30
Zuta wanuwihawete wenoz upytywà àwàm Ezit ywy rehe har wanupe
1 Tupàn Tuweharupi Wiko Ma'e uze'eg nezewe.
— Pepuhareko hera'yr heàmàtyry'ymar pe wà nehe, herazyr heàmàtyry'ymar pe wà nehe no.
Nuze'eg kwaw ihewe ma'e iapo 'ym mehe wà.
Uzapokatu uze'egaw amo wanehe we herehe upuranu 'ym pà wà.
A'e ma'e iapo mehe omono'ono'og wemiapo kwer ikatu 'ym ma'e wanereko amo wemiapo kwer ikatu 'ym ma'e i'aromo wà.
2 Zuta wanuwihaw oho Ezit ywy rehe har wanupe
upytywà àwàm henoz pà wà.
Nupuranu kwaw herehe oho 'ym mehe wà.
Uzeruzar wakàgaw rehe upyro àwàm rehe wà.
3 Nur kwaw wapytywà àràm wà nehe. Ur putar xo wamuzemumikahy kar àràm nehe.
Naheta kwaw wapyro àràm nehe. Heta putar wakàgaw i'ok àràm nehe.
4 Zuta wanuwihaw waze'eg heraha har uhem oho Ezit rehe wà.
Uhem tawhu Zuwà pe wà. Uhem tawhu An pe wà no.
5 Nezewe rehe we imaranugar putar wà nehe,
ta'e Ezit ywy rehe har nupytywà pixik kwaw wà nehe.
Ezit ywy rehe har umumaranugar kar putar wà nehe. Wiko putar ikàg 'ym ma'e ài wà nehe, i'i Tupàn.
6 Na'aw Tupàn ze'eg zàwàruhu iriàw zàwenugar kwarahy ihemaw awyze har kutyr har wanehe har xe kury.
— Ze'eg heraha har wahaw ywy ikatu 'ym ma'e oho waiko wà. Zawaiw katu waho haw wanupe.
Heta zàwàruhu iriàw a'e pe wà, moz wà no, mozuhu uwewe ma'e wà no.
Ze'eg heraha har weraha ma'e Ezit wanuwihawete pe imono pyràm wanereko zumen waku'az wà, kawaru kupewa'a waku'az wà no.
Weraha a'e ma'e waiko amo teko wanupe wà.
A'e teko nupuner kwaw wapytywà haw rehe wà nehe.
7 Ezit nupytywà pixik kwaw wà nehe.
A'e rupi amono ko her Ezit wanupe ihe kury.
— Mozuhu Ipuruzukaiw 'Ym Ma'e, a'e wanupe, i'i Tupàn.
8 Tupàn Tuweharupi Wiko Ma'e uze'eg wi ihewe.
— Emuapyk ko ze'eg ywyrapew rehe nehe.
Nezewe mehe ni amo numunàn kwaw nehe.
Amume'u putar heze'eg upaw pixik 'ym ma'e ràm teko wakutyr har newe kury.
9 Wiko Tupàn heruzar 'ymar romo wà. Hemu'em ma'e romo wanekon wà.
Na'ipurenu wer kwaw Tupàn Tuweharupi Wiko Ma'e ize'eg rehe wà.
10 Pexak zo uzeapo ma'e ràm nehe, i'i ma'e teko wanemigwaw 'ym hexakar wanupe wà.
— Pemume'u zo ze'eg azeharomoete har urewe nehe:
i'i Tupàn ze'eg imume'u har wanupe wà.
— Pemume'u wyzài ma'e uremurywete kar pà nehe: i'i wanupe wà.
11 — Peho xe wi urewi ty wà, i'i ahyahy wanupe wà. Pepytu'u ureputupyk ire kury ty wà.
Pepytu'u Tupàn Ikatuahy Ma'e Izaew wazar rehe peze'eg ire kury, i'i wanupe wà.
12 A'e rupi Tupàn Ikatuahy Ma'e Izaew wazar uze'eg nezewe wemiaihu wanupe.
— Naperuzar kwaw heze'eg.
Pezeruzar puruzuka haw rehe. Pezeruzar temu'emaw rehe.
