Luka Luka 9

O Isus bičhali e apostolen te vaćeren o Evanđelje hem te sasljaren

(Mt 10,9–14; Mk 6,7–13)

1 A o Isus vičinđa e dešuduje apostolen i dinđa len zoralipe hem autoritet upro sa o demonja hem te sasljaren o nambormipa. 2 I bičhalđa len te propovedinen oto carstvo e Devlesoro hem te sasljaren e nambormen. 3 I phenđa lenđe: “Ma legaren ništa ko drom: ni štapi, ni torba dromese, ni maro, ni love, hem te na ovel aver gad. 4 Sa đikote ačhovena ki nesavi diz, bešen ano jekh čher hem ma nakhen ko aver čhera.* 5 Te na mangle tumen disave dizutne, iklindoj tari adaja diz, tresinen i prašina tumare prendar† sar znako dai kriva so na lelje o lafi e Devlesoro.”

6 I on džele taro than ko than, vaćerindoj o Šukar haberi hem sasljarindoj e nambormen ko sa o thana.

O Irod zbunime

(Mt 14,1–2; Mk 6,14–16)

7 A o Irod o vladari‡ šunđa sa so ulo i inele zbunime adalese so disave vaćerde da o Jovan o Krstitelj uštino taro mule. 8 A avera vaćerde da o proroko o Ilija mothovđa pe ki Phuv, a disave avera vaćerde da taro mule uštino disavo proroko taro purano vreme.

9 A o Irod phenđa: “Me čhinđum e Jovanesoro šero. A kovai onda akava kastar sa adava šunava?” I manglja te dikhel e Isuse.

O Isus parvari pobut oto pandž hiljade manušen pandže marencar hem duje maćhencar

(Mt 14,13–21; Mk 6,32–44; Jn 6,1–13)

10 I ked o apostolja irisale e Isuseste, vaćerde lese sa so ćerde. I o Isus legarđa len peja i cidinđa pe olencar, nakori diz vičime Vitsaida, te šaj oven korkore. 11 A o narodo šunđa adava i dželo palo lende. A o Isus dodžaćerđa len šukar, vaćerđa lenđe oto carstvo e Devlesoro hem sasljarđa e nambormen. 12 A ked lelja te perel i rat, o dešuduj apostolja nakhle đi o Isus i phende lese: “Te phena e narodose te džan ko pašutne gava hem thana kote šaj te arakhen diso xajbnase hem than sojbnase? Adalese so injam akate ko čučo than kote nane ništa xajbnase hem nane than sojbnase.”

13 A o Isus phenđa lenđe: “Den len tumen xajbnase!” A on phende: “Ali isi amen samo pandž mare hem duj maćhe. Amen li te dža te čina xajbnase zako sa akava narodo?” 14 Adari inele đi ko pandž hiljade murša.§ Tegani o Isus phenđa ple učenikonenđe, e apostolenđe: “Čhiven len te bešen ko kupe po pinda.” 15 I ćerde ađahar, čhivde sarijen te bešen. 16 O Isus lelja o pandž mare hem o duj maćhe, dikhlja naupre ko nebo, zahvalinđa e Devlese* zako mare hem zako maćhe i phaglja len. Tegani dinđa o mare hem e maćhen e učenikonende te den e narodose te xan. 17 I sare xalje sa đikote na čalile. A palo adava, dešuduj korpe čedinde pe okolestar so ačhilo oto xajba.

O Petar xaljovela dai o Isus o Hrist

(Mt 16,13–16; Mk 8,27–29)

18 A jekh dive o Isus inele korkoro ple dešuduje učenikonencar, i molinđa pe. I ked o Isus završinđa i molitva, pučlja e učenikonen: “So vaćeri o narodo, ko injum me?” 19 A on phende: “Disave manuša phenena da tu injan o Jovan o Krstitelj, a disave avera phenena da tu injan o proroko o Ilija, a palem disave avera phenena da tu injan jekh oto avera proroci taro purano vreme kova uštino taro mule.” 20 Tegani o Isus pučlja e učenikonen: “A so tumen phenena, ko injum me?” O Petar phenđa: “Tu injan o Hrist, kole o Devel bičhalđa!”

