Home All Languages

Ua Puupuu Lava Le Taimi

O Feau E 6 Mo Le Ekalesia

Gospel Go  Passion of the Christ    The Jesus Film
8 Itula I Le Lagi Translators Needed !

O Feau E 6 Mo Le Ekalesia
Faamalologa Matautia ma le Valaaulia mai le Lagi

By Pastor Brani Duyon
Translated by Heather Tuigamala
PDF   DOC   [English/Main]

UPU TOMUA

Sick in HospitalPastor Brani DuyonI le masina o Me 2006, na aveina ai se tasi o auauna a le Atua, i le lagi ma feiloai ai ma Iesu. E iai ni feau taua se ono sa finagalo le Alii e momoli mai e lea auauna i le lalolagi. O le suafa o lenei auauna o Brani Duyon i Efendie. Ua 52 nei tausaga o lona soifua, ma o ia o se tasi o tagata nuu o Dusun. Sa avea o ia ma toeaina o le ekalesia i Borneo Evangelic, Kota Belud, Sabah i le itu i sasae o Meleisia. Sa ia galue foi faafaifeau i Melangkap Baru, Kota Belud i Meleisia lava mo sina taimi ma avea ma taitai o le ekalesia i SIB Bayatat i le tausaga 2005 2006.

I le aso 21 o Aperila 2006, na ma o ai ma le tina o le aiga i le itu i Sisifo o Meleisia i le faaipoipoga a se tasi o le fanau, ole ma tama tama matua. Ina ua uma le vaiaso muamua sa ma iai, sa faafuasei ona ou maua i se mai (stroke). Sa faanatinati atu loa au i le falemai o le Iunivesite o Malaya. Na suesueina au e le fomai ma iloa ai ua sao le toto i lou faiai, ma ua manaomia vave ai lava le faia o sou taotoga. Sa ou malolo mo sina vaiaso ina ua uma lea taotoga, ma tuuina loa au i totonu ole ICU mo le masina e tasi.

Pastor Brani Duyon FamilyI lea taimi sa ou iai ile falemai, e toatele nisi o auauna a le Atua sa latou asia, ma faia ni talosaga mo au. O nisi o i latou o le Perestene o le SIB Sabah, o Taipin Melidoi ma lona sui o Datuk Arun Selutan, faatasi ai ma le failautusi o Michael. E iai se vaitaimi sa ou miti ai i se miti faapea, Sa matua toulu mai le mamafa o timuga i ou luga. Sa ou faaliliuina lenei miti i uso a auauna sa o latou asia au ma faia ni talosaga ina ia toe faafoi mai lou malosi. E viia ai la le Atua, ona o le mana o lana faamalologa ua mafai ai ona vave ona toe maua le malosi.

O le vaiaso lona 3 o Me i le 2006, i le leva o le po, sa ese se lagona na oo ia te au. Sa le i mafai ona ou moe, ao le taimi lea ua leva ona malolo (momoe) nisi o mai o lo o matou iai faatasi. I lea lava taimi, e leai ma se tasi mea o taulai iai lou mafaufau, ua na o Iesu lava o lo o ou mafaufau iai. Sa ou manatuaina le upu o le Afioga Paia a le Atua i le Isaia 43:46 Ia faamanatu mai ia te au, ia ta fefaamasinoai, tau mai ia oe, ina ia tauamiotonuina ai oe. Sa ou mafaufau pea i lenei fuaiupu o le Afioga Paia a le Atua, ona pau lava lou mafaufau i lea taimi ua na o Iesu. Sa ou matua lagonaina le Agaga o le Atua i lea taimi.

