Luka Luka 7

E kapetanesiri zorali vera

(Mt 8,5–13; Jn 4,43–54)

1 A ked o Isus završinđa plo vaćeriba anglo narodo, đerdinđa ki diz Kafarnaum. 2 A jekhe rimljanengere kapetane* inele kandino kova inele namborme, anglo meriba, a ceninđa le. 3 I ked o kapetani šunđa e Isusese,† bičhalđa koro leste e jevrejconengere šerutnen‡ te pučel le ako šaj te avel te sasljari lesere kandine.

4 A ked ale koro Isus, šukar zamolinde le vaćerindoj: “Ov zaslužini te ćere lese adava 5 adalese so mangela amare narodo, hem ov ćerđa amenđe sinagoga.”

6 I o Isus đelo olencar. A ked inele paše uzalo čher, o kapetani bičhalđa lese ple amalen vaćerindoj: “Gospode, ma mučin tut, adalese so na injum dostojno te đerdine talo mlo krov.§ 7 Adalese na dikhljum man dostojno te avav đi tute. Ali vaćer jekh lafi i mlo manglo kandino ka ovel sasto. 8 Adalese so i me injum manuš talo autoritet, hem man isi vojnici teleder mande. I jekhese vaćerava: 'Dža!' - i ov džala. A dujtonese vaćerava: 'Ava!' - i ov avela. A mle kandinese vaćerava: 'Ćer adava!' - i ov ćerela.”*

9 A o Isus ked šunđa adava olestar, iznenadinđa pe, irinđa pe koro narodo kova dželo palo leste hem phenđa lenđe: “Vaćerava tumenđe, na arakhljum ni jekhe Jevrejco ano Izrael te ovel le esavki vera.”†

10 I ked okola kola inele bičhalde irinde pe čhere, arakhle e kandine saste.

O Isus vazdela taro mule e udovicakere čhave

11 Na but palo adava, o Isus đelo ki diz savi vičime Nain.‡ Oleja da džele lesere učenici hem pherdo narodo. 12 A ked alo paše uzalo udar e dizjakoro, tegani o dizutne akharde e mule, jekhoro čhavo oti daj koja inele udovica. A pherdo narodo oti diz džana ine olaja te parunen e čhave.

13 I ked dikhlja ola o Gospod, sažalinđa pe upro late i phenđa laće: “Ma rov!” 14 I alo paše hem dolinđa pe upro nosilja. Tegani okola so akharde terdine, a o Isus phenđa: “Terneja, tuće vaćerava, ušti!” 15 I o mulo beštino hem lelja te vaćeri, i o Isus dinđa le lesere dajaće.

16 Tegani i dar prelelja sarijen i slavinde e Devle vaćerindoj: “Baro proroko vazdinđa pe maškar amende!” hem: “O Devel alo te pomožini ple narodose!”§

17 I adava šundilo ko sa o thana e judejakere hem ko sa o pašutne thana.

O Isus Mesija, a o Jovan phravđa lese o drom

(Mt 11,2–11)

18 I sa adava e Jovanese* vaćerde lesere učenici. Tegani o Jovan vičinđa kora peste disave dujen ple učenikonendar 19 i bičhalđa len koro Gospod vaćerindoj: “Tu li injan adava kolese o Devel dinđa plo lafi da valjani te avel il te adžićera avere?”†

20 I adala manuša avindoj đi leste phende: “O Jovan o Krstitelj bičhalđa amen đi tute vaćerindoj: 'Tu li injan adava kolese o Devel dinđa plo lafi da valjani te avel il te adžićera avere?'”

21 Baš ko adava sati o Isus sasljarđa buten oto nambormipa, oto pharipa hem oto bišukar duhija, i bute kororenđe dinđa dikhipe.

22 Tegani o Isus phenđa e Jovanesere učenikonenđe: “Džan i vaćeren e Jovanese so dikhljen hem so šunđen: o korore dikhena, o bange phirena, o gubavci čistinena pe, o kašuke šunena, o mule uštena, okolenđe soi ani potreba vaćeri pe o Šukar haberi.‡ 23 I bahtaloi okova kova nane sablaznime zbog mande.”

