1 A ko prvo dive oto kurko ale but sabajle ko grobo, i ande o mirisija save spreminde. 2 I arakhle o bar cidime oto grobo. 3 I đerdindoj, na arakhle o trupo (telo) e Devlikanesoro (Gospodesoro) (Gospodesoro) e Isusesoro. 4 I dok pučle pe so adava ulo, eče, duj manuša ano parne šeja terdine uzalo lende. 5 I o džuvlja but darandile i peravde pumare šere natele, a on phende lenđe: “Sose rodena e dživde maškaro mule?” 6 Nane akate, uštino oto mule! Setinen tumen sar vaćerđa tumenđe pana ked inele ani Galileja: 7 'O Čhavo e Manušesoro valjani te ovel dindo ano vasta e grešnone manušenđe, te ovel kovime, i o trito dive te uštel.'” 8 I on setinde pe lesere lafonendar; 9 i irindoj oto grobo, vaćerde sa adava e dešujekhenđe hem sarijenđe averenđe. 10 A adala inele: i Marija Magdalena, i Jovana, i Marija e Jakovesiri daj, hem avera džuvlja. I on vaćerde adava e apostolenđe, 11 ali on na verujinde lenđe, mislinde dai adala lafija izmislime. 12 A o Petar uštino i prastandilo đi o grobo. Savinđa pe i dikhlja samo o platno. I đelo palal pučindoj pes so ulo adava. 13 I dikh, duj olendar ko adava dive đele ano gav vičime Emaus, dur oto Jerusalim šovardeš stadiumija. 14 I vaćerde jekh averese oto sa adava so ulo. 15 I dok vaćerde maškara pumende, ulo adava da o Isus alo uzalo lende i phirđa olencar. 16 A lengere jaćhenđe na inele muklo te pendžaren Ole. 17 I Ov pučlja len: “Sostar vaćerena maškara tumende phirindoj?” I on terdine ožalostime 18 i jekh olendar, palo anav Kleopa, phenđa lese: “Tu li injan jedino stranco ano Jerusalim pa te na džane so sa ulo ano leste akala dive?” 19 A Ov pučlja len: “So ulo?” I on phende lese: “Pa adava oto Isus o Nazarećanino, kova inele zoralo proroko ano ćeriba hem ano lafija anglo Devel hem anglo sa o manuša: 20 sar o šerutne sveštenici hem amare vladarija dinde le ko meriba hem kovinde le. 21 A amen nadisaljam dai Ov adava kova ka oslobodini o Izrael. Ali sem adava sa, akavai o trito dive sar adava ulo. 22 A daravde amen disave džuvlja maškar amende: sabajleja đele ko grobo, 23 ali na arakhle lesoro trupo (telo) pa ale vaćerindoj da dikhle e anđelen kola vaćerde da Ov uštino oto mule. 24 I disave da amendar đele ko grobo i arakhle ađahar sar o džuvlja so phende, ali Ole na dikhle.” 25 A Ov phenđa lenđe: “O hulavonalen hem ano vile spora te verujinen ano sa so o proroci vaćerde! 26 Na li o Hrist valjanđa sa adava te nakhel i te đerdini pese ani slava?” 27 I tegani lelja oto Mojsije hem oto sa o proroci te mothoj lenđe so ano sa o Lila (Knjige) lestar pisime. 28 I ale paše uzalo gav kaj đele, a Ov ćerđa pe da mangela po dur te đal. 29 A on le ačhavde vaćerindoj: “Ačhov amencar adalese so perela i rat i o dive samo so nane te nakhel!” I Ov đerdinđa andre te ačhol olencar. 30 I dok beštino olencar uzalo astali, ulo adava da lelja o maro, blagoslovinđa, phaglja le i dinđa len. 31 Tegani lengere jaćha phravdile i pendžarde Ole, a Ov nestaninđa anglo lengere jaćha. 32 Tegani on phende jekh averese: “Na li amaro vilo thabilo ana amende ked vaćerđa amencar odrumal, ked mothovđa amenđe o Lila?” 33 I ko isto sati uštine irinde pe ko Jerusalim i arakhle čedime e dešujekhen hem adalen kola inele olencar. 34 I phende olenđe: “Čače o Devlikano (Gospod) uštino oto mule i mothovđa pe e Simonese!” 35 I vaćerde lenđe sa so ulo ko drom, i sar pendžarde Ole ked phaglja o maro. 36 Dok on vaćerde adava, o Isus terdino maškaro lende i phenđa lenđe: “Mir tumenđe!” 37 A on darandile hem ačhile bizo lafi, mislinde da dikhle duho. 38 A Ov phenđa lenđe: “Sose injen daravde? Sose sumnja đerdini ano tumare vile? 39 Dikhen mle vasta hem mle pre! Me injum! Pipinen man i dikhen adalese so e duho nane trupo ni kokala sar so dikhena da man isi. 40 I vaćerindoj adava, mothovđa lenđe ple vasta hem o pre. 41 On oti radost pana naštine te verujinen i dok čudinde pe, Ov phenđa lenđe: “Isi tumen li akate so xajbnase?” 42 A on dinde le kotor oto peko maćho. 43 I Ov lelja i xalja anglo lende. 44 Tegani Ov phenđa lenđe: “Akalai mle lafija save vaćerđum tumenđe pana dok injumle tumencar: sa valjani te pherđol soi pisime mandar ano Zakoni e Mojsijasoro, ano Proroci hem ano Psalmija.” 45 Tegani phravđa lengiri godi te razuminen o Lila, 46 i phenđa lenđe: “Ađahari pisime: 'O Hrist ka patini i o trito dive ka uštel oto mule, 47 i ano lesoro anav ka propovedini pe o obratiba zako oprostiba o greja zako sa o nacije, počindoj oto Jerusalim.' 48 Tumen injen svedoci adalestar. 49 I ače, bičhalava tumenđe o dindo lafi (obećanje) mle Dadesoro. A tumen ačhoven ani diz đikote na ka oven hurjavde ano zoralipe (sila) odupral.” 50 Tegani ikalđa len avri đi i Vitanija, i vazdindoj ple vasta blagoslovinđa len. 51 I dok blagoslovinđa len, ulo adava da cidinđa pe olendar i legardilo upre ko nebo. 52 I on lese teljardile ko kočija pa ani bari radost irinde pe ko Jerusalim, 53 i stalno inele ano Hram hvalindoj e Devle.