Na amata ona ou tatalo i le Agaga ma mafuta atu pea lou agaga i le Atua. Ina ua maea lea, sa ou taumafai e fai sina malologa, peitai sa le mafai ona ou moe. Na ou faalagolago lea i tua o lou moega, ae faafuasei ona ou faalogoina se tasi o pai mai i lou tua ma faasolo mai i lou ulu. E umi se taimi o milimili e le tagata au, ma na ou faalogoina se mea uiga ese pei e sosolo i lou tino. E foliga nei gaioiga o lo o faia e le tagata ia te au, o se galuega e faia e se tama alofa i sona atalii. Sa ou manatunatu po o ai lea tagata o lo o ia faia lenei galuega alofa ia te au ao ou iai i mafatiaga o lou tino. Ina ua ou faliu atu iai, sa faateia au ina ua ou vaaia se tama talavou aulelei tele. O se tagata tino lelei ma maualuga, ma lona lauulu uumi e gata i luga ane o ona tauau, ma sa ia ofuina se ofu paepae. Sa ou faapea atu loa iai, O oe o le Alii lea o lo o ou mafaufau iai?. Sa na ona lulu mai o lona ulu e leai. Sa ou toe faapea atu iai, Afai e leai, o ai la oe? Sa ia talanoa mai loa ia te au ma faapea mai, O au o le ave feau mai le lagi, na faatonuina au e Iesu ou te sau e momoli mai se tala lelei ia te oe.

O le taimi lava lea, sa ou iloaina ai loa, o le agelu a le Atua. Sa ou faapea atu iai, O le a le tala lelei o lo o e fia tau mai? Sa ia tali mai faapea, O le po nei, o le a e alu ai i le lagi. E ui lava i se lagona mai sa iai, ae na faafuasei ona ou lagonaina le malu ma le filemu o lou tino.

I lea lava taimi ou te le i toe lagonaina se tiga, ae ua matua faaatoatoaina lou malosi, ina ua faapea mai le agelu o maua o le a o i le lagi. Sa ou faapea atu i le agelu, Ua ou sauni e mulimuli atu ia oe, ua ota fia vaai lava i lou Alii.

Ina ua ma savavali atu o le a o, sa ou vaaia lou tino faale lalolagi nei, o taoto pea i le moega. A o ma savali mai i fafo i le falemai, o se vaaiga sa ou ofo ai. O le solofanua tele ma le maualuga o lo o tu atu i fafo. Na faapea mai le agelu ia te au, O le solofanua lea o le a ta o ai i le lagi. Na aapa mai le agelu ma fesoasoani mai ia te au, ao ou taumafai e oso i luga. Sa ou faapea atu iai, E mafai ona ta o i le lagi i lenei solofanua? Na faapea mai o ia ia te au, Ioe, aua e te fefe ma popole. Sa e faitau i le tala ia Elia lea na aveina ae i le lagi e le Atua? Sa ou faapea atu iai, Ioe, sa ou faitau ai muamua o le auala lena na alu ai, o le kariota afi e tosoina e solofanua. Sa toe faapea mai o ia ia te au, E sao lelei oe, o le tasi la o solofanua na, lea o le a ta tietie ai.

I le taimi na amata ai ona ma o, sa telegese, ae ina ua pe tusa o le selau mita talu ona ma o ese atu, sa ou faalogoina pei e foliga i se afa o lo o taia ai i maua, i le saoasaoa tele lea ua ma iai. Sa ou vaaia ua lele le solofanua. Sa leai se mea e faalavelaveina ai lo ma sopoia atu o atumauga, ona o lo o matou felelei ma le mana o le Atua.

E le i umi ona ma o, ae taunuu loa i se tasi o malae tele lava, ua matagofie mai le lanu lauava o le mutia, e leai mase foliga mago e vaaia ai.

Salamo 23:2 Na te ave au i le mea e iai le vao mua ou te taoto ai, na te taitai ia te au i tafatafa o vai e tafe lemu.

Na taofi e le agelu le solofanua, ma o ma tulioso loa i lalo ma savavali. Ao agai atu le ma savaliga sa ou vaaia le Maota o le Atua i o ma luma. Sa ou faalogoina se logo o ta mai, ona ou fesili lea i le agelu, O le a lea logo e ta mai? Na ia faapea mai, O le logo lea e faailoa atu ai, ua iai se tagata ua taunuu mai.

