5
Epes sagahapifanai satalogofa waf itapafi
Epen mamahina nagahapifa Jisas anen Krais God nasapaꞌana nagafiꞌii, epen inimba awani Godi. Eaꞌ epes mamahisa ukup pagapagaila ahamas atotonai, esis ukup paipaila awasi ananisi wapani.* 1 Jo 4:15 Iꞌi apaꞌ ukup pipila God mila basef banagafi ananifi, atiasi waf afambai apaꞌ mogawa ukup paipaila awasi ananisi wapani.* Jo 14:15,23-24; 2 Jo 6; Mt 11:30 Waf kofagefa ma apaꞌ ukup pigapigaila Godafi afamba. Apaꞌ mondaila basef lo banagafi ananifi, ina ahifif aꞌowaꞌ, owaꞌatin.* Jo 16:33 Deiꞌ main, awasi mamahisa Godi isimba laꞌifis sagatalogofa waf itapafii. Apaꞌ mahapifa God deiꞌ waf afambai apaꞌ mikilaꞌ wandaf matalogofa waf itapafi awafi.* Ro 8:37; 1 Jo 4:4 Epen ami nikilaꞌ wandafa waf awafi eaꞌ natalogofa waf itapafi? Epen nagahapifa Jisas nagaꞌi anen Nogamana Godii, anin atin nikilaꞌaf.* Jo 1:29-34
God nawalapa basef alihifa Nogamana Ananinai
Jisas Krais maꞌuna aman anamba aꞌ nafiꞌi. Eaꞌ anen nofaꞌ baptaisa embel, ama main sahana nagaꞌ esimbel ananimbeli balo. Anen ina nafiꞌi ma waf embeli atef, owaꞌ. Anen nafiꞌi ma waf embeli esimbel endilisifi. Ambal buꞌunai Godi kofagonama waf endilisifi hiꞌalaf. Eaꞌ Ambal anamba nawalipasa basef ifimba ma Krais endilisifi.* Jo 15:26 7-8 Spirit Ambal Godi naloma embel esimbel isimba wanifis sawalapa basef kofagefa atifif.* Jo 5:32-37; Jo 8:18 Apaꞌ mahapifa basef epes sagawalipasafi. Apaꞌ basef God nagawalipapafi banagef fikilaꞌ basef epesi. Deiꞌ main, basef ifimba faꞌi Nogamana ananinai.* Ga 4:6 10 Eaꞌ epen ami nagahapifa Nogamana Godi, basef ifimba endilisifi fape nomon okom ananimi. Apaꞌ epen ami owaꞌ nigahapifa Godia, epen inimba naꞌi God aman nagambasoꞌami. Deiꞌ main, epen inimba ina nahapifa basef ifimba God nagaꞌifa Nogamana ananinai, owaꞌ. 11 Eaꞌ basef ifimba endilisifi naꞌamba. God aꞌ nasoꞌapa ambal namili ma mogape andeandeꞌ lifilafi dondol. Ambal namili alamba anen nasoꞌapