'e hemu'em ma'e rehe nehe.
22 Tupàn Tuweharupi Wiko Ma'e, upyro Àmàrààw ikatu 'ymaw wi imàno haw wi a'e. Uze'eg iko teko Izaew izuapyapyr wanehe kury.
— Heremiaihu nuzemumikahy wi kwaw wà nehe.
Na'imaranugar pixik kwaw wà nehe.
23 Wexak putar heremiapo ràm wamyter pe àràm wà nehe.
Hexak mehe umume'u putar herer ikatu haw wà nehe.
— Ereiko Tupàn Ikatuahy Ma'e Izaew wazar romo ne, i'i putar ihewe wà nehe.
Ukyze putar ihewi hemuwete katu pà nehe.
24 Na'e iranaiwa'u ma'e wiko putar ma'e kwaw katu har romo wà nehe.
Heàmàtyry'ym arer
weruzar putar hepurumu'e haw wà nehe no, i'i Tupàn uzeupe.