O Isus vaćeri ple meribnastar

(Mt 16,1–23; Mk 8,31–33)

21 A o Isus naredinđa e učenikonenđe te na vaćeren nikase dai ov o Hrist. 22 I phenđa: “Me, O Čhavo e Manušesoro, valjani but te patinav, na ka ovav prihvatime oto starešine, oto šerutne sveštenici hem oto o učitelja e Mojsijasere zakonestar,† o manuša ka mudaren man, ali o trito dive o Devel ka vazdel man taro mule.”

So o manuš valjani te ćerel te šaj ovel e Isusesoro učeniko

(Mt 16,24–28; Mk 8,34–9,1)

23 I o Isus vaćerđa ple učenikonenđe hem sa e narodose so inele adari: “Ko mangela te ovel mlo učeniko,‡ nek ačhaj plo dživdipe, nek lel plo krsto§ taro dive ko dive hem nek phirel pala mande. 24 Jer đijekh kova mangela plo dživdipe te arakhi, ka našali le, a ko dela plo dživdipe zbog mande, ka ovel le čačikano dživdipe. 25 Na vredini ništa e manušese i sa i phuv ked bi ovela olesiri te na lelja o dživdipe savoi čačikano.* 26 Adalese ko lađala mandar hem mle lafonendar, i me, o Čhavo e Manušesoro, ka lađav lestar ked ka irinav ki phuv ano sjaj† savo ka ovel sar o sjaj mle Dadesoro hem e svetone anđelengoro. 27 A čače vaćerava tumenđe, isi disave akalendar so terđona akate kola na ka meren đikote na dikhena o carstvo e Devlesoro.”

O Devel phenela e trine učenikonenđe dai o Isus o Pomazaniko

(Mt 17,1–13; Mk 9,2–13)

28 Ked nakhle sar ofto dive sar o Isus phenđa adava, lelja peja e Petre, e Jovane hem e Jakove i dželo ki gora te molini pe. 29 I sar ine molini pe, lesoro muj ulo averčhane hem lesere šeja ule but parne hem sjajna. 30 I dikh, nekotar ano baro sjaj iklile duj manuša, o Mojsije hem o Ilija i lelje te vaćeren e Isuseja. 31 On vaćerde e meribnastar savo adžićeri e Isuse.‡ Sigende ka ovel adava ano Jerusalim te šaj ovel ađahar sar o Devel so planirinđa. 32 A o Petar hem okola so inele oleja, zasute. Ked uštine, dikhle e Isuse ano baro sjaj hem e duje manušen sar terđona oleja. 33 I ked lelje o Mojsije hem o Ilija te ciden pe e Isusestar, o Petar phenđa e Isusese: “Gospodarona, šukari amenđe akate so injam. Te ćera trin šatorija: jekh tuće, jekh e Mojsijase hem jekh e Ilijase.” Na džanđa so vaćeri. 34 Sar ine vaćeri adava, iklilo jekh oblako savo učharđa len. A o učenici darandile ked učharđa len o oblako. 35 I šundilo glaso taro oblako savo vaćerđa: “Akavai mlo Čhavo, o Pomazime! Ole valjani te šunen! 36 I palo adava so šundilo o glaso, o učenici dikhle e Isuse korkore. I trainde, tegani nikase na vaćerde adalestar so dikhle.

O Isus ikali e bišukare duho e čhavestar

(Mt 17,14–19; Mk 9,14–29)

37 Tejsato dive, ked o Isus hem o trin učenici hulile tari gora, baro narodo alo te dikhel e Isuse. 38 I dikh, disavo manuš tari gužva lelja te vičini: “Učitelju, molinava tut te pomožine mle čhavese, adalese soi maje jekhoro! 39 O bišukar duho često napadini le i otojekhvar vrištini; frdela le ano grčevija i ikljola lestar pena taro muj; uništini le hem skoro nisar na ačhaj le. 40 I molinđum te učenikonen te ikalen e bišukare duho, ali on našti ine te ikalen le.§” 41 A o Isus phenđa: “O, biverakere hem rumime manušalen*! Sa edobor vreme injum tumencar, a palem na verujinena. Pučav man pana kobor valjani te trpinav tumen. Ana te čhave akari!” 42 I sar ine o čhavo avela đi o Isus, o bišukar duho frdinđa le ki phuv ano grčevija. A o Isus naredinđa e bišukare duhose te cidel pe e čhavorestar, sasljarđa e čhavore hem phenđa lesere dadese: “Ače to čhavo”. 43 Tegani sare inele začudime so dikhle e Devlesoro baro zoralipe.

