15
1 I sa o carinici hem o grešnici čedisale uzal oleste te šunen le. 2 Tegani i o fariseja hem o lilarne (učitelja e zakonesere) mrmljinde vaćerindoj: “Akava primini e grešnikonen hem xala olencar.” 3 Tegani Ov phenđa olenđe akaja paramiz vaćerindoj: 4 “Kova tumendar, ako isi le šel bakre pa našali jekhe olendar, na ačhaj e enjavardešuenjen ko čučo than (pustinja) i đala palo našaldo sa dok na arakhi le? 5 I ked arakhi le, čhivela le ko piče radujindoj; 6 pa ked avela čhere, vičini pe amalen hem pe komšijen vaćerindoj lenđe: 'Radujinen tumen mancar! Jer arakhljum me našalde bakre.' 7 Vaćerava tumenđe da ko nebo ka ovel pobari radost zako jekh obratime grešniko nego li zako enjavardešuenja pravednici kolenđe na valjani te obratinen pe.” 8 “Ili savi džuvli, ako isi la deš drahme pa našali jekh drahma, na tharela i memeli te šulaj o čher hem šukar te rodel dok na arakhi la? 9 I ked arakhi la, vičini ple amalinjen hem ple komšiken vaćerindoj: 'Radujinen tumen mancar! Jer arakhljum i drahma savi našalđum.' 10 Ađahar, vaćerava tumenđe, ovela radost maškaro anđelja e Devlesere zako jekh obratime grešniko.” 11 I phenđa: “Disave manuše inele duj čhave. 12 I o tikneder olendar phenđa ple dadese: 'Dade, de ma o deo oto imanje so perela maje.' I ulavđa (podelinđa) olenđe o imanje. 13 I palo nekobor dive o tikneder čhavo čedinđa sa plo i đelo oto čher dur thaneste i adari trošinđa plo barvalipe dživdindoj bizi godi. 14 Ked trošinđa sa plo, ulo baro bokhalipe ani adaja phuv i olese lelja te falini. 15 I đelo pridružinđa pe jekhese oto manuša adala phuvjakere. I ov bičhalđa le pese ki njiva te arakhel e balen. 16 I manglja te pherel pe adaleja so o bale xale, ali niko na dinđa lese. 17 A ked rasvestisalo, phenđa: 'Koboren me dadesere radnikonen isi sa edobor mare, a me akate merava oti bokh! 18 Ka uštav, ka đav koro mo dad hem ka phenav lese: 'Dade, grešinđum protiv o nebo hem angla tute! 19 Na injum akana dostojno te vičina ma kle čhaveja. Le man sar jekhe oto kle bućarne.' 20 I uštino hem đelo koro po dad. Pana dok inele dur, lesoro dad dikhlja le, sažalisalo, prastandilo i zagrlinđa le hem čumudinđa le. 21 Tegani o čhavo phenđa lese: 'Dade, grešinđum protiv o nebo hem angla tute! Na injum akana dostojno te vičina ma kle čhaveja.' 22 A o dad phenđa ple kandinenđe (slugenđe): 'Sig ikalen o najšužo fostani i hurjaven le! Čhiven lese i angrustik ko naj hem o sandale ko pre! 23 I anen thuljarde telco te čhinen, te xas hem te slavina 24 adalese so akava, mlo čhavo, ine mulo i uštino, ine našaldo i arakhlja pe.' I lelje te veselinen pe. 25 A lesoro phureder čhavo inele ki njiva. I ked alo paše uzalo čher, šunđa bašaliba hem čheliba 26 pa vičinđa jekhe e kandinendar (slugendar) te pučel so ulo adava. 27 I ov phenđa lese: 'To phral alo pa to dad čhinđa thuljarde telco adalese so dođačerđa le saste.' 28 I ov inele xoljame i nakamđa te đerdini. Tegani lesoro dad iklistilo i vičinđa le. 29 A ov phenđa ple dadese: 'Ače, sa edobor berša kandava tut i nijekhvar na phagljum (prekršinđum) ti zapoved, a niked na dinđan ma ni jarco te šaj mle amalencar te veselina ma. 30 A ked alo akava čhavo klo, kova xalja to imanje e kurvencar, tu čhinđan lese thuljarde telco.' 31 A lesoro dad phenđa lese: 'Mo čhavo, tu uvek injan mancar. I sa soi mlo - kloi. 32 Ali valjanđa ađahar te slavinel pe hem te ovel veselo adalese so akava phral klo inele mulo i uštino, inele našaldo i arakhlja pe!'”
DRAFT VERSION