8
O džuvlja kola sledinde e Isuse
1 Palo adava o Isus đelo oto than ko than i propovedinđa o Šukar haberi oto carstvo e Devlesoro; oleja da džele hem o dešuduj apostolja 2 hem disave džuvlja kola inele sasljarde oto bišukar duhija hem oto nambormipa: i Marija (vičimi Magdalena kolatar ikalđa efta demonen); 3 i Jovana (i romni e Irodesere upravnikosiri, e Huzesiri); i Suzana hem but avera. Adale džuvljengere lovencar kandle pe o Isus hem lesere učenici.
O Isus vaćeri oto seme hem oti phuv
(Mt 13,1–23; Mk 4,1–20)
4 Ked čedinđa pe baro narodo oto sa o dizja uzalo Isus, ov vaćerđa ani paramiz: 5 “Iklistilo o sijači te frdel o seme ki njiva. I dok sijinđa, disave pele ko drom, inele gazime hem o čiriklja xalje len. 6 Avera pele ko bar, barile i šućile adalese so na inolen pani. 7 I avera pele maškaro kare, o kare barile olencar hem tasavde len. 8 I avera pele ki šukar phuv, barile hem bijande bijandipe šel puti pobut.” Ked vaćerđa adava, vičinđa: “Phraven tumare kana te šunen!”
O šukar bijandipe anena okola so ićerena e Devlesoro lafi
(Mt 13,10–17; Mk 4,10–12)
9 Tegani lesere učenici pučle le so vaćeri adaja paramiz.
10 A ov phenđa: “O Devel tumenđe dinđa te džanen o garavdipa* garavdipa značini 'tajne'oto lesoro carstvo, a averenđe vaćeri pe ano paramizja, sar so terđola ano Sveto lil:
'anglo jaćha korore
hem anglo kana kašuke.'† original: te na dikhen dikhindoj hem te na xaljoven šundindoj. Is 6,9
11 A akava i paramiz vaćeri: O semei sar o lafi e Devlesoro. 12 Disave manušai sar o semenija save pele ko drom. On šunena o lafi, ali avela o beng i lela o lafi lengere vilendar te na poverujinen hem te na oven spasime. 13 A disave manušai sar o semenija save pele ko bar. On šunena o lafi, lena le radosno, ali oni sar luluđa save nanolen koreno. Kola disavo vreme verujinena, a zako vreme oto kušiba perena. 14 A disave manušai sar o semenija save pele maškaro kare. Oni adala kola šunde, ali dživdinena ano brige, ano barvalipe hem ano dživdimnasoro šukaripe, i ovena tasavde hem na anena šukar bijandipe. 15 A disave manušai sar o semenija save pele ki šukar phuv. Oni adala kola e šukare hem e bimelale vileja šunena o lafi, ićerena le sa đikote na anena šukar bijandipe.”
Kova šunela e Isusesoro sikajba ka barjol lesoro duhovno džandipe
(Mk 4,21–25)
16 “Niko na tharela i memeli i te ućhari la e čareja ili te čhivel la talo than e pašljojbnasoro, nego čhivela la e memeljaće ko than te šaj okola so đerdinena dikhen o svetlo. 17 Adalese so sa soi garavdo ka dičhol; sa soi garavdipe ka šunđol. 18 Adalese pazinen sar šunena. Jer kas isi lese ka del pe,‡ kas isi lese ka del pe Šukar dičhola oto kontekst da o Isus vaćeri oto xaljojba hem oto verujiba. Akava značini: “Đijekhe kole isi xaljojba, ka del pe lese pobut xaljojba” ili “O Devel ka ćerel okolenđe so verujinena o čačipe te xaljoven pobut.” a kas nane, i adava so mislini da isi le, olestar ka lel pe.”§ so mislini da isi le, olestar ka lel pe Akava značini: “Ali đijekh kas nane xaljojba, ka našali i okova xaljojba so ov mislini da isi le” ili: “Ali o Devel ka ćerel okolenđe so na verujinena o čačipe te na xaljoven ni okova xari so on mislinena da xaljovena.”