O Isus palem vaćeri ple meribnastar

(Mt 17,22–23; Mk 9,30–32)

Sar ine sare čudinena pe zako adava so ćerđa o Isus, ov phenđa ple učenikonenđe: 44 “Šunen šukar akala lafija: Me, o Čhavo e Manušesoro, valjani te ovav predime ano vasta e bišukare manušengere.” 45 Ali o učenici na xalile so o Isus manglja te vaćeri adaleja. Adava inele olendar garavdo sar te na xaljoven le, a darandile te pučen le so adaleja manglja te vaćeri lenđe.

Ko Carstvo e Devlesoroi najbaro okova kovai ponizno

(Mt 18,1–5; Mk 9,33–37)

46 A o učenici lelje maškara pumende te raspravinen ko šaj olendar te ovel najbaro. 47 A o Isus džanđa soi lenđe ki godi†, lelja jekhe čhavore,‡ čhivđa le uzala peste 48 i phenđa lenđe: “Đijekh kova primini akale čhavore zbog maje§, man primini. A đijekh kova man primini, primini e Devle kova bičhalđa man. Kova maškara tumende pes dikhela sar najtikore, ole o Devel dikhela sar najbare.”

Kova nane protiv tumende, ovi tumencar

(Mk 9,38–40)

49 A o Jovan phenđa e Isusese: “Gospodarona, dikhljam disave manuše sar ano klo anav* ikali e demonen e manušendar. Amen o učenici na mukljam lese te ćerel adava, adalese so na džala amencar pala tute.” 50 A o Isus phenđa lese: “muken le te ćerel adava, adalese so okova kova nane protiv tumende, ovi tumencar!”

O Isus na mangela te uništini e Samarijanconen

51 A ked inele paše o dive e Isusesere te ovel vazdime ko nebo, ov zorale odlučinđa te džal ko Jerusalim. 52 I bičhalđa disave manušen angla peste. I on džele i đerdinde ko disavo gav e Samarijakoro te pripreminen le e Isusese.† 53 Ali o gavutne na mangle e Isuse adalese so džande da džala ko Jerusalim.‡ 54 A dikhindoj adava o učenici o Jakov hem o Jovan, pučle e Isuse: “Gospode, mangeja li te phena te huljel taro nebo i jag i sa te tharel len?”§ 55 A o Isus irinđa pe hem phenđa lenđe da nane šukar so ađahar mislinena*. 56 I ov hem lesere učenici džele ko aver gav.

Nane lokho te ovel pe e Isusesoro učeniko

(Mt 8,19–22)

57 I sar o učenici hem o Isus džana ine dromeja, disavo manuš alo i phenđa e Isusese: “Ka džav tuja kaj god tu džaja”.†

58 A o Isus phenđa lese: “E lisicen isi jame hem e čirikljen gnezdija, a o Čhavo e Manušesoro nane le kaj te pašljari plo šero.”‡

59 A avere manušese phenđa: “Phir pala mande!”

A ov phenđa: “Aš samo, Gospode, te parunav mle dade.”§

60 Tegani o Isus phenđa lese: “Muk o mule te parunen ple mulen,* a tu dža vaćer oto carstvo e Devlesoro.”

61 A aver manuš phenđa: “Ka phirav pala tute, Gospode, ali aš te džav te pozdravinav man mle čherutnencar.”

62 A o Isus phenđa lese: “Nijekh kova dolela pe upro plugo te orini i onda dikhela napalal,† nane prikladno zako carstvo e Devlesoro.‡”

Luka
<
9
>

*9,4 Valjani te oven zadovoljna e xajbnaja hem e thaneja sojbnase savo o čherutno dela len; na troman te roden pošukar than sojbnase. Ali, šaj te džan ko avera čhera te propovedinen o Šukar haberi.

†9,5 tresinen i prašina tumare prendar znako zako zoralo odbiba ani kultura e jevrejengiri. Adaleja mothovđa pe da na mangle ni i prašina adala dizjatar te ačhol upro lende.

‡9,7 o Irod o vladari Akate vaćeri pe oto Irod Antipa, kova inele vladari upreder jekh oto štar kotora e Izraelesere savi vičinđa pe Galileja.