24 Ked e Jovanesere bičhalde manuša đele, o Isus lelja te vaćeri e narodose e Jovanestar: “So ikliljen ki pustinja te dikhen? I trska sava phudela i barval? Na! 25 Ili so ikliljen te dikhen? E manuše ano barvale šeja hurjavde? Na! Okola ano sjajna šeja hem so dživdinena ano luskuz, eče tane ko palate. 26 Ili so ikliljen te dikhen? Proroko? Oja, vaćerava tumenđe, i pobut oto proroko! 27 Ovi okova kolestar o Devel phenđa ano Sveto Lil:

'Ače, bičhalava me glasniko angla tute, kova ka pripremini će o drom angla tute.'

28 Vaćerava tumenđe: maškar okolende kolai bijande nijekh nane pobaro e Jovanestar, a o najtikoro e Devlese ano carstvo pobaroi olestar.§

O Isus sikaj da o manuša valjanena te prihvatinin ole hem e Jovane

(Mt 11,12–19)

29 I sa o manuša hem o carinici kola šunde adava, pendžarde dai e Devlesoro sikajba čačikano. Oni adala so krstinde pe e Jovanesere krstibnaja. 30 A o fariseja hem o učitelja e Mojsijasere zakonestar na mangle te len o plan e Devlesoro pumenđe. Oni adala so na mangle o Jovan te krstini len.

31 O Isus phenđa: “Kasa akana te uporedinav e manušen soi akana dživde? Kasei slična? 32 Sličnai e manušenđe* kola bešena ko drom hem vaćerena jekh averese:

'Bašalđam tumenđe veselo,† a na čhelđen!

Đilabđam tužno, a na runđen!'

33 Ađahar, alo o Jovan Krstitelj. Ni na xalja maro ni na pilja mol, a phenena: 'O demoni ano leste!' 34 Alo o Čhavo e Manušesoro.‡ Xala hem pijela, a phenena: 'Eče manuš xalano hem mato, amal e carinikonengoro hem e grešnikonegoro!' 35 Ali i mudrost e Devlesiri mothovđa pe dai čačipe sa lakere čhavorendar.”§

O Isus šaj te oprostini o greja

(Mt 26,6–13; Mk 14,3–9; Jn 12,1–8)

36 Disavo farisej palo anav Simon vičinđa e Isuse te avel te xal koro leste. Ov đerdinđa e farisejese ko čher i čhivđa pe uzalo astali.* 37 I eče, adari ali i džuvli kolaće džanđa pe dai grešnica ani diz, adalese so šunđa da o Isus inele uzalo astali e farisejese ko čher, i anđa† skupo miris ko alabasterno‡ čaro. 38 I terdindoj palo lesere pre, runđa i lelja te sampaćeri lesere pre ple asvencar hem koslja len ple balencar. I tegani čumudinđa lesere pre hem makhlja len e miriseja.

39 Ked adava dikhlja o fariseji kova vičinđa le, phenđa ana peste: “Ked bi akava manuš ovela proroko, džanela bi koi hem savi akaja džuvli koja pipini le,§ adalese soi grešnica.”

40 A o Isus phenđa lese: “Simone, isi man diso te vaćerav će.” A ov phenđa: “Učitelju, vaćer!”

41 “Duj džene inele dužnici disave manušese kova dela love ko zajam. Jekh alo lese panšel e rimljanengere denarija,* a o dujto pinda. 42 Adalese so na ine len te irinen, ov oprostinđa o dugo sodujenđe. Adalese, ko olendar pobut ka mangel le?”

43 O Simon irinđa: “Mislinava da okova kase oprostinđa pobut.” Tegani ov phenđa lese: “Oja, šukar mislinđan.”

44 Irinđa pe premali džuvli, i phenđa e Simonese: “Dikheja li akala džuvlja? Đerdinđum tuće ano čher, pani me prenđe na dinđan,† a oj sampaćerđa me pre ple asvencar hem koslja len ple balencar. 45 Na čumundinđan man ni jekhvar, a oj, sar đerdinđum na ačhavđa te čumudini me pre.‡ 46 Na makhljan mo šero e uljea, a oj makhlja me pre e miriseja. § 47 Adalese phenava tuće: “But manglipe mothovđa, adalese so oprostimei laće but greja; a xari manglipe mothoj okova kolesei oprostime xari greja.” 48 A olaće phenđa: “Oprostimei te greja.”

49 A okola kolai uzalo astali lelje ana peste te vaćeren: “Kovai akava so šaj i o greja te oprostini?”

50 Tegani ov vaćerđa e džuvljaće: “Ti vera spasinđa tut! Đa ano mir!”

Luka
<
7
>

*7,2 kapetani - manuš kova naredini upro šel vojnici.