E Isusesiri čačikani porodicai okola so ićerena e Devlesoro lafi
(Mt 12,46–50; Mk 3,31–35)
19 A e Isusesiri daj hem lesere phralja avena ine nakoro leste, ali oto but narodo našti ine te aven đi oleste. 20 A neko phenđa lese: “Ti daj hem te phralja terđona avrijal i mangena te dikhen tut.” 21 A o Isus phenđa: “Akalai mli daj hem mle phralja - kola šunena hem ćerena o lafi e Devlesoro.”
O Isus ačhaj i zorali barval upreder o jezero
(Mt 8,23–27; Mk 4,35–41)
22 I jekh dive o Isus phenđa ple učenikonenđe: “Te nakha ki aver strana oto jezero!” I đerdinde ano čamco hem pođinde. 23 A sar ine plovinena, o Isus zasuća. I muklja pe i zorali barval upro jezero. O čamco lelja te perđol pani i arakhle pe ani opasnost. 24 I o učenici ale uzalo Isus i vazdinde le vičindoj: “Gospodarona, Gospodarona, meraja!” I o Isus uštino, naredinđa e barvaljaće hem e talasenđe, i prestaninde hem ulo mir. 25 Tegani phenđa e učenikonenđe: “Kaj tumari vera ana mande?” A on darandile hem začudime pučle jekh avre: “Kova šaj te ovel akava so naredini e barvaljenđe hem e panjese, a on šunena le?”
O Isus ikali bute melale duhonen e manušestar
(Mt 8,28–34; Mk 5,1–20)
26 I resle ki phuv e gerasakiri savi prekal o jezero e Galilejakoro. 27 A ked o Isus iklilo ki phuv, reslja le disavo manuš oti diz ano koleste inele demonja. Sa edobor vreme inele nango hem na beštino ano čher, nego maškaro grobija. 28 I ked dikhlja e Isuse, vičinđa, pelo anglo leste hem oto sa o glaso phenđa: “So mangeja mandar, Isuse, Čhaveja e Devlesereja e Najbaresreja? Molinava tut, ma mučin man!” 29 (Adalese so o Isus već naredinđa e melale duhose te ikljol adale manušestar. Angleder, čak i ked o stražarija ine pazinena le hem phandena le ko sinđirija hem ko okovija, o manuš ine phagela len hem o demoni ine legari le ko čuče thana.) 30 A o Isus pučlja le: “Sar to anav?” I ov phenđa: “Legija* Legija e rimljanengiri vojničko grupa ani savi inele đi ko šov hiljade vojnici. (but džene injam)”, adalese so but demonja đerdinde ano leste. 31 I molinde le te na bičhali len ano bezdan.† bezdan Phandlipe zako demonja
32 A adari ki gora inele krdo bale save xana, i o melale duhija molinde e Isuse te mukel len te đerdinen ano bale. I ov muklja len. 33 Tegani o demonja iklindoj oto manuš, đerdinde ano bale. I o krdo bale jurinde oto brego ano jezero i taslile.
34 I ked dikhle o čuvarja so ulo, našle hem razglasinde ani diz hem ano gava. 35 Tegani o manuša ale te dikhen so ulo. Ale đi o Isus i arakhle e manuše, kolestar iklistile o demonja, sar hurjavdo hem saste gođaja bešela uzalo e Isusesere pre, i darandile. 36 A okola so dikhle adava so ulo, vaćerde averenđe sar o Isus sasljarđa e manuše ano koleste inele o demonja. 37 I sa o narodo oto kravo e gerasakoro zamolinde e Isuse te đalfse olendar adalese so uklinđa len bari dar. Tegani o Isus đerdinđa ano čamco sar te irini pe palal. 38 A o manuš, kolestar o Isus ikalđa e demonen, molinđa e Isuse te džal oleja, ali o Isus bičhalđa le vaćerindoj: 39 “Irin tut te čhereste i vaćer sa so ćerđa će o Devel.” I o manuš dželo maškari sa i diz hem vaćerđa so ćerđa lese o Isus.
O Isus sasljari e džuvlja hem vazdela taro mule e čhajorja
(Mt 9,18–26; Mk 5,22–43)
40 A ked o Isus irinđa pe prekal o jezero, but manuša inele radosna so dikhle le so avela, adalese so sare ine adžićerena le. 41 I dikh, alo o manuš kasoro anav Jair, kova inele upravniko ani sinagoga. I perindoj ko kočija anglo pre e Isusesere, phenđa: “Molinava tut, ava maje ano čher.” 42 Adalese so e Jairesiri jekhori čhaj, kola ine dešuduj berš, inele anglo meriba.