§9,14 a uzalo lende inele da džuvlja hem čhavore

*9,16 zahvalinđa e Devlese ko original terđola: blagoslovinđa (o mare hem o maćhe)

†9,22 O starešine, o šerutne sveštenici hem o učitelja e Mojsijasere zakonestar zajedno predstavinde sa e Jevrejengere vođen.

‡9,23 Ko mangela te ovel mlo učeniko ko original terđola: 'Ko mangela te džal pala mande'

§9,23 O manuš so ćerđa bišukaripe kova inele osudime te merel ađahar so bi ovela kovime, ov bi akhari o upruno kaš oto krsto đi ko than kote valjani te ovel kovime. Akale vaćeribnaja, o Isus manglja te phenel: 1. Te mangaja te ova olesere učenici, valjani te ova mule zako adava so amen korkore mangaja hem zaki amari volja, hem valjani te ova spremna te ćera sa so ov phenela amenđe.2. Valjani te ova spremna te patina hem te mera zbog o Isus adalese so injam lesere učenici.3. Solduj uprune opcije.

*9,25 ko original terđola: 'So o manuš ka postignini ako prelela sa i phuv, a našali il upropastini pes?'

†9,26 sjaj - sjajno veličanstvo, slava

‡9,31 O lafi savoi akate prevodime 'ačhaj plo dživdipe ki akaja phuv', ko grčki tano 'ikljojba', so vaćeri oto značaj e Isusesere meribnastar. Ko Purano zavet ked vaćeri pe oto 'ikljojba', mislini pe upro adava so o Devel ikalđa e Izraelconen taro egipatsko ropstvo. E Hristesoroi meriba ko krsto 'ikljojba', šaj da te vaćeri pe, delo otkupljenja, saveja o Devel ikali e manušen taro e grejengoro ropstvo.

§9,40 Akava verovatno ulo angleder so o Isus hulilo ple trine učenikonencar tari gora.

*9,41 manušalen ko original terđola: 'bijandipe/generacijo'

†9,47 ki godi ko original terđola 'ko vilo'

‡9,47 lelja jekhe čhavore ko Marko 9,33 pisini da o Isus hem lesere učenici tegani inele andre ano čher. O čhavoro verovatno živinđa ano adava čher.

§9,48 zbog maje ko original terđola: 'ano mlo anav'.

*9,49 ano klo anav - ano klo autoritet.

†9,52 I Samarija inele regija/okrug maškari Galileja hem i Judeja. O Samarijanci na mangle pe e Jevrejencar.

‡9,53 O Jerusalim inele glavno than kote o Jevrejci slavinde e Devle.

§9,54 O Jakov hem o Jovan phende ađahar adalese so džande da o proroci sar o Ilija osudinde e manušen kola odbacinde e Devle (dikh ano2. Thag 1,10–12 ).

*9,55 phenđa lenđe da nane šukar so ađahar mislinena ko original terđola: 'ukorinđa len'.

†9,57 akava značini da ov manglja te ovel e Isusesoro učeniko.

‡9,58 O Isus phenđa akaja izreka sar te sikaj e manuše sari adava kedi neko lesoro učeniko. Ako adava manuš džala palo leste, možda ni adale manuše ne bi ovela le čher.

§9,59 Nane jasno da li o dad adale manušesoro mulo i ov ka džal odma te paruni le ili mangela te ačhol nesavo vreme đikote lesoro dad na merela i te šaj paruni le. Akatei poenta so adava manuš mangela te ćerel nešto angleder so ka džal palo Isus.

*9,60 O Isus na mislini čačimase o mule ka parunen avere mulen. Ked phenela “mule” adava šaj te ovel: 1) metafora zako okola kola sigende ka meren, ili 2) metafora zako okola kola na džana palo Isus hem duhovnoi mule. Akatei poenta so o učeniko nisose na tromal te mukel te ačhaj le adalestar te džal palo Isus.

†9,62 Nijekh kova ked orini, a dikhela napalal, našti te ćerel o plugo te džal adari kuri valjani. Adava manuš valjani šukar te dikhel anglal te šaj šukar te orini.

‡9,62 Đijekh manuš kova ulo e Isusesoro učeniko i tegani mangela te irini pe ko purano dživdipe, nane korisno sar sluga e Devlese ko carstvo.

DRAFT VERSION