1 I ulo jekh dive dok sikavđa e narodo ano Hram hem vaćerđa o evanđelje, o šerutne sveštenici hem o lilarne (učitelja e zakonesere) e starešinencar ale paše 2 i phende lese: “Vaćer amenđe kotar tuće pravo te ćere akava ili ko dinđa tut pravo?” 3 A Ov phenđa lenđe: “I me tumen ka pučav. Vaćeren maje: 4 O krstiba e Jovanesoro inele li oto nebo il oto manuša?” 5 A on mislinde pe maškara pumende vaćerindoj: “Ked bi phenaja 'oto nebo', Ov ka phenel: 'Sose onda na verujinđen lese?' 6 A ked bi phenaja 'oto manuša', sa o narodo ka gađini amen barencar adalese soi uverime da o Jovane proroko.” 7 I phende da na džanen kotar. 8 I o Isus phenđa lenđe: “Ni me na ka phenav tumenđe kotar maje pravo akava te ćerav.” 9 Tegani lelja te mothovel e narodose akaja paramiz: “Disavo manuš sadinđa reza (vinograd), dinđa le e rezalenđe (vinogradarenđe) i đelo ko drom ko duže vreme. 10 I ked alo o vreme, bičhalđa e kandine (sluga) koro rezale te šaj den le oto plodo oto reza. Ali o rezale marde le i bičhalde le čuče vastengere. 11 I palem bičhalđa avere kandine. Ali on i ole marde, lađarde le i bičhalde le čuče vastengere. 12 I palem bičhalđa e tritone. A on i ole raninde hem ispudinde. 13 Tegani o gospodari oto reza phenđa: 'So te ćerav? Ka bičhalav me volime čhave. Šaj olestar ka lađan.' 14 Ali ked o rezale dikhle ole, vaćerde maškara pumende: 'Akavai o nasledniko. Hajde te mudara le pa amenđe te ačhol o barvalipe.' 15 I frdinde le avrijal oto reza i mudarde le. So onda o gospodari oto reza ka ćerel lenđe? 16 Ka avel i ka mudari okolen rezalen i ka del o reza averenđe.” I okola kola šunde le phende: “Arakh Devla!” 17 A Ov dikhlja plen ko jaćha i phenđa: “Soi akava so pisime: O bar savo frdinde o zidarja, ulo bar oto ugao? 18 Svako kova perela upro adava bar, ka phagel pe, a upra kaste ka perel, ka gnječini le.” 19 A o lilarne hem o šerutne sveštenici dikhle ano adava sati te vazden ple vasta upro leste, ali darandile e narodostar. Jer džande da mothovđa adaja paramiz olendar. 20 I on posmatrinde le, bičhalde e špijunen, kola ćerde pe dai pravedna, te šaj dolen le ko lafi pa te preden le koro šerutne hem ki upraviteljsko vlast. 21 I pučle ole vaćerindoj: “Učitelju (Učitelju), džanaja da vaćereja hem sikaveja šukar i na dikheja koj kova, nego čačimase sikaveja o drom e Devlesoro. 22 Valjani li te platina o porez e carose (carose) il na?” 23 A Ov razuminđa lengoro lukavstvo i phenđa lenđe: 24 “Mothoven maje o denari; kasro liko hem natpis isi le?” A on phende: “E carosoro.” 25 I Ov phenđa olenđe: “Adalese den e carosoro e carose, a e Devlesoro e Devlese.” 26 I naštine te dolen le ko lafi anglo narodo i inele začudime oto lesoro iriba pa trainde. 27 I disave oto sadukeja, kola na verujinde ano vaskrsenje, priđinde i pučle ole: 28 “Učitelju, o Mojsije amenđe pisinđa: 'Ked bi merela nekasoro phral, kole inele romni, a na inole čhave, nek lel adala romnja lesoro phral te šaj vazdel čhaven ple phralese. 29 Ađahar inele efta phralja. I o prvo lelja e romnja i mulo bizo čhave. 30 I o dujto lelja e romnja, 31 onda o trito; i ađahar da so efta na mukle čhavoren i mule. 32 A palo lende muli i romni. 33 Kasri oj romni olendar ka ovel ked ka uštel pe oto mule? Adalese so inele romni oto so efta.” 34 I o Isus phenđa olenđe: “O čhave oto akava sveto ženinena pe hem dena pe. 35 A okola kola smatrinena pe dostojna okole svetose hem zako uštiba oto mule ni ženinena pe ni dena pe. 36 Adalese so našti više ni te meren adalese soi sar o anđelja. I čhavei e Devlesere adalese soi čhave oto uštiba oto mule (vaskrsenje). 37 A da o mule uštena, mothovđa i o Mojsije ko grmlje ked vičini e Devlikane (Gospode) Devel e Avraamesoro, Devel e Isakesoro hem Devel e Jakovesoro. 38 A Ov nane Devel e mulengoro nego Devel e dživdengoro. Jer sare lese dživdinena (živinena)!” 39 Disave lilarne (učitelja e zakonesere) irindoj phende olese: “Učitelju, šukar vaćerđan!” 40 I na tromandile ništa pobut te pučen le. 41 A Ov phenđa olenđe: “Sar vaćerena dai o Hrist e Davidesoro čhavo? 42 Jer o David korkoro phenela ano lil oto Psalmija: 'Phenđa o Devlikano (Gospod) mle Devlikanese (Gospodese): Beš oti mi desno strana 43 dok na pašljarava e dušmanjen klen talo kle pre!' 44 O David vičini le 'Devlikaneja (Gospode)'. I sar onda šaj te ovel lesoro čhavo?” 45 I dok sa o narodo šunđa, Ov phenđa ple učenikonenđe (učenikonenđe): 46 “Pazinen tumen e lilarnendar, kola uživinena te phiren ano bare fostanja, volinena o pozdravija ko trgija, o anglune thana ano sinagoge hem o anglune thana uzalo astalja zako xajba. 47 Kola xana o čhera e udovicengere hem ćerena pe da molinena bare molitve. Adala ka priminen but bari osuda.”