†7,3 O kapetani šunđa sar o Isus sasljarđa bute manušen, hem dai ov palem paše, da irinđa pe ano Kafarnaum.

‡7,3 O Isus Jevrejco, a o kapetani nane, adalese o kapetani mislinđa da o Isus angleder ka ćerel nešto e Jevrejconenđe ako zamolinena le. Ko but slučajevija o Jevrejci hem e rimesere vojnici inele neprijatelja.

§7,6 O Jevrejci na đerdinena ine ko čher savo nane e jevrejconengoro te na bi ovena, pali olengiri vera, melale anglo Devel.

*7,8 Sar so e kapetane isi autoritet te naredini e vojnikonenđe, ađahar e Isuse isi autoritet te naredini e nambormipase te cidel pe.

†7,9 O Isus očekujinđa e jevrejconendar te ovel len esavki vera, ali olen na ine. Ov na očekujinđa e biedevlengerendar te ovel len esavki vera, a eče, akale manuše ine.

‡7,11 Akavai paše uzalo than kote o proroko o Jelisej vazdinđa taro mule e dajakere jekhore čhave angleder but berša (dikh ki 2. Thag 4,8-37).

§7,16 O manuša verovatno mislinde da o Isus inele baro proroko sar o Ilija ili o Jelisej. Samo adala duj manuša vazdinde nekas taro mule (1. Thag 17,17-24; 2. Thag 4,18-37).

*7,18 O Jovan o Krstitelj inele ko phandlipe.

†7,19 O Jevrejci očekujinde da o Mesija ka ovel caro kova ka avel hem ka spasini len tari e rimesiri vlast. Na očekujinde te ovel samo Spasitelji ano duho. O Jovan pendžarđa o proročanstvija e Mesijastar sar so o Is 42,7; 61,1–2 (dikh hem ano Lk 4,18–19). Ađahar očekujinđa o Isus te ovel caro, te šaj e Jovane hem avere pravednone manušen phravel/oslobodini taro phandlipe, hem te sudini hem te kaznini e manušen kola na prihvatinde e Mesija (dikh e Jovanesoro vaćeriba ano Lk 3,9, 16–17), ali ništa adalestar pana na ulo.

‡7,22 Sa adava so ćerđa o Isus mothoj dai ov o Mesija, sar so o proroko Isaija angleder vaćerđa anoIs 29,18–19; 35,5–6; 61,1–2.

7,27 Mal 3,1

§7,28 Duhovno terđojiba e manušengoro ano carstvo e Develesoroi pobaro oto duhovno terđojiba e manušengoro so dživdinde angleder so ine čherdo o carstvo.

*7,32 manušenđe Ano originali čhavore

†7,32 Bašalđam ... veselo Ano originali Bašalđam ... flauta

‡7,34 O Isus korkoro pes vičini Čhavo e Manušesoro

§7,35 O Isus akala izrekaja mangela te vaćeri da o manuša valjanđe te prihvatinen e Isuse hem e Jovane.

*7,36 Bio je običaj na gozbi poput ove večere da bi muškarci jeli dok leže udobno oko stola.

†7,37 Ko adava vreme inele o adeti da okola kola na inele vičime ki večera šaj te aven te dikhenfse bizo te xan.

‡7,37 O alabasteri kovlo, parno bar. O manuša ine garavena o skupa stvarija ano alabasterna khore.

§7,39 pipini le O Simon mislinđa da ako adaja džuvli pipini e Isuse, o Isus ka ovel andral nečisto. Adalese mislinđa da o Isus nane proroko.

*7,41 e rimljanengere denarija Jekh e rimljanengoro denari ćerela jekh dnevnica.

†7,44 O adeti savo o čherutno valjanđa te ćerel inele te anel pani hem kotor savencar bi thovela hem kosela ple gostonengere pre save inele melale oto prašnjava dromija.

‡7,45 I džuvli čumudinđa e Isusesere pre umesto lesere čhamnja sar znako zako baro pokajiba hem poniziba.

§7,46 Akava inele adeti zako adžićeriba e cenime gosto. I džuvli but dinđa čast e Isusese adaleja so ađahar ćerđa. Oj mothovđa poniznost adaleja so makhlja lesere pre umesto lesoro šero. O Isus nastavini te uporedini e Simonesoro bišukar adžićeriba e gostonen e džuvljakere ćerimnaja.

DRAFT VERSION