1 I sare olendar uštine i legarde le koro Pilat 2 i lelje te vaćeren protiv Oleste: “Akale arakhljam sar rumini amare narodo hem na mukela te den e carose (carose) porez hem vaćeri dai ov o Hrist, o caro.” 3 A o Pilat pučlja le vaćerindoj: “Tu li injan o caro (caro) e Jevrejconengoro? A Ov irinđa lese: “Tu vaćereja.” 4 Tegani o Pilat phenđa e šerutne sveštenikonenđe hem e narodose: “Na arakhava nisavo bišukaripe upro akava manuš!” 5 Ali on na ačhavde te vaćeren: “Ov ćerela pobuna sikavindoj e manušen maškari sa i Judeja, tari Galileja đi akate!” 6 A ked šunđa adava o Pilat, pučlja na li adava manuš Galilejco. 7 I ked dodžanđa dai oto e Irodesiri oblast, bičhalđa le koro Irod, kova adala dive inele ano Jerusalim. 8 A ked o Irod dikhlja e Isuse, inele but radosno adalese so pana oto angleder manglja te dikhel le adalese so šunđa olestar hem adžićerđa te dikhel olestar disavo znako. 9 Pučlja le oto sa, ali Ov na irinđa lese. 10 A terdine adari o šerutne sveštenici hem o lilarne (učitelja e zakonesere) vaćerindoj zorale protiv Oleste. 11 I o Irod pe vojskaja marde Oleja muj hem asandile lese: hurjavde le ano parno fostani i bičhalđa le palal koro Pilat. 12 I o Irod hem o Pilat ule amala ko adava dive, adalese so angleder inele ani svađa. 13 A o Pilat čedinđa e šerutne sveštenikonen, e vladaren hem e narodo 14 i phenđa lenđe: “Anđen kora mande akale manuše adalese so ćerela pobune maškaro narodo. Ače, angla tumende pučljum le i na arakhljum nisavi krivica upro akava manuš zaki savi tumen vaćerena maje. 15 A ni o Irod, adalese so bičhalđa le palal kora amende. Ače, na ćerđa ništa soja bi zaslužini meriba. 16 Ka kazninav le i ka mukav le.” 17  * # 18 Ali on sare vičinde vaćerindoj: “Mudar le, a muk amenđe e Varava!” 19 A adava ine ano phandlipe zako disave pobune ani diz hem zako mudariba. 20 A o Pilat, adalese so manglja te mukel e Isuse, palem vičinđa upro lende. 21 Ali on vičinde: “Čhiv le ko krsto, čhiv le ko krsto!” 22 A ov trito drom (puti) phenđa lenđe: “A so bišukar ćerđa akava manuš? Na dikhava sose valjani te merel. Ka kazninav le i ka mukav le.” 23 Ali on na ačhavde te vičinen oto sa o glaso rodindoj te kovinel le ko krsto. I vičinde sa po zorale. 24 I o Pilat odlučinđa te del len adava so mangena. 25 Muklja okole kova ine ano phandlipe zbog i pobuna hem mudariba, a e Isuse dinđa lenđe sar so mangle. 26 I ked legarde le, dolinde disave Simone Kirinejco sar avela tari njiva i čhivde o krsto upro leste te akhari le palo Isus. 27 A pherdo narodo đelo palo Oleste, i džuvlja kola runde upro leste hem žalinde le. 28 O Isus irinđa pe i phenđa lenđe: “Čhajalen e Jerusalimesere, ma roven upra mande, nego roven upra tumende hem upro tumare čhave. 29 Jer, ače, o dive avena ano save ka vaćeren: 'Bahtalei o džuvlja kola našti te bijanen, o vođija save na bijande hem o čučija savendar na pilja pe. 30 Tegani ka len te vaćeren e planinenđe: 'Peren upra amende!' hem e bregonenđe: 'Učharen amen!' 31 Jer ako ađahar ćerena e sapane kašteja, so li ka ovel e šukeja?” 32 A legarde i dujen averen, kola ćerde bišukaripe, Oleja te oven mudarde. 33 I ked ale ko than vičime Lobanja, adathe kovinde ko krsto e Isuse hem adalen so ćerde bišukaripe, jekhe oti lesiri desno strana, a e dujtone oti levo. 34 A o Isus vaćerđa: “Dade, oprostin lenđe, adalese so na džanen so ćerena!” I frdinde barbuti hem ulavde maškara pumende o fostani lesoro. 35 I o narodo terdindoj dikhlefse. A o vladarija marde muj vaćerindoj: “Averen spasinđa, nek spasini korkoro pes akoi o Hrist e Devlesoro, o Izaberime!” 36 I o vojnici asandile lese, ale uzalo leste i kaninde le ušli mol 37 vaćerindoj: “Ako injan o caro (caro) e Jevrejconengoro, spasin korkore tut!” 38 A inele i diso upreder Oleste kote ine pisime: “Akavai o caro e Jevrejconengoro.” 39 I jekh oto kovime kola ćerde bišukaripe vređinđa Ole vaćerindoj: “Na injan li tu o Hrist? Spasin tut i amen!” 40 A o dujto ukorinđa akale i phenđa: “Sar tu na daraja oto Devel, ked i tu korkoro injan osudime ađahar? 41 A amen pravedno leljam upra amende adava so zaslužinđam amare bišukaripnaja, a Ov nisavo bišukaripe na ćerđa.” 42 Tegani phenđa: “Isuse, setin tut mandar ked ka ave ano carstvo klo.” 43 A Ov phenđa lese: “Čače, vaćerava će, avdive ka ove mancar ano raj!” 44 A inele negde đi o šovto sati ked peli i rat upri sa i phuv đi ko enjato sati; 45 cidinđa pe o kham, a i zavesa oto Hram pharavdili ano ekvaš. 46 I o Isus, vičindoj oto sa o glaso, phenđa: “Dade, tuće ano vasta mukava o duho mlo!” Vaćerindoj adava, mulo. 47 A ked o kapetani dikhindoj so ulo, slavinđa e Devle vaćerindoj: “Čače, akava manuš inele pravedniko!” 48 I ked sa o narodo čedinđa pe te dikhen adava so ulo, irindoj palal marde pe ano gruđa. 49 A odural terdine hem dikhle adava sa Olesere pendžarutne hem o džuvlja kola phirde palo leste pana oti Galileja. 50 I dikh, o manuš palo anav Josif, kova inele člano oto e jevrejconengoro odbor, šukar hem pravedno manuš; 51 ov na složinđa pe adaleja so on odlučinde hem so ćerde. Ov inele oti Arimateja, diz e Jevrejconengiri i adžićerđa o carstvo (carstvo) e Devlesoro. 52 Ov đelo koro Pilat i rodinđa o trupo (telo) e Isusesoro. 53 Tegani huljavđa Ole tele, paćarđa le e platnoja i pašljarđa le ano grobo, savo inele ano bar, ano savo pana nijekh na pašlilo. 54 I inele o dive oto spremiba; o savato dislilo. 55 A o džuvlja, kola đele palo Isus pana oti Galileja, phirde palo leste: dikhle o grobo hem sar inele pašljardo Olesoro trupo (telo). 56 I irinde pe palal, spreminde o mirisija hem mast; i, palo zakoni, o savato nakhavde bešindoj.