40
Yusuf kasi tau dua orang bui pung mimpi pung arti
1-3 Di itu bui, ju ada dua orang yang parná jadi kapala urusan di raja Masir pung ruma jabatan. Yang satu, urus raja pung minum. Yang satu lai, urus raja pung roti. Dong dua ada bekin tasala sang raja. Andia ko raja mara, sampe dia kasi maso sang dong pi dalam bui. Jadi dong dua tenga satu tampa deng Yusuf.
4 Ais, itu kapala bui parenta sang Yusuf ko urus itu dua pagawe. Dong tenga di situ sampe satu-dua taon.
5 Satu malam, itu dua pagawe mimpi. Satu-satu deng dia pung mimpi sandiri-sandiri. Deng itu mimpi dong pung arti ju laen-laen.
6 Dia pung beso, Yusuf datang, dapa lia dong dua muka susa.
7 Ju dia tanya sang dong, bilang, “Akurang ko ini hari, bosong pung muka tar enak bagitu?”
8 Ju dong manyao, bilang, “Tadi malam botong ada mimpi, ma botong sonde tau dia pung arti.”
Ais Yusuf omong, bilang, “Sonde ada satu manusia yang tau mimpi-mimpi pung arti, cuma Tuhan Allah sa. Coba bosong carita dolo. Nanti beta cari tau dia pung arti dong dari Tuhan.”
9 Ais itu, orang yang urus raja pung minum, carita bilang, “Bagini. Dalam beta pung mimpi, beta dapa lia satu pohon anggor,
10 bacabang tiga. Itu pohon langsung badaon, babunga, deng baboa barangke-rangke sampe masa.
11 Ais beta lia, beta ada pegang raja pung galás minum. Ju beta ame itu anggor pung bua ko parés pi dalam raja pung galás. Ais itu, beta sorong kasi sang raja ko minum.”
12 Dengar bagitu, ju Yusuf kasi tau, bilang, “Bapa. Itu mimpi pung arti bagini: itu cabang tiga tu, dia pung arti tiga hari.
13 Dalam tiga hari ini, nanti raja kasi kaluar sang bapa dari ini bui. Ais dia angka kambali sang bapa, ko urus ulang dia pung minum sama ke dolu.
14 Kalo bapa pung nasib su bae bagitu na, jang lupa sang beta ó! Kalo bapa sayang sang beta na, tolong kasi tau sang raja, ko dia ju kasi kaluar sang beta dari ini tampa dolo.
15 Ko kalo mau iko dia pung batúl, dong ame paksa sang beta dari orang Ibrani dong pung kampong. Di sini, ju beta sonde bekin jahat apa-apa. Ma tau-tau, te dong su kasi maso sang beta di bui, sama ke beta ni, orang jahat sa.”
16 Dengar ame itu mimpi pung arti yang bagus bagitu, ju itu orang yang urus roti carita sang Yusuf, bilang, “Adi é. Beta ju mimpi bagini: beta ada su'u bakul tiga susun.
17 Di bakul paling atas, ada isi raja pung kue macam-macam. Ma burung-burung dong datang ko makan bekin abis itu kue dong dari atas beta pung kapala.”
18 Dengar bagitu, ju Yusuf manyao, bilang, “Bapa pung mimpi pung arti bagini: Itu bakul tiga tu, dia pung arti ju tiga hari.
19 Dalam tempo tiga hari ni, nanti raja suru orang datang potong buang bapa pung kapala. Ais dong gantong bapa pung badan di tiang. Ju burung-burung dong datang makan bekin abis bapa pung daging.”
20 Lewat tiga hari, pas deng raja pung hari jadi, ju dia bekin pesta bésar kasi dia pung pagawe samua. Dia parenta ko dong pi kasi kaluar itu dua pagawe dari bui.
21 Ais itu, dia angka kambali itu pagawe yang urus raja pung minum, pi dia pung pangkat yang dolu, ko dia urus ulang raja pung minum.
22 Ma itu pagawe yang urus raja pung roti tu, dong gantong bekin mati sang dia, parsís ke Yusuf pung omong.
23 Ma itu pagawe yang urus minum tu, sonde inga lai sang Yusuf. Dia lupa buang sang dia.