13 A'e penemiapo kwer werur putar pemuaiw pàwàm peme nehe.
Aze pàrirogawaiha ikwaikwar oho iko a'e,
na'arewahy u'ar putar ywy rehe a'e.
14 Aze ywy'a uzeka, xo ipegegwer zo upyta.
Nezewegatete apumumaw kar putar azeharomoete ihe nehe.
Ni pitài ywy'a ipehegwera'i na'ikatu kwaw
tàtàpyzgwer tata wi henuhemaw romo.
Teko nupuner kwaw 'y henuhemaw rehe ytyzuzàmaw wi ipehegwer pupe wà, i'i Tupàn.
15 Tupàn Tuweharupi Wiko Ma'e Zanezar a'e, Izaew wazar a'e, uze'eg nezewe wemiaihu wanupe a'e kury.
— Aze pezewyr ihewe nehe, aze peàrogatu heremiapo ràm nehe, apupyro putar ihe nehe.
Peàrogatu heremiapo ràm herehe pezeruzar pà nehe.
A'e mehe amono putar peàmàtyry'ymar waneityk àwàm peme nehe.
Napepurapo wer kwaw heremiapo putar haw rehe.
16 Peze'eg nezewe ihewe.
— Nan. Uruzeupir putar oroho kawaru iàkwen ma'e waku'az nehe.
Nezewe uruhem putar ureàmàtyry'ymar wanuwi nehe. Na'urepyhyk kwaw wà nehe, peze.
Pezàwehem nehe, aze pepuner nehe.
Kawaru peàmàtyry'ymar waneimaw uzànete wera'u peneimaw wanuwi wà.
17 Peàmàtyry'ym mehe xo pitài peàmàtyry'ymar zo umuzàwehem kar putar 1000 zauxiapekwer penehe we har wà nehe.
5 peàmàtyry'ymar pemuzàwehem kar putar paw rupi a'e wà nehe.
Xo màràn penehe we arer zo upyta putar wà nehe.
Upyta ma'e nuzawy kwaw pànuhu tuwihaw her hereko har i'yw ywytyr apyr har wà nehe, i'i Tupàn.
Tupàn omono uze'egatu wemiaihu wanupe
18 Tupàn Tuweharupi Wiko Ma'e penàro iko a'e, ta'e ipurapo wer ikatu ma'e rehe peme xe. Pepuhareko a'e, ta'e ikatu ma'e iapo har romo hekon a'e xe. Hehe uzeruzar ma'e hurywete wà. 19 Teko Zeruzarez pe har wà, Xiàw rehe har wà, pepytu'u putar pezai'o re nehe. Penoz putar pepytywà àwàm nehe. Tupàn Tuweharupi Wiko Ma'e pepuhareko putar nehe. Wenu putar peze'eg nehe. Pepytywà putar nehe. 20 Pemuahy kar putar nehe. Upuraraw kar putar ma'erahy peme nehe no. Nezewe rehe we nuzeàmim kwaw pewi nehe. Pemu'e har romo hekon. Hehe pepurexak wer mehe pexak putar nehe. 21 Aze pehem penape wi nehe, aze peawyze har kutyr peho nehe, aze peahur kutyr peho nehe, peinu putar Tupàn penaikweromo ize'eg mehe nehe. — Na'aw pe ikatu ma'e xe. Peata hupi nehe, i'i putar peme nehe. 22 Pepyhyk putar tupàn a'ua'u itaxig parat pupe iapeao pyrer pe wà nehe, wanagapaw itazu or pape zàwenugar pupe iwàiwàn pyrer pe wà nehe no. Na'e peityk putar iaiw ma'e ài pe wà nehe. — Peho muite xe wi kury, peze putar wanupe nehe.
