1 I ked čedinđa pe pherdo narodo, ađahar da jekh upra avereste gazinde, Ov najangle lelja te vaćeri ple učenikonenđe (učenikonenđe): “Arakhen tumen oto farisejsko kvasco, savoj licemerje. 2 Nane ništa soi garavdo so na ka ovel arakhlo ni tajno so na ka džanel pe. 3 Adalese, sa so vaćerđen ani tomina, ka ovel šudno ano svetlo; i so šaputinđen ko sobe, ka mothoj pe ko javnost. 4 Ali phenava tumenđe, amalalen: ma daran okolendar kola mudarena o trupo (telo), a palo adava nane so pobut te ćeren. 5 A ka mothovav tumenđe kastar te daran: te daran okolestar kas palo mudariba isi zoralipe te frdel ano pakao. Oja, vaćerava tumenđe, lestar te daran! 6 Na biknena pe li pandž čirikle zako duj pare? I nijekh olendar nane bisterdo anglo Devel. 7 A tumenđei đi sa o bala oto šero đende. Ma daran! Injen po dragocena negoli pherdo čirikle! 8 A vaćerava tumenđe: svako kova ka priznajini man anglo manuša, i o Čhavo e Manušesoro ka priznajini ole anglo anđelja e Devlesere. 9 A ko ka odreknini pe mandar anglo manuša, ka ovel odreknime anglo anđelja e Devlesere. 10 I ko god ka vaćeri lafi protiv o Čhavo e Devlesoro, ka ovel lese oprostime; ali okolese kova hulini upro Sveto Duho, na ka ovel oprostime. 11 A ked ka anen tumen anglo sinagoge, vladarija hem vlast, ma oven zabrinuta sar hem soja te braninen tumen, so te vaćeren! 12 Adalese so o Sveto Duho ka sikaj tumen ko adava sati so valjani te vaćeren.” 13 Tegani neko oto narodo phenđa olese: “Učitelju (Učitelju), vaćer me phralese te ulaj (podelini) mancar o nasleđe.” 14 A Ov phenđa olese: “Manušeja, ko čuča man zako sudija ili delioco upra tumende? 15 Tegani phenđa olenđe: “Dikhen! Arakhen tumen oti svako pohlepa: adalese so nane svakonese o dživdipe (životi) ano izobilje savo avela tari lesiri imovina.” 16 Tegani phenđa lenđe paramiz vaćerindoj: “I phuv disave barvale manušesiri bijanđa šukar bijandipe (rod). 17 Tegani ov mislinđa pe ana peste vaćerindoj: 'So te ćerav? Nane man kaj te čedav mi žetva.' 18 I phenđa: 'Akava ka ćerav! Ka peravav me šupe i ka vazdav pobare pa adathe ka čedav sa o điv hem mli imovina. 19 I ka vaćerav me dušaće: dušo, isi tut but šukaripe čedime zako but berša. Odmorin, xa, pi, uživin!' 20 Ali o Devel phenđa lese: 'Hulavona! Akaja rat ka rodel pe tutar ti duša! A so pripreminđan, kasro ka ovel?' 21 Ađahari okolese kova čedelafse blago, a na barvaljola e Devleja.” 22 Tegani phenđa ple učenikonenđe: “Adalese vaćerava tumenđe: ma oven zabrinuta zako tumaro dživdipe (životi): so ka xan; ni zako trupo (telo): so ka hurjen. 23 Adalese soi o dživdipe pobut oto xajba hem tumaro trupo oto šeja. 24 Dikhen e gavranen! Jer na sijinena hem na čedena, nane len ni magacin ni šupa, i o Devel parvari len. A kobor više tumen razlikujinena tumen e čiriklendar! 25 A ko tumendar brinindoj šaj te dodel pese ko ugled kuni? 26 Znači ako našti ni adava najxari te ćeren, sose onda brininena za ostalo? 27 Dikhen o divlja luluđa sar barjona. Ni trudinena pe ni vrtinena pe, a vaćerava tumenđe: ni o Solomon ani sa i slava pli na hurjavđa pe sar jekh olendar. 28 Pa ako i čar ano polje savi avdive adari, a tejsa frdela pe ani kuba, o Devel ađahar hurjavela, kobor li pobut tumen, tikora verakere! 29 I tumen ma roden so ka xan hem so ka pijen. Ma oven zabrinuta! 30 Jer sa adava rodena e butedevlengere (o poganja) akale svetostar. A tumaro Dad džanel da valjani tumenđe adava. 