I sar ine džala o Isus palo Jair, o narodo bucini pe uzalo leste. 43 A maškaro narodo inele jekh džuvli kolatar dešuduj berš thavdinđa rat. Oj sa plo barvalipe dinđa e doktorenđe i nijekh našti ine te sasljari la. 44 Nakhini oto palal e Isusese hem dolinđa pe upro lesere fostanesoro teluno kotor i otojekhvar ačhilo te thavdel latar o rat. 45 I o Isus pučlja: “Ko dolinđa pe upra mande?” A ked đijekh olendar phende: “Na injum me”, o Petar phenđa: “Gospodarona, sar te džana ked pherdo džene bucinena pe uzala tute hem čedinde pe.” 46 A o Isus phenđa: “Neko namerno dolinđa pe upra mande. Osetinđum sar ikljola mandar o zoralipe te sasljari nekas.” 47 A i džuvli dikhlja so našti te garaj pe, ali darandoj i peli anglo leste i vaćerđa anglo sa o manuša sose dolinđa pe upro leste hem sar otojekhvar saslili. 48 A o Isus phenđa laće: “Mli čhaj, ti vera spasinđa tut. Dža ano mir!”
49 Sar o Isus ine vaćeri adava e džuvljaće, disavo oto čher e Jairesoro e sinagogakere upravnikosoro alo i phenđa: “Jaire, ti čhaj muli. Ma mučin e učitelje!”
50 A o Isus šunđa i phenđa lese: “Ma dara! Samo verujin i oj ka ovel spasime, ka uštel!”
51 I đerdindoj ano čher e Jairesoro, o Isus na muklja nikase te đerdini oleja, sem e Petrese, e Jovanese, e Jakovese hem e čhajakere dadese hem e dajaće. 52 A sare, kola već inele ano čher, runde i žalinde e čhaja. A o Isus phenđa: “Ma roven! Adalese so oj na muli, nego sovela.”‡ O Isus džanđa dai i čhaj muli. Vaćerđa da oj sovela adalese so džanđa da sigende ka vazdel la taro mule. O Isus da o lafi 'sovela' phenđa ked vaćerđa e Lazaresere meribnastar (Jov 11,11–14), a o Lazar inele dujto manuš kole vazdinđa taro mule.
53 I on asandile lese adalese so džande so muli. 54 A o Isus dželo hem dolinđa e čhajakoro vas i vičindoj vaćerđa: “Čhajorije, ušti!” 55 I lakoro duho irinđa pe ano late, i otojekhvar uštini, a o Isus naredinđa lakere jerjese te den la te xal. 56 I lakoro jeri inele začudime, a o Isus naredinđa lenđe te na vaćeren nikase so ulo.
*8,10 garavdipa značini 'tajne'
†8,10 original: te na dikhen dikhindoj hem te na xaljoven šundindoj.
8,10 Is 6,9
‡8,18 kas isi lese ka del pe Šukar dičhola oto kontekst da o Isus vaćeri oto xaljojba hem oto verujiba. Akava značini: “Đijekhe kole isi xaljojba, ka del pe lese pobut xaljojba” ili “O Devel ka ćerel okolenđe so verujinena o čačipe te xaljoven pobut.”
§8,18 so mislini da isi le, olestar ka lel pe Akava značini: “Ali đijekh kas nane xaljojba, ka našali i okova xaljojba so ov mislini da isi le” ili: “Ali o Devel ka ćerel okolenđe so na verujinena o čačipe te na xaljoven ni okova xari so on mislinena da xaljovena.”
*8,30 Legija e rimljanengiri vojničko grupa ani savi inele đi ko šov hiljade vojnici.
†8,31 bezdan Phandlipe zako demonja
‡8,52 O Isus džanđa dai i čhaj muli. Vaćerđa da oj sovela adalese so džanđa da sigende ka vazdel la taro mule. O Isus da o lafi 'sovela' phenđa ked vaćerđa e Lazaresere meribnastar (Jov 11,11–14), a o Lazar inele dujto manuš kole vazdinđa taro mule.
DRAFT VERSION