1 Muŋgu zin Israel ta Yakop popoŋana kini na, tizem Aikuptu.

Tizem zin wal ta tizzo kalŋan toro. ✡ Kam 12:41

2 Indeeŋe tana, zin Yuda tiwe wal potomŋan ki Yooba.

Zin Israel tiwe Yooba lene, mi ni ikamam peeze pizin. ✡ Kam 19:5, 24:3+

3 Indeeŋe Tai Siŋsiŋŋana ire i na, iko ma ila lene.

Mi yok Yordan ire i na, imiili ma ila, mi ipot ma imbotmbot. ✡ Kam 14:21

4 Zin abal tiseŋeeŋe mi tilulu zin kembei ta mekmek.

Mi lele mbukunbukun timorsop, mi tilulu zin kembei ta sipsip popoŋan. ✡ Kam 19:18

5 O tai, nu tina ko pa so uunu i?

Mi yok Yordan, parei ta nu miili ma la mi pot?

6 Mi niom abalabal mi lele mbukunbukun na,

keseŋeeŋe mi kululu yom paso?

7 O toono, re u kek? Pa molo som, to Yooba imar.

Iŋgi be Anutu ki Yakop iswe kat mburaana.

8 Ni ta ikam ma yok ipet pa pat mi irereere ma biibi.

Mi ikam ma yok ipet pa raŋ, mi irereere ma isu.