1 Ko dešupandžto berš oti e carosiri e Tiberijasiri vladavina, ked o Pontije Pilat vladinđa ani Judeja, o Irod vladinđa ani Galileja, i o Filip, lesoro phral, vladinđa ani Itureja hem ani Trahonitsko regija, o Lisanije vladinđa ani Avilina, 2 zako baro sveštenstvo e Anasoro hem e Kajafasoro, o lafi e Devlesoro alo e Zaharijasere čhavese e Jovanese ko čučo than (pustinja). 3 I ov đelo ano sa o kravo e jordanesoro te propovedini o krstiba e kajibnasoro zako oprostiba o greja. 4 Sar soi pisime ko lil (knjiga) oto lafija e prorokosere e Isaijasere: “O glaso so vičini ko čučo than: Pripravinen o drom e Devlikanesoro (Gospodesoro), poravninen o droma Olesere! 5 Đijekh dolina nek pherđol, đijekh gora hem brego nek tikorinen; i soi bango nek ispravini pe, i o hrapava droma nek oven glatka; 6 i đijekh manuš ka dikhel e Devlesoro spasenje.” 7 I onda ov vaćerđa butenđe kola iklistile te krstini len: “Čhave e sapengere! Ko mothovđa tumenđe te našen oti xoli savi avela? 8 Bijanena, znači, plodovja dostojna zako kajiba! I ma len te vaćeren ana tumende: 'Isi amen dad o Avraam.' Jer phenava tumenđe da o Devel i akale barendar šaj te vazdel čhaven e Avraamese. 9 A o toveri, ače, pašljardo ko koreno e kaštengoro. I đijekh kaš kova na bijani šukar bijandipe (rod) čhinela pe i frdela pe ki jag.” 10 A o narodo pučlja le: “So onda valjani te ćera?” 11 Ov irinđa lenđe: “Kas isi duj fostanja, nek del okolese kas nane, hem kas isi xamnase, nek ćerel isto ađahar.” 12 Ale i o carinici te krstinen pe, i phende lese: “Učitelju (Učitelju), so amen te ćera?” 13 A ov phenđa lenđe: “Ma čeden buderi adalestar soi tumenđe phendo.” 14 I o vojnici da pučle ole: “A so amen te ćera?” A ov phenđa lenđe: “Ma mothoven zoralipe (sila) nikase, ma vazden hovavne optužbe, hem oven zadovoljna tumara plataja.” 15 A o narodo inele ano adžićeriba hem razmislinde ana pumende oto Jovane nane li ov o Hrist. 16 O Jovan sarijenđe irinđa: “Me krstinava tumen e panjeja; ali avela o po zoralo mandar, kase na injum dostojno o pertle oti obuća te phravav - Ov ka krstini tumen e Sveto Duhoja hem e jagaja. 17 O ašovi lese ano vas te kosel (čistini) o gumno plo, i te čedel o điv pese ano magacin, a o pus ka tharel e jagaja savi našti mudarđol. 18 I kroz o but avera stvarija vaćerđa e narodose o evanđelje. 19 A o Irod o vladari inele ukorime olestar zbog i Irodijada, lesere phralesiri romni, hem zbog sa o bišukar stvarija so ćerđa. 20 Uzalo sa, ov ćerđa i akava: phandlja e Jovane ko phandlipe. 21 Ked sa o narodo inele krstime, i o Isus ine krstinđa pe. I dok molisalo, phravdilo o nebo, 22 i o Sveto Duho hulilo upro leste ani e truposiri (telosiri) forma sar golubi, i o glaso odupral alo: “Tu injan mlo Čhavo o volime! Ana tutei mli milina!” 23 I o Isus počinđa ked inole đi o trijanda berša. Inele, sar so smatrinđape, čhavo e Josifesoro, kovai čhavo e Ilijasoro, 24 e Matatesoro, e Levijesoro, e Melhijesoro, e Janaijesoro, e Josifesoro, 25 e Matatijesoro, e Amosesoro, e Naumesoro, e Eslijasoro, e Nangajesoro, 26 e Maatesoro, e Matatijesoro, e Semejesoro, e Josekesoro, e Jodasoro, 27 e Joananesoro, e Risasoro, e Zorovavelesoro, e Salatielesoro, e Nirijasoro, 28 e Melhijasoro, e Adijesoro, e Kosamesoro, e Elmadamesoro, e Iresoro, 29 e Isusesoro, e Eliezeresoro, e Jorimesoro, e Matatesoro, e Levijesoro, 30 e Simeonesoro, e Judasoro, e Josifesoro, e Jonamesoro, e Eliakimesoro, 31 e Meleasoro, e Menasoro, e Matatasoro, e Natanesoro, e Davidesoro, 32 e Jesejesoro, e Jovidesoro, e Vozesoro, e Salahesoro, e Nasonesoro, 33 e Aminadavesoro, e Adminesoro, e Arniesoro, e Esromesoro, e Faresesoro, e Judasoro, 34 e Jakovesoro, i Isakesoro, e Avraamesoro, e Tarasoro, e Nahoresoro, 35 e Seruhesoro, e Ragavesoro, e Falekesoro, e Everesoro, e Salahesoro, 36 e Kainamesoro, e Arfaksadesoro, e Simesoro, e Nojasoro, e Lamehesoro, 37 e Matusalahesoro, e Enohesoro, e Jaredesoro, e Maleleilesoro, e Kainamesoro, 38 e Enosesoro, e Sitesoro, e Adamesoro, e Devlesoro.