1 I đerdindoj, nakhino maškaro Jerihon. 2 I dikh, disavo manuš palo anav Zakej. Ov inele glavno cariniko hem inele barvalo. 3 Manglja te dikhel koj o Isus, ali naštine oto narodo adalese so inele pretičkoro. 4 I prastandoj anglal, uklinđa upro kaš te šaj dikhel le adalese so adathar valjanđa te nakhel. 5 A ked o Isus alo ko adava than, dikhindoj upre, phenđa olese: “Zakej, huli sigate! Jer avdive valjani te ovav tuće ano čher.” 6 I hulilo sigate i priminđa ole radosno. 7 I sare kola dikhle adava mrmljinde vaćerindoj: “Ov đelo te ovel gosto e grešnikosoro!” 8 A o Zakej uštino i phenđa e Devlikanese (Gospodese) (Gospodese): “Ače, Devlikaneja (Gospode), ekvaš o barvalipe mlo dava e čororenđe! I ako nekas prevarinđum, irinava štar droma (puti) pobut (više).” 9 A o Isus phenđa lese: “Avdive alo o spasenje ano akava čher, adalese soi i ov čhavo e Avraamesoro. 10 Adalese so o Čhavo e Manušesoro alo te rodel hem te spasini soi našaldo!” 11 I dok šunde adava, Ov phenđa lenđe pana jekh paramiz - adalese so inele paše uzalo Jerusalim i on mislinde da o carstvo (carstvo) e Devlesoro otojekhvar ka pojavini pe. 12 Pa phenđa: “Disavo baro manuš đelo ki disavi phuv koja inele dur te primini plo carstvo pa te irinipe. 13 I vičindoj ple dešen kandinen (slugen), dinđa len deš mne i phenđa lenđe: 'Ćeren buti dok na avava.' 14 A o manuša oti lesiri phuv mrzinde ole i bičhalde jekhe predstavniko palo leste vaćerindoj: 'Na mangaja akale te ovel amaro caro.' 15 I ked priminđa o carstvo, irinđa pe i ulo adava da terinđa te vičinen okolen kandinen, kolenđe dinđa love, koro leste te dikhel so ačhilo len (zaradinde). 16 I alo o prvo vaćerindoj: 'Gospodaru, kli mna anđa deš mne.' 17 I ov phenđa lese: 'Šukari, gudleja kandineja (slugo)! Adalese so injanle verno ano najxari, ov vladari upro deš dizja!' 18 I o dujto alo vaćerindoj: 'Gospodaru, kli mna anđa pandž mne.' 19 I lese phenđa: 'I tu ov upro pandž dizja!' 20 I aver alo vaćerindoj: 'Gospodaru, ače ti mna savi garavđum ani maramica. 21 Jer darandiljum tutar adalese so injan oštro manuš: lelja so na uložinđan hem čedeja so na sijinđan.' 22 Lese phenela: 'Palo kle lafija ka sudinav tut, bišukar kandineja! Ako džanđan da injum oštro manuš, da lava so na uložinđum hem čedava so na sijinđum, 23 sose onda na uložinđan mle love adari kaj uložinena pe? I me bi avindoj priminava len e kamataja.' 24 Tegani phenđa okolenđe kola terdine uzalo leste: 'Len lestar i mna i den okolese kas isi deš mne!' 25 I on phende lese: 'Gospodaru, ole isi deš mne.' 26 'Vaćerava tumenđe da ka del pe svakonese kas isi, a okolestar kas nane ka lel pe i adava so isi le. 27 A mle dušmanjen, okolen kola na mangle te ovav lengoro caro, anen akari hem čhinen len angla mande!'” 28 I ked phenđa adava, đelo anglo okolende kola đele naupre ano Jerusalim. 29 Ked alo paše uzali Vitfaga hem Vitanija, uzali gora vičimi Maslinsko, ulo adava da bičhalđa dujen ple učenikonendar (učenikonendar) 30 vaćerindoj: “Džan ano gav savoj angla tumende. I ked ka đerdinen, ka arakhen phandle xere upro koleste pana nijekh manuš na beštino. Phraven le i anen le. 31 I ako neko pučela tumen: Sose phravena le?, vaćeren ađahar: E Devlikanese (Gospodese) valjani.” 32 I o bičhalde đele hem arakhle ađahar sar so phenđa lenđe. 33 A dok phravde e xere, lesere vlasnici phende lenđe: “Sose phravena e xere?” 34 A on phenđe: “E Devlikanese (Gospodese) valjani.” 35 I ande le e Isusese. I frdindoj ple šeja upro xer, bešljaćerde e Isuse. 36 I dok đelo anglal, on buljarde pumare šeja upro drom. 37 A ked alo paše uzali nizbrdica oti Maslinsko gora, sa okola, pherdo učenici, lelje te radujinen pe slavindoj e Devle oto sa o glaso zako sa o čudesija save dikhle: 38 “Blagoslovime o Caro kova avela ano anav e Devlikanesoro (Gospodesoro)! Ko nebo mir! Slava ko učipe (visine)!” 39 I disave fariseja oto narodo phende lese: “Učitelju (Učitelju), smirin kle učenikonen.” 40 A Ov phenđa lenđe: “Te trainde on, o bara ka vičinen!” 41 I ked alo paše, dikhlja i diz i runđa upro late 42 vaćerindoj: “Ked bi i tu ko akava dive džaneja soi zako klo mir! 43 Ali akanai garavdo te jaćhendar. Jer ka aven o dive upra tute ked te dušmanja ka okružinen tut e barikadencar, ka pritiskinen tut hem oto sa o strane ka opkolinen tut. 44 Ka uništinen tut hem te čhaven ana tute. I na ka ačhaven ni bar upro bar adalese so na pendžarđan o sati oti kli poseta.” 45 I đerdindoj ano Hram, lelja te ispudini okolen kola biknena. 46 Phenđa lenđe: “Pisimei: O čher mlo ka ovel o čher oti molitva, a tumen lestar ćerđen pećina e čorengiri!” 47 I oto dive ko dive sikavđa ano Hram. A o šerutne sveštenici hem o lilarne (učitelja e zakonesere) rodinde sar te mudaren le, a ađahar da i o najbare manuša oto narodo. 48 Ali na arakhle so te ćeren adalese so sa o narodo pažljivo šunđa le.