1 O Yooba, Merere tiam, zom biibi ta swe ma irao toono kek.

Mi mburom ma mbulu ku ndabokŋana ramaki azuŋka ku, ta ilol saamba ma imap.

2 Nu ur zin naŋgaŋ munmun mi pikin siŋsiŋŋan be tiwit urum mi tiswe mburom.

Naso pumun kom koi bizin kwon,

mi kam zin wal zorzooroŋan ma tiur nin. ✡ Mt 21:16

3 Nio sombe motoŋ sala pa saamba mi aŋre la pa nomom muriini—

puulu ma pitik ta munŋaana men ta ur zin ma tirao murinmurin, ✡ Un 1:14+; Mbo 19:1+

4 na aŋso ta kembei: “Wai! Niam tomtom toono koyam na, koroŋ sorok.

Parei ta nu kamam ŋgar biibi piam?

Mi motom iŋgalŋgal yam paso?” ✡ Mbo 144:3+; Ibr 2:6+

5 Mi nu ur yam irao itum ruŋgum, mi kam yam ma ambot la nu itum tamen kopom mbarmaana.

Mi pakur yam mi wit zoyam ma isala kor. ✡ Un 1:28+; 1Kor 15:27

6 Pa koroŋ boozomen ta ur zin na, nu ur mar nomoyam be amboro.

Koroŋ ta munŋaana men imap imbot la niam tomtom kopoyam mbarmaana. ✡ Un 1:28, 9:2; 2Tim 2:12; Tur 22:3+

7 Zin sipsip ma makau,

mi buzur kar kan mi su kan ta boozomen.

8 Mi man ta tirie sala maŋaanaŋana na,

mi ye ramaki koroŋ boozomen ta tiwwa pa tai leleene na.

Koroŋ ta munŋaana men tana timap timbot la niam tomtom kopoyam mbarmaana.

9 O Yooba, Merere tiam, zom biibi ta swe ma irao toono kek.