31 Nego roden lesoro carstvo (carstvo), a sa adava ka delpe tumenđe! 32 Ma dara, stado tikoreja! Jer tumaro Dad odlučinđa te del tumenđe o carstvo.” 33 “Bikninen so isi tumen i doden sar milostinja! Ćeren tumenđe kese zako pare save na propadinena, barvalipe ko nebo savo niked na smanjini pe, kote o čor na avela paše hem o moljco na uništini. 34 Jer, kaj tumaro barvalipe, adari ka ovel tumaro vilo.” 35 “Nek tumare bokovja ovena pričvrstime hem tumare memelja tharde! 36 I oven sar o manuša kola adžićerena upro pumaro gospodari ked bi irini pe oto bijav sigate te phraven lese adalese so avela hem khuvela ko udar. 37 Bahtalei okola kandine (sluge) kolen o gospodari, avindoj, ka arakhi dzangalen! Čače, phenava tumenđe, ka phandel pe pojas, ka bešljačeri len te xan pa avindoj ka kandel len. 38 I ked bi avela ki dujto il ki trito straža i arakhi len ađahar, blago lenđe! 39 A akava te džanen: ked bi o gazda e čheresoro džanela ko savo sati avela o čor, na bi mukela lesoro čher te ovel phago. 40 I tumen oven spremna adalese so o Čhavo e Manušesoro avela ko sati ked na nadinena tumen!” 41 Tegani o Petar phenđa: “Devlikaneja (Gospode) (Gospode), vaćereja li akala paramiza samo amenđe ili sarijenđe?” 42 O Devlikano (Gospod) phenđa: “Koi li verno hem mudro upravitelji kas o gospodari ka čhivel upreder ple kandine (sluge) te del len xajba ko vreme? 43 Bahtaloi okova kandino kas lesoro gospodari, avindoj, ka arakhi sar ćerela adava. 44 Čače, vaćerava tumenđe, upreder sa o barvalipe plo ka čhivel ole. 45 A vaćeri li adava kandino pese ano vilo: 'Ka harini o gospodari mlo' pa lela te marel e kandinen (slugen); te xal, te pijel hem te maćol, 46 ka avel adale kandinesoro gospodari ko dive savo na očekujini hem ko sati savo na džanel; ka kaznini le šukar hem ka del le than maškaro nevernici. 47 A okova kandino kova džanđa i volja ple gospodaresiri, a na inele spremno ili na ćerđa pali lesiri volja, ka ovel but mardo. 48 A okova kova na džanđa, a ćerđa so zaslužini mariba, ka ovel xari mardo. A đijekhese kasei dindo but, but ka rodel pe lestar. I kasei poverime but, pobut ka rodel pe lestar.” 49 “Aljum te frdav i jag ki phuv, i so bi mangava te ovel već thardi! 50 Ali isi man te muka ma ano krstiba i kobor maje pharo dok adava na pherđola (ispunini pe)! 51 Mislinena da aljum te anav mir ki phuv? Nikako, vaćerava tumenđe, nego ulajba (podela). 52 Jer od akana oto jekh čher oto pandž ka oven ulavde: o trin upro duj hem o duj upro trin; 53 ka ovel ulavdo: o dad upro čhavo hem o čhavo upro dad; i daj upri čhaj hem i čhaj upri daj; i sasuj upri bori hem i bori upri sasuj.” 54 Tegani vaćerđa e narodose: “Ked bi dikhena da o oblako uštela oto zapad, sigate phenena da avela o bršin, i ovela ađahar. 55 Ked i južno barval phudela, phenena da ka ovel tatipe, i ovela. 56 Dujemujengere (Licemeri)! O muj (izgled) e phuvjakoro hem e nebosoro džanen te pendžaren, a sar na džanen te pendžaren akava vreme? 57 A sose tumen palo tumaro na sudinena soi ispravno? 58 Jer ked đaja te protivnikoja ko sudo, odrumal dode sa tutar te ove oslobodime lestar, te na bi vucini tut ko sudo pa o sudija te del tut e službenikoste, a o službeniko te frdel tut ano phandlipe. 59 Vaćerava će: čače na ka ikljove adathar sa đikote na irineja đi i zadnjo para.”