1 I mothovđa lenđe paramiz, sar valjani stalno te molinen pe i te na ačhaven (odustajinen), vaćerindoj: 2 “Inele disavo sudija ani disavi diz. Na darandilo e Devlestar hem na poštujinđa e manuše. 3 A inele disavi udovica ani adaja diz. I stalno ali đi leste vaćerindoj: 'Branin ma me protivnikostar!' 4 A ov na manglja disavo vreme. Ali palo adava, phenđa ana peste: 'Iako na darava oto Devel hem na poštujinava e manuše, 5 ali adalese so akaja udovica dosadinđa ma, ka opravdinav la te na avel više te dosadini ma.'” 6 Tegani o Devlikano (Gospod) phenđa: “Šunen o nepravedno sudija so vaćeri! 7 A o Devel li na ka opravdini ple izaberimen kola i dive i rat vičinena ole pa sa i te odložini lenđe? 8 Vaćerava tumende, ka opravdini len sigate. Ali ked ka avel o Čhavo e Manušesoro, ka arakhi li vera ki phuv?” 9 I disavenđe kola verujinde ana pumende dai pravedna, a averen mrzinde, phenđa akaja paramiz: 10 “Duj manuša đele ko Hram te molinen pe: jekh fariseji, a o dujto cariniko. 11 O fariseji terdino i ana peste molinđa akava: 'Devla, hvala će so na injum sar avera manuša: čora, nepravedna, preljubnici ili sar akava cariniko. 12 Postinava duj droma (puti) ano kurko; dava desetak oto sa so priminava.' 13 A o cariniko, terdindoj odural, na manglja ni ple jaćha te vazdel naupre, nego khuvđa pe ko gruđa vaćerindoj: 'Devla, ov milosno maje, e grešnikose!' 14 Vaćerava tumenđe, akava irinđa pe čhere opravdime, a na okova! Adalese so đijekh kova povazdela pe, ka ovel peravdo (ponizime); a kova peraj pe, ka ovel povazdime.” 15 I ande lese e čhavoren te šaj dotaknini len. I dikhindoj adava, o učenici na mukle len. 16 A o Isus vičinđa olen vaćerindoj: “Muken e čhavoren te aven kora mande i ma čhinaven (sprečinen) len adalese so o carstvo (carstvo) e Devlesoroi esavkenđe! 17 Čače tumenđe vaćerava, ko na primini o carstvo o Devlesoro sar o čhavoro, na ka đerdini ano leste.” 18 I disavo vođa pučlja Ole: “Učitelju (Učitelju) šukareja, so te ćerav te šaj dobinav o večno dživdipe?” 19 A o Isus phenđa lese: “Sose vičineja ma šukareja? Nijekh nane šukar sem o jekh Devel. 20 O zapovedija džane: Ma ćer preljuba! Ma mudar! Ma čor! Ma svedočin hovavne! Poštujin te dade hem te daja!” 21 Tegani ov phenđa: “Sa adava ćerđum oto tikvarila.” 22 Ked šunđa adava, o Isus phenđa lese: “Pana jekh stvaro ačhola tut: Biknin sa so isi tut hem de e čororenđe i ka ovel tut barvalipe upre. Tegani ava i phir pala mande.” 23 A ov ked šunđa adava, peravđa po muj adalese so inele but barvalo. 24 A o Isus, ked dikhlja le sar peravđa po muj, phenđa: “Kobor phare o barvale đerdinena ano carstvo (carstvo) e Devlesoro! 25 Adalese soi po lokhe e kamilaće te nakhel maškaro kan e suvjakoro nego e barvalese te đerdini ano carstvo e Devlesoro.” 26 A okola kola šunde, phende: “Ko onda šaj te ovel spasime?” 27 A Ov phenđa: “Soi nemoguće e manušenđe, mogućei e Devlese.” 28 Tegani o Petar phenđa: “Ače, amen ačhavđam sa i phiraja pala tute.” 29 A o Isus phenđa lenđe: “Čače, vaćerava tumenđe, nane nijekh kova ačhavđa o čher, ili e romnja, ili e phraljen, ili e roditeljen, ili e čhaven zbog o carstvo e Devlesoro, 30 a te na primini edobor pobut ko akava sveto hem večno dživdipe ko sveto savo avela.” 31 I lelja peja e dešudujen hem phenđa lenđe: “Ače đerdinaja ano Jerusalim i sa ka pherđol (ispunini pe) so o proroci pisinde oto Čhavo e Manušesoro: 32 ka ovel dindo e butedevlengerenđe, ka maren muj oleja, ka ovel secime hem čhungardo; 33 i ka ovel šibime hem ka mudaren le. Ali o trido dive ka uštel.” 34 Ali on ništa adalestar na razuminde. Akava lafi inele garavdo olendar i na razuminde so ine lenđe phendo. 35 A ked alo paše uzalo Jerihon, ulo adava da disavo kororo manuš beštino uzalo drom hem prosinđa. 36 Ked šunđa sar o narodo nakhela, pučlja so desinipe. 37 I phende lese da o Isus o Nazarećanino nakhela. 38 Tegani vičinđa vaćerindoj: “Isuse, Čhaveja Davidesreja, smilujin tut upra mande!” 39 A okola odanglal ukorinde ole te traini, ali ov pana po zorale vičinđa: “Čhaveja Davidesreja, smilujin tut upra mande!” 40 Tegani o Isus terdino hem naredinđa te anen le anglo leste. I ked alo paše, Ov pučlja le: 41 “So mangeja tuće te ćerav?” Tegani ov phenđa: “Devlikaneja (Gospode), te šaj dikhav.” 42 I o Isus phenđa lese: “Dikh! Ti vera spasinđa tut.” 43 I otojekhvar dikhlja hem phirđa palo leste slavindoj e Devle. I dikhindoj adava, sa o narodo dinđa slava e Devlese.