1 I dikhindoj upre, dikhlja e barvalen sar čhivena pumare darovja ani košarica. 2 A dikhlja disava čororja udovica sar adari čhivela duj tikore kovanice. 3 I phenđa: “Čače vaćerava tumenđe da akaja čorori udovica čhivđa više sarijendar. 4 Adalese so sare akala ani košarica čhivde oto buderi so isi len, a oj čhivđa oto plo čororipe sa plo barvalipe so inola.” 5 I dok disave vaćerde oto Hram dai ukrasime e šuže barencar hem sa darovja, Ov phenđa: 6 “Ka aven o dive ano save oto sa akava so dikhena na ka ačhol ni bar upro bar savo na ka ovel uništime.” 7 A on pučle ole: “Učitelju (Učitelju), ked adava ka ovel hem ko savo znako adava ka ovel?” 8 A Ov phenđa: “Dikhen te na oven prevarime. Adalese so but džene ka aven ano mlo anav vaćerindoj: 'Me injum' i: 'Alo paše o vreme.' Ma džan palo lende! 9 A ked šunena zako mariba hem pobune, ma te daran. Adalese so najangle adava valjani te ovel, ali nane otojekhvar kraj.” 10 Tegani phenđa olenđe: “O narodo ka uštel upro narodo hem o carstvo (carstvo) upro carstvo. 11 I ka oven bare zemljotresija oto than ko than, bokhalipe hem kuga; ka pojavinen pe užasna stvarija hem bare znakija odupral. 12 Ali angleder sa adava ka vazden pumare vasta upra tumende hem ka jurinen tumen, ka den tumen ano sinagoge hem ano phandlipe. Ka legaren tumen anglo carija hem vladarija zbog mlo anav. 13 Adava ka ovel tumenđe zako svedočanstvo. 14 Adalese, čhiven tumenđe ano vile te na planirinen tumari odbrana! 15 Adalese so me ka dav tumen čhib hem mudrost savaće na ka šaj te suprotstavinen pe ni te irinen tumenđe lafi sa tumare protivnici. 16 I ka oven predime oto roditelja hem oto phralja, oto amala hem oti familija; i disaven tumendar ka mudaren. 17 I sare ka mrzinen tumen zbog mlo anav, 18 ali ni jekh bal tumare šerestar na ka perel. 19 Tumen ka nakhaven adava hem ka spasinen tumen.” 20 “I ked bi dikhena sar o Jerusalim opkolime e vojskendar, tegani te džanen da alo paše lesoro uništiba. 21 Tegani adala soi ani Judeja, nek našen ko gore; kola ka oven ani Diz, nek ikljon avrijal; i kolai ko njive, te na đerdinen andre 22 adalese so adalai o dive zako kazniba, te ovel pherdo (ispunime) sa soi pisime. 23 Pharipe e khamnjenđe hem okolenđe kola dena čuči ko adala dive! Adalese so baro bišukaripe (nevolja) ka ovel upri phuv hem kazna akale narodose. 24 Ka peren oto oštro mači hem ka oven legarde ano phandlipe maškaro sa o nacije. I o Jerusalim ka ovel gazime oto nacije sa dok o satija e nacijengere na pherđovena (ispuninena pe).” 25 I ka oven znakija upro kham, upro masek hem upro čerenja, a ki phuv o nacije ka oven ano pharipe zbog o neizvesnost oto zvuko oto more hem oto talasija. 26 O manuša ka meren oti dar hem oto adžićeriba adalestar so avela ki phuv. Jer, o zoralipa (sile) oto nebesija ka tresinen pe. 27 Tegani ka dikhen e Čhave e Manušesere sar avela upro oblako ano baro zoralipe hem slava. 28 I ked sa adava ka ovel, ispravinen tumen i vazden tumare šere adalese so avela paše tumaro otkupljenje.” 29 I phenđa olenđe paramiz: “Dikhen i smokva hem sa o kašta. 30 Ked dikhena sar ikljona o luluđa, korkore džanena dai paše o linaj. 31 Ađahar i tumen ked dikhena da adava ovela, te džanen dai o carstvo e Devlesoro paše. 32 Čače vaćerava tumenđe da akava bijandipe (generacija) na ka nakhel đikote sa akava na ovela (ispunini pe). 33 O nebo hem i phuv ka nakhel, ali mle lafija na ka nakhen.” 34 Arakhen tumen, te na oven opteretime tumare vile oto xajba hem oto piba hem oto brige akale dživdipastar (životestar) pa te resel tumen otojekhvar adava dive. 35 Jer ka avel sar zamka upro sa o bešutne e phuvjakere. 36 Ali oven đangale, ko svako sati molinen te šaj našen oto sa adava so valjani te ovel hem te terđol anglo Čhavo e Manušesoro.” 37 A diveste sikavđa ano Hram, a raćaja iklistilo ki gora vičimi Maslinsko. 38 I sa o narodo bi ani zora džana koro leste ano Hram te šunen le.