Sa o ma savavali atu pea seia o ma taunuu atu i le isi itu o le malae, ae o lo o tatagi pea le logo. Sa ou vaaia se fale matagofie lava, e iai se moli mumu i ona luga pei o moli o le auala. I luga o lea moli sa ou vaaia ai le numera 51. Sa ou fesili loa i le agelu po o le a le uiga o lea fuainumera 51. Na tali mai o ia e faapea, Ua fia nei ou tausaga? I le taimi lea ua 51 ou tausaga. Na faapea mai le agelu, O le numera lena o ou tausaga, o le numera foi lena o lou fale. Sa ou lagonaina le fiafia ma le filemu ole Atua ona o se fale matagofie ua ia saunia mo au i le lagi. Sa ou vaaia le tele o fale ua saunia e le Alii mo lana fanau o e talitonu ma mulimuli ia te Ia.

Na faaauau atu pea le ma savaliga, seia o ma taunuu atu i se tasi o fale tele lava. Sa ou vaaia le toatele o tagata i totonu o lea fale, ma sa ou iloa ai o tagata paia uma ia na filifili e le Atua. I le taimi atoa na iai, pau le mea sa ou vaaia i nei tagata, o lo o latou alalaga ma vivii i le Atua. Sa ou vaaia Iesu o lo o nofo i lona nofoalii ao vivii ma tapuai atu iai nei tagata. O lo o vivii nei tagata ma o latou loto atoatoa, sisiva, sisii o latou lima ma faapauu i o latou tulivae i luma o le Alii. I lea taimi ia te au, na ou iloa ai, e matua fiafia le finagalo o le Atua pe afai e silasila mai, o lo o tapuai atu faapea lana fanau o i le lalolagi ia te Ia.

Sa ou vaaia le toatele o tagata e fetagisi ao latou vivii atu i le Atua. Na ou vaaia foliga fiafia o Iesu ao silasila atu o Ia i le tuuina atu atoatoa o loto o nei tagata e tapuai ai ia te Ia. Na sisii i luga o latou lima ia Iesu, ae faamanuia mai iai le Alii mo latou. Ina ua maea nei viiviiga o lo o faia e tagata paia i le lagi, na ou vaaia Iesu ua savali mai i nei tagata ma Ia soloi esea o latou loimata. Sa ou manatua vave i lea taimi, le fuaiupu o le Afioga Paia a le Atua i le Faaaliga o le a le toe iai se oti, le toe iai ni faanoanoaga, tiga ma loimata maligi i le lagi ua saunia e lo tatou Alii mo lana fanau.

Ina ua ma o atu i totonu ma le agelu e feiloai ma le Alii o Iesu. Na faapea atu le agelu ia Iesu, Le Alii, o le atalii lenei na e filifilia e sau iinei. Na faapea mai Iesu ia te au, Lou atalii, ua lelei ua e oo mai i le aso lenei. Na aapa mai o Ia ma fusi ia te au. Na maligi ou loimata ona o se lagona fiafia aemaise o lona filemu sa ou lagonaina i lea taimi. O lou loto i lea taimi, sa matua faagaeetia ma osooso i le olioli, ina ua feiloai mai lo tatou Alii o Iesu, ma ia fusi atu ia te au.

Na faapea mai loa le agelu i le Alii, Le Alii e, sa ou alu i lona fale i le lalolagi ina ua mai, e ui i lea o lau Afio e sili lou silafia. Na tali mai Iesu faapea, Ioe, sa ou faalogo ma ou iloa atu le mea sa tupu ia te ia. Na toe faapea mai le agelu, I le taimi lea ao mai o ia, sa ou faalogoina si ona toalua o tatalo mo se fesoasoani mo ia, ae i lana tatalo sa ia faapea, Le Alii e, ia e fesoasoani mai ia i matou, faamolemole aua e te aveeseina si ou toalua mai matou, ona matou te le o sauni e tuua e ia i matou i lenei taimi, o lana tatalo lena le Alii. Na toe faapea mai Iesu, Sa ou iloaina mea uma lava, o lona toalua o se tina e matau i le Atua. O ia o se tina e faatuatua ma tuuina atoatoa mai lona loto e tatalo mai ai ia te au. I lena lava taimi na ou faalogo atu ai i upu o lo o fetalai ai le Alii ma le agelu, na maligi loimata o lou agaga ona o lou mafaufau isi ou toalua ma le malosi o lona faatuatua i le Atua.

