1 Ko adava sati ale disave hem vaćerde lese oto Galilejci kolengoro rat o Pilat mešinđa lengere žrtvencar. 2 I o Isus irinđa lenđe: “Mislinena da adala Galilejci, adalese so ađahar mudardile, inele po grešna sa e Galilejconendar? 3 Nikako, vaćerava tumenđe. Ali ako na obratinena tumen, sare ađahar ka mudarđoven! 4 Ili mislinena da okola dešofto, upro kolende peli i kula ano Siloam i mudarđa len, inele pobare grešnici sa e manušendar kola dživdinena (živinena) ano Jerusalim? 5 Nikako, vaćerava tumenđe. Ali ako na obratinena tumen, sare ađahar ka mudarđoven!” 6 Tegani vaćerđa lenđe akaja paramiz: “Inele disave manuše smokva sadime pese ano reza (vinogradi). I alo te rodel o bijandipe (plod) lakoro, ali na arakhlja 7 pa phenđa e rezalese (e vinogradarese): 'Ače, trin berša sar avava te rodav bijandipe upri akaja smokva i na arakhava. Čhin la! Sose te uništini i phuv?' 8 A ov irindoj vaćeri lese: 'Gospodaru, ačhav la pana akava berš dok na xanav la hem ka frdav laće đubrivo. 9 Pa tejsa dive šaj ka bijani bijandipe. A ako na, ka čhine la.'” 10 I sikavđa ani jekh oto sinagoge ko savato. 11 I dikh, disavi džuvli kola dešofto berš ine duho kova ćerela nambormipe. Inele grbavo i naštine nisar te ispravini pe. 12 A ked dikhljala o Isus, vičinđa la hem phenđa laće: “Džuvlije, oslobodime injan oto klo nambormipe!” 13 I čhivđa pe vasta upro late, a oj otojekhvar ispravisali i hvalinđa e Devle. 14 Tegani o glavno oti sinagoga, xoljame so o Isus sasljarđa ko savato, phenđa e narodose: “Isi šov dive ko save šaj te ćerel pe buti! Ko adala dive, znači, aven i oven sasljarde, a na ko savato dive!” 15 A o Devlikano (Gospod) (Gospod) phenđa lese: “Dujemujengere (Licemeri)! Na phravela li svako tumendar pe guruve il xere oto jasle te legari le te pijel? 16 A akajai e Avraamesiri čhaj kola o beng phandlja ače dešofto berša. Oj li na valjani te ovel oslobodime oto akava nambormipe ko savato dive?” 17 I vaćerindoj adava, lađandile sare kola inele protiv oleste, a sa o narodo radujisalo zako sa o čudesija so ule kroz oleste. 18 Tegani phenđa: “Upra sostei slično o carstvo (carstvo) e Devlesoro? Soja li te uporedinav le? 19 Sličnoi sar o seme oti gorušica savo o manuš lela i frdela pese ki bašta. I barilo hem ulo kaš pa e nebosere čirikle ćerde gnezdija upro lesere granke.” 20 I palem phenđa: “Soja te uporedinav o carstvo e Devlesoro? 21 Sličnoi sar o kvasco savo i džuvli lela i čhivela le ano trin mere oto varo dok na ušlilo sa.” 22 I putujindoj ano Jerusalim, nakhino maškaro dizja hem gava i sikavđa. 23 A neko phenđa lese: “Devlikaneja (Gospode), xari li isi okola save spasinena pe?” A Ov phenđa lenđe: 24 “Den zori te đerdinen kroz o tesno udar adalese so but džene, vaćerava tumenđe, ka roden te đerdinen, ali na ka šaj. 25 Adalese so bi o gazda e čheresoro uštela i phandela o udar, a tumen bi terđona avrijal hem khuvena bi ko udar vaćerindoj: 'Gospodaru, phrav amenđe!' I ov ka phenel tumenđe: 'Na džanav tumen kotar injen!' 26 Tegani ka len te vaćeren: 'Xaljam hem piljam angla tute, hem tu sikavđan ko amare trgija.' 27 A ov ka phenel: 'Vaćerava tumenđe: Na džanav kotar injen. Džan tumenđe mandar, sare kola ćerena bišukaripe!' 28 Adathe ka ovel rojba hem krciba e dandengro ked ka dikhen e Avraame, e Isake, e Jakove hem sa e prorokonen ano carstvo e Devlesoro, a tumen frdime avrijal. 29 I ka aven oto istok hem oto zapad, oto sever hem oto jug i i ka bešen uzalo astali ano carstvo e Devlesoro. 30 I dikh, isi zadnja kola ka oven anglune, hem isi anglune kola ka oven zadnja.” 31 I ko adava sati alo paše disavo fariseji i phenđa lese: “Ikljov i đa akatar, adalese so o Irod mangela te mudari tut.” 32 I Ov phenđa lenđe: “Džan i vaćeren adala lisicaće: Ače, ispudinava e demonen hem dovršinava o isceliba avdive hem tejsa, a ko trito dive završinava. 33 Ali avdive, tejsa hem prektejsa valjani te putujinav; adalese so našti o proroko te mudarđol avrijal e Jerusalimestar.” 34 Jerusalime, Jerusalime, savo mudareja e prorokonen hem frdeja bara upro okolende kolai tuće bičhalde! Kobor droma (puti) mangljum te čedav te čhavoren sar i khani ple pilićken talo ple phaka, ali tumen na mangljen! 35 Ače, tumaro čher napustime! I vaćerava tumenđe, čače na ka dikhen man dok na ovela adava ked ka phenen: Blagoslovimej okova kova avela ano anav e Devlikanesoro (Gospodesoro)!”