1 A alo paše o baro dive oto bikvasconegere mare vičime Pasha. 2 O šerutne sveštenici hem o lilarne (učitelja e zakonesere) rodinde sar te mudaren Ole adalese so darandile oto narodo. 3 A o beng đerdina ano Juda vičime Iskariotski kova inele maškaro dešuduj. 4 I đelo hem vaćerđa e šerutne sveštenikonencar hem e hramesere narednikonencar sar lenđe Ole te predel. 5 On radujisale hem dogovorinde pe te den le love. 6 I ov pristaninđa. I tegani rodinđa šukar trenutko te predel Ole olenđe, a te na džanel o narodo. 7 Ked alo o Dive oto bikvasconengere mare, ko savo valjanđa te čhinel pe o pashalno bakro, 8 Ov bičhalđa e Petre hem e Jovane vaćerindoj: ''Džan i ćeren (spreminen) amenđe pasha te šaj te xas.” 9 A on phende lese: ''Kaj mangeja te ćera (spremina) la?” 10 Ov phenđa lenđe: “Eče, so ka đerdinen ki diz, ka resel tumen jekh manuš kova akhari khoro e panjeja. Džan palo leste ko čher ano savo đerdini 11 i vaćeren e gazdase e čherestar: 'O učitelj phenela će: kaj o than kote ka xav i pasha mle učenikonencar (učenikonencar)?' 12 I ov ka mothoj tumenđe i bari upruni soba savi sredime: adari ćeren (spreminen).” 13 On đele i arakhle ađahar sar so phenđa lenđe i ćerde (spreminde) i pasha. 14 I ked alo o sati, beštino o Isus te xal hem o apostolja Oleja. 15 I Ov phenđa lenđe: “Edobor mangljum te xav akaja pasha tumencar angleder nego so ka ovav mučime. 16 Jer vaćerava tumenđe da na ka xav la đikote na ka pherđol ano carstvo (carstvo) e Devlesoro.” 17 I lelja i čaša, zahvalinđa i phenđa: “Len hem ulaven la maškaro tumende. 18 Jer vaćerava tumenđe da od akana na ka pijav oto bijandipe (rod) e drakhengoro đikote o carstvo e Devlesoro na avela.” 19 I lelja o maro, zahvalinđa, phaglja le i dinđa olenđe vaćerindoj: “Akavai mlo trupo (telo) savo tumenđe dela pe; ćeren akava te setinen tumen mandar.” 20 Ađahar da i čaša, palo xajba, vaćerindoj: “Akaja čaša nevo savez ano mlo rat savo čhorela pe tumenđe.” 21 Ali ače, o vas mle izdajnikosoroi mancar uzalo astali. 22 Jer o Čhavo e Manušesoro đala sar soi rešime, ali pharipe okole manušese kova ka predel le!” 23 I on lelje te pučen pe maškara pumende ko bi šaj olendar adava te ćerel. 24 I uli rasprava maškaro lende ko bi olendar šaj te ovel najbaro. 25 A Ov phenđa lenđe: “O carija e nacijengere vladinena olencar hem o vladarija lengere vičinena pe - manuša kola ćerena šukaripe. 26 Ali tumen ma oven esavke! O najbaro maškara tumende nek ovel sar najtikoro; hem o vođa nek ovel sar kandino (sluga). 27 A kovai pobaro? Okova kovai uzalo astali il okova kova kandela? Nane li okova kovai uzalo astali? A me maškaro tumende injum sar okova kova kandela. 28 A tumen injen adala kola ačhiljen mancar ano mle kušnje. 29 I me tumenđe ko vasta mukava o carstvo (carstvo) sar so o Dad mlo muklja maje ko vasta.; 30 te šaj te xan hem te pijen maje uzalo astali ano carstvo mlo, hem te bešen ko uče thana te vladinen upro dešuduj plemenja e Izraelesere.” 31 “Simone, Simone, ače o beng rodela te sijini (rešetini) tumen sar o điv. 32 Ali me molinđuma tuće te na ačhol i vera kli. I ked ka obratine tut, zorjar (ojačin) te phraljen.” 33 A ov phenđa lese: “Devlikaneja (Gospode) (Gospode), tuja injum spremno te đav i ko phandlipe i ko meriba.” 34 A Ov phenđa: “Tuće vaćerava, Petre, o bašno na ka đilabi avdive đikote trin droma (puti) na ka hovave sar na pendžareja man.” 35 I phenđa lenđe: “Ked bičhalđum tumen bizo kese hem bizo torbe hem bizo sandale, na li falinđa tumenđe so?” A on phende: “Ništa.” 