Na fetalai mai le Alii ia te au i lea lava taimi, Lou atalii, o le a e toe foi atu i le lalolagi, ona e le i oo i le taimi e te sau ai iinei. E tele se galuega o le a e toe foi atu e fai, ma o le a e matua pisi lava e auauna mai ia te au. Sa ou tali atu i le Alii ma faapea atu, Faamolemole le Alii e, aua lava e te fetalai mai ou te toe foi, ua matua ou lagonaina le fiafia ma le filemu ina ua ta faatasi, faamolemole ou te le toe fia foi i lalo i le lalolagi. Sa ou vaaia foliga le fiafia o le Alii ia te au, ma ou toe faatoga atu ia te Ia, ina ia faamagalo mai au, ona ua ou iloa ua ou faatiga i lona finagalo. Na ou faapea atu loa i le Alii, Le Alii e, ua ou sauni ou te toe foi i le lalolagi, ae faamolemole fesoasoani mai ia te au, aumai lou malosi, ma ia e leoleo ma puipui au i so o se mea ou te iai. Ia ta faatasi ma oe le Alii e.

Na tali mai o Ia ia te au, Ioe aua ete popole, o fea lava e te alu iai e te auauna mai ai ia te au, o le a ou faatasi pea ma oe. I le taimi lava lea ua sauni foi ma le agelu e toe momoli au i le lalolagi.

Ao ma sauni e foi mai, na taofi au e Iesu ona e iai ni feau o lo o ia finagalo ou te sau e tau mai i le lalolagi. O lo o ia finagalo ou te tauina mai nei feau i lana fanau. Na faapea mai lea o Iesu ia te au, O nei feau o le a e alu ma oe, o ni feau taua tele e tatau ona latou iloa. Na toe faapea mai o Ia, o le a ou matua pisi lava i le momoliga o nei feau i tagata. I le ma lea, na ia toe fetalai mai e finagalo o Ia ina ia ou faamatalaina le tulaga na tupu ia te au i lana fanau i le lalolagi, ina ia faamanuiaina ai foi i latou, ma faamalosia ai pea e mulimuli ia te Ia.

Na toe faapea mai o Ia, A e toe foi i le lalolagi, ou te manao e te faailoa atu i lau fanau feau nei. E 6 ni feau na finagalo o Ia ou te sau ma faailoa mai.

MUAMUA

Tau atu i lau fanau, e tatau ona latou talitonu mai ia te au ma o latou loto atoatoa, o lo latou malosi ma o latou manatu atoa. O i latou o e maua i le loto popole ma le le talitonu e le mafai ona latou ulufale mai iinei.

LUA

Tau atu i lau fanau, e tatau ona latou maua le agaga o le faatuatua e o ai i le lotu i taimi o sauniga, ona o le taimi lea e susulu atu ai lou malamalama i o latou luga, ma o latou sailia ai foi au. E lagona lou fiafia tele pe a ou vaai atu i lau fanau o lo o latou tapuai mai ia te au i le taimi o sauniga.

TOLU

E tatau ona latou tatalo mai ma le faatuatua, ma faia mea uma o lo o ou fai atu ai, ma ia savavali e tusa o lau UPU.

FA

Tau atu i lau fanau, e tatau ona latou usitai e lafo le sefuluai ma le taulaga. Ao fetalai mai Iesu i lea feau, na ia toe faapea mai ia te au, Lou atalii e, vaai atu i le itu le la i o. Na ia faaali mai ia te au ni fale mananaia ma le matagofie ua uma ona saunia mo lana fanau. Lou atalii e, o fale ia ua maea ona saunia mo lau fanau o e talitonu ma usitai mai ia te au. Na ia toe faaali mai ia te au nisi o fale e le i maea ona saunia. Na ou faapea atu lea ia te Ia, Le Alii e, aisea ua le maea ai nei fale? Na tali mai le Alii ma faapea mai, Lou atalii e, o fale nei mo lau fanau latou te le o matua foaiina le sefuluai ma le taulaga. O le a maea na saunia lelei pe afai o le a matua foai mai e lau fanau le taulaga ma le sefuluai.