23 Ma'eà'yz peko pe imuhàmuhàz mehe Tupàn Tuweharupi Wiko Ma'e umugyr kar putar àmàn nehe. Pepo'o putar temi'u tetea'u nehe. Heta tetea'u putar ka'api'i tapi'ak wanupe nehe. 24 Tapi'ak awa ywy heruwaruwakaw heraha har a'e wà, zumen a'e wà no, xo temi'u ikatuahy ma'e xa inuinuromo har u'u putar wà nehe. 25 Amo 'ar mehe pezuka putar peàmàtyry'ymar pe wà nehe. Peityk putar wanàpuztàtà wamumaw pà wà nehe. A'e 'ar mehe 'y uwyryk putar ywytyr nànàn ywytyruhu nànàn wà nehe. 26 Tupàn umukatu wemiaihu wamuahy kar awer nehe. Umuke'e putar wemiaihu waperew wemiapo kwer nehe no. A'e 'ar mehe zahy uhyape katu putar kwarahy ài nehe. Kwarahy uhyape katu wera'u 7 haw uhyape haw kwehe arer wi nehe. Pitài 'ar rehe ihyape katu haw nuzawy kwaw 7 'ar rehe ihyape katu awer nehe.
Tupàn uzepyk Axir ywy rehe har wanehe
27 Peme'e kury. Tupàn Tuweharupi Wiko Ma'e ur putar muite wi a'e nehe.
A'e ae ur putar nehe.
Wikwahy putar ur mehe tàtàxiner tetea'u ywàkun romo iapo pyrer pupe nehe.
Tynehem putar wekwahy haw pupe uze'eg mehe nehe.
Ize'eg nuzawy kwaw tata ma'erapy haw.
28 Tupàn Tuweharupi Wiko Ma'e ipurupy haw nuzawy kwaw 'y tyhu haw a'e.
Uhem teko wa'az pe.
Teko weityk arozràn iapirer wà.
Nezewegatete Tupàn Tuweharupi Wiko Ma'e weityk putar teko ikatu 'ym ma'e arozràn iapirer ài a'e wà nehe.
Teko omono wamupytu'u kar haw kawaru wazuru pupe wà. Nezewegatete Tupàn omono putar wamupytu'u kar haw zàwenugar teko wazuru pupe nehe no.
Nezewe mehe weraha pe ikatu 'ym ma'e rupi wà.
29 Pe zo napeiko kwaw wazàwe nehe.
Pezegar putar penurywete haw rupi nehe.
Pemuzàg agwer zegar haw mynykaw Tupàn imuwete haw iapo mehe pyhaw.
Teko ywytyr imonokatu pyrer rehe uzeupir ma'e hurywete Tupàn Tuweharupi Wiko Ma'e Izaew wapyro har ikàg ma'e imuwete katu haw pe oho mehe wà.
Amo upy uxi'àm wazeupir mehe wà.
Penurywete putar wazàwe nehe no.
30 Teko paw wenu putar Tupàn Tuweharupi Wiko Ma'e ize'eg ikatuahy ma'e.
Wexak kar putar wekwahy haw ipuruzukaiw ma'e wanupe nehe.
Heta putar tata hakuahy ma'e wenataromo har paw hapy har nehe. Heta putar 'y ywy ipykar nehe no.
Ywytu ur putar àmàn inuromo nehe. Ita tetea'u ukyr putar àmàn ài nehe.
Upir putar uzywa ikàg ma'e teko wanehe uzepyk pà nehe.
31 Axir ywy rehe har ukyze tete wera'u putar tuwe Tupàn Tuweharupi Wiko Ma'e ize'eg henu mehe wà nehe,
izepykaw hexak mehe wà nehe.
32 Tupàn Tuweharupi Wiko Ma'e umupu kar putar ma'e imupu pyr nehe. Umupu kar putar wioràwiràn nehe no.
Na'e unupànupà putar Axir uwyra pupe nehe.
A'e ae uzàmàtyry'ym putar oho wà nehe.
33 Kwehe mehe Tupàn umuàgà'ym tatahu.
Wapy putar Axir wanuwihawete ipupe a'e nehe.
A'e tatahu ywykwaruhu iànàm ma'e ohoete ma'e pupe hin.
Uhyk zepe'aw ukaz ma'e ràm.
Tupàn Tuweharupi Wiko Ma'e ipytuhemaw a'e, nuzawy kwaw ywyku'i exopere her ma'e ukaz ma'e uwyryk ma'e a'e.
Umunyk putar tata zepe'aw rehe nehe.