36 Tegani Ov phenđa lenđe: “Ali akana kas isi kesa, nek lel la! Ađahar i torba! A kas nane, nek biknel plo fostani i nek činel mači 37 adalese so vaćerava tumenđe da adava soi pisime valjani te ćerel pe upra mande: I čhivđe le maškaro okolende kola ćerena bišukaripe. Čače, sa soi pisime mandar pherđola (ispunini pe).” 38 A on phende: “Devlikaneja (Gospode), ače akate duj mačija!” Ov phenđa lenđe: “Šukari!” 39 I iklindoj, palo po običaj, đelo ki planina i Maslinsko. Palo leste đele i lesere učenici (učenici). 40 I ked reslja adari, phenđa lenđe: “Molinen tumen te na peren ano iskušenje!” 41 I cidinđa pe dur olendar kobor šaj e bareja te frdel pe, pelo ko kočija i molinđa pe vaćerindoj: 42 “Dade! Ako mangeja, cide akaja čaša mandar. Ali na me so mangava, nego nek ovel sar tu so mangeja!” 43 Tegani o anđeo mothovđa pe lese odupral i zorjarđa (hrabrinđa) le. 44 A ked inele ano pobare dukha, po zorale molinđa pe. I lesoro znoj inele sar kapke oto rat save ine perena upri phuv. 45 I pali molitva uštino, alo koro ple učenici i arakhlja len sar sovena oti tuga, 46 i phenđa lenđe: “Sose sovena? Ušten i molinen tumen te na peren ko iskušenje!” 47 Dok adava vaćerđa, eče narodo, a anglo lende jekh oto dešuduj, vičime Juda. I alo paše uzalo Isus te čumudini le. 48 Tegani o Isus phenđa lese: “Judo, čumudipnaja li predeja e Čhave e Manušesere?” 49 A okola uzal Oleste, dikhindoj adava so ka ovel, phende: “Devlikaneja (Gospode), te khuva li e mačeja?” 50 I jekh olendar khuvđa e kandine (sluga) e bare sveštenikosere hem čhinđa lesoro desno kan. 51 Tegani o Isus phenđa: “Muken tumen adalestar!” I dolinđa pe upro kan i sasljarđa le. 52 Tegani o Isus phenđa okolenđe kola ale palo leste, e šerutne sveštenikonenđe, e narednikonenđe oto hram hem e starešinenđe: “Čhurjencar li hem motikencar ikliljen sar so palo čor? 53 Divencar injumle tumencar ano Hram i na vazdinđen tumare vasta upra mande. Ali akavai tumaro sati hem o zoralipe (sila) e tominakoro.” 54 I dolindoj Ole, legarde le i ande le ano čher e bare sveštenikosoro. A o Petar odural đelo palo leste. 55 I tharde i jag ko maškar ki avlin i beštine jekh uzalo avereste, a o Petar beštino maškar olende. 56 I disavi savi kandela dikhlja le kaj bešela uzali jag, dikhlja le čorane hem phenđa: “I akava inele Oleja!” 57 A ov hovavđa vaćerindoj: “Džuvlije, na pendžarava le!” 58 I xari palo adava dikhlja le disavo aver i phenđa: “I tu injan jekh olendar!” A o Petar phenđa: “Manušeja, na injum!” 59 I ked nakhlo jekh sati, aver disavo vaćerđa: “Čače, i akava inele Oleja! Ovi Galilejco!” 60 A o Petar phenđa: “Manušeja, na džanav sostar vaćereja!” I ko adava momenti, dok vaćerđa, o bašno đilabđa. 61 I o Devlikano (Gospod) (Gospod) irinđa pe i dikhlja e Petre, a o Petar setisalo oto lafija e Devlikanese (Gospodese) re (Gospodesere) sar phenđa lese: “Angleder so ka đilabi o bašno, trin droma (puti) ka hovave da na pendžareja man.” 62 I iklindoj avri, runđa zorale. 63 I o manuša kola ićerde e Isuse, asandile lese hem marde le; 64 i ućharindoj lesoro šero, vaćerde lese: “Prorokujin ko khuvđa tut!” 65 I marde muj Oleja vaćerindoj lese but so aver. 66 A ked dislilo, čedinde pe o starešine e nacijakere, o šerutne sveštenici hem o lilarne (učitelja e zakonesere) i ande le pumenđe ko sabor 67 hem phende: “Ako tu injan o Hrist, vaćer amenđe!” A Ov phenđa lenđe: “Te vaćerđum tumenđe, na ka verujinen; 68 a te pučljum tumen, na ka irinen maje. 69 Ali od akana o Čhavo e Manušesoro ka bešel oti desno strana oto zoralipe (sila) e Devlesoro.” 70 A on sare phende: “Tu li injan o Čhavo e Devlesoro?” A Ov phenđa lenđe: “Tumen vaćerena da Me injum. 71 A on phende: “So valjani amenđe aver dokazija? Pa korkore šunđam lesere mujestar!”