 

LIMA

Tau atu i lau fanau,e tatau ona latou tatalo mai ma ofoina mai le tamaoaiga o lo o latou maua ia te au, aua le puipuiga o i latou faatasi ai ma faamanuiaga e foaiina atu mo i latou ao latou iai i le lalolagi. Pe a oo i le aso ou te alu atu ai faalua, o le a latou le toe mauaina lea tamaoaiga i le lalolagi. Ia manatua le tala i le ava a Lota.

ONO

Tau atu i lau fanau, e tatau ona latou tapena ma sauni, aua ua lata le aso ou te alu atu ai. O le a vave ona ou alu atu, nai lo manatu o tagata o lo o iai i le lalolagi. (O le afio mai o le Alii e leiloa e se tasi, peitai o le siitiaga ua tatou mautinoa ma malamalama e iai le taimi o le a faataunuu ai le finagalo o le Atua. Ua lata le afio mai ole Alii!!!)

Ina ua faailoa mai e Iesu le feau lona ono e momoli i le lalolagi. Na ia faaali mai loa ia te au se faaaliga i le lagi ua mama atoa, ua aunoa ma se ao e toe vaaia. Na ou vaaia le Alii ua faaloaloa atu ona aao i le lalolagi ma faapea lana fetalaiga, Ua ou sauni e siitia lau fanau, Sa ou vaaia le tele o tagata i o latou ofu papae talaloa o o ane i le lagi ma feiloai ma Iesu. Na latou faapotopoto i le itu taumatau ma le itu tauagavale o le Alii. O i latou uma lava sa talitonu ia Iesu sa siitia. O le toatele o aiga sa ou vaaia ua siitia ae i le lagi. O se vaaiga manaia i lou vaai atu i nisi o aiga, i le tama ma le tina ma le fanau, o o ane faatasi ia Iesu. Sa ou lagonaina le filemu i lea taimi ao vaai atu i lea vaaiga manaia i tagata o siitia ane i le lagi.

Na faapea mai lea o le Alii ia te au, Vaai i lalo. Na ia faaali mai ia te au le vaaiga o le a iai le lalolagi i le taimi lava lea i se mea vaai faamaneta. Ina ua ou vaai ifo i lalo i le lalolagi, o se vaaiga matuai fememeai o tagata. Ua leai se filemu i lea taimi. Na ou vaaia tagata o taufetuli solo i so o se mea ao nisi o fanau talavou o lo o saili o latou matua. Na toe faaali mai e Iesu ia te au se tasi o ekalesia i totonu o le aai o lo o ou nofo ai. Na matua ou lagona le faanoanoa ina ua ou vaaia nisi o tagata e le o siitia i le siitiaga.

Na faapea mai le Alii ia te au, Ia e faatuatua mai ia te au, aua e tatau ona e faailoa atu nei mea uma lava ua e vaai ma faalogo ai i lau fanau o i le lalolagi.

Ina ua maea ona fetalai mai Iesu ia te au, ona toe ave lea o au e le agelu i le lalolagi i le solofanua lava lea e tasi na ma o ai i le lagi. Na vave ona ma taunuu, ma toe ave au e le agelu i le falemai. Ao ou tilotilo atu i lou tino faalelalolagi i luga o le moega, na ou iloaina le toe foi atu iai o lou agaga.

Pastor Brani Duyon FamilyIna ua ou iloa ua ou toe foi i lou tino faalelalolagi, sa ou maitauina ai ua matua faaatoatoaina lou malosi mai mafatiaga sa ma feagai. Viia le Alii! Ona o lona mana faamalolo ma lona faatasi mai.

Ou te manatuaina ao ou iai i le lagi, ou te le i foliga i lou matua sa iai i lea taimi o le 51 o ou tausaga, peitai sa ou pei o se tama talavou.

O lau molimau lea i le ma feiloaiga ma lo tatou Alii o Iesu Keriso i le lagi.