1 Қайта-қайта әйиплинип туруп йәнә бойни қаттиқлиқ қилған киши,

Туюқсиздин давалиғусиз янҗилар.

2 Һәққанийлар гүлләнсә, пухралири шатлинар,

Қәбиһләр һоқуқ тутса пухра налә-пәряд көтирәр.■

3 Даналиқни сөйгән оғул атисини хуш қилар;

Бирақ паһишиләргә һәмраһ болған униң мал-мүлкини бузуп-чачар.■

4 Падиша адаләт билән жутини тинич қилар;

Бирақ баҗ-селиқ салған болса, уни вәйран қилар.□

5 Өз йеқиниға хушамәт қилған киши,

Униң путлириға тор тәйярлап қойғандур.

6 Рәзил адәмниң гунайи өзигә қапқан ясап қурар;

Бирақ һәққаний киши нахшилар билән шатлинар.

7 Һәққаний киши мискинниң дәвасиға көңүл бөлүр;

Бирақ яманлар болса бу ишни чүшәнмәс.■

8 Һакавур кишиләр шәһәрни қутритип давалғутар;

Бирақ ақиланиләр аччиқ ғәзәпләрни яндурар.

9 Дана киши ахмақ билән дәвалашса,

Ахмақ һүрпийиду яки күлиду, нәтиҗиси һаман течлиқ болмас.

10 Қанхорлар пак-диянәтликләргә нәпрәтлинәр;

Дурусларниң җенини болса, улар қәстләр.□

11 Ахмақ һәрдайим ичидики һәммини ашкарә қилар;

Бирақ дана өзини бесивалар.■

12 Һөкүмдар ялған сөзләргә қулақ салса,

Униң барлиқ хизмәткарлири яман үгәнмәй қалмас.

13 Гадай билән уни әзгүчи киши бир зиминда яшар;

Һәр иккисиниң көзини нурландурғучи Пәрвәрдигардур.□ ■

14 Йоқсулларни диянәт билән сориған падишаниң болса,

Тәхти мәңгүгә мәһкәм турар.■

15 Таяқ билән тәнбиһ-несиһәт балиларға даналиқ йәткүзәр;

Бирақ өз мәйлигә қоюп берилгән бала анисини хиҗаләткә қалдурар.■

16 Яманлар гүллинип кәтсә, наһәқлик көпийәр;

Лекин һәққанийлар уларниң жиқилғинини көрәр.■

17 Оғлуңни тәрбәлисәң, у сени арам тапқузар;

У көңлүңни сөйүндүрәр.■

18 Пәрвәрдигарниң вәһийси болмиған әлниң пухралири йолдин чиқип башпанаһсиз қалар;

Лекин Тәврат-қануниға әмәл қилидиған киши бәхитликтур.□

19 Қулни сөз биләнла түзәткили болмас;

У сөзүңни чүшәнгән болсиму, етивар қилмас.

20 Ағзини басалмайдиған кишини көргәнму?

Униңдин үмүт күткәндин, ахмақтин үмүт күтүш әвзәлдур.■

21 Кимки өз қулини кичигидин тартип өз мәйлигә қоюп бәрсә,

Күнләрниң биридә униң бешиға чиқар.□

22 Териккәк киши җедәл-маҗира қозғап турар;

Асан аччиқлинидиған кишиниң гуналири көптур.■

23 Мәғрурлуқ кишини пәс қилар,

Бирақ кәмтәрлик кишини һөрмәткә ериштүрәр.■

24 Оғри билән шерик болған киши өз җениға дүшмәндур;

У сорақчиниң гува беришкә агаһландурушини аңлисиму, лекин раст гәп қилишқа петиналмас.□ ■

25 Инсан балисидин қорқуш адәмни қапқанқа чүшүриду;

Бирақ кимки Пәрвәрдигарға таянған болса, у бехәтәр көтириләр.□

26 Көп кишиләр һөкүмдардин илтипат издәп жүрәр;

Бирақ адәмниң һәқ-рисқи пәқәт Пәрвәрдигарниңла қолидидур.■

27 Наһәқләр һәққанийларға жиркиничликтур;

Дурус йолда маңған кишиләр яманларға жиркиничликтур.

■29:2 Пәнд. 11:10; 28:12,28

■29:3 Пәнд. 10:1; 15:20; 28:7; Луқа 15:13

□29:4 «Бирақ баҗ-селиқ салған болса,...» — яки «бирақ парихор болса,..».

■29:7 Аюп 29:16

□29:10 «Дурусларниң җенини болса, улар қәстләр» — башқа бир хил тәрҗимиси: «бирақ дуруслар уларниң җенидин хәвәр алар».

■29:11 Пәнд. 14:33

□29:13 «Гадай билән уни әзгүчи киши бир зиминда яшар» — ибраний тилида: «гадай билән уни әзгүчи киши бир-биригә йолуқар».

■29:13 Пәнд. 22:2

■29:14 Пәнд. 20:28; 25:5

■29:15 Пәнд. 10:1; 13:24; 17:21,25; 22:15; 23:13

■29:16 Зәб. 36:36; 57:11-12; 90:8

■29:17 Пәнд. 13:24; 22:15; 23:13,14

□29:18 «йолдин чиқип башпанаһсиз қалар» — бу ибарә ибраний тилида икки бислиқ бир сөз биләнла ипадиләнгән.

■29:20 Пәнд. 26:12

□29:21 «Күнләрниң биридә униң бешиға чиқар» — башқа бир хил тәрҗимиси «Ахирда у (қул) өзигә пәрзәнттәк болуп чиқар».

■29:22 Пәнд. 15:18; 26:21

■29:23 Аюп 22:29; Пәнд. 15:33; 18:12; Йәш. 66:2; Мат. 23:12; Луқа 14:11; 18:14; Яқ. 4:6,10; 1Пет. 5:5

□29:24 «...раст гәп қилишқа петиналмас» — «Лав.» 5:1ни көрүң.

■29:24 Лав. 5:1

□29:25 «бехәтәр көтириләр» — ибраний тилида бир сөз биләнла ипадилиниду.

■29:26 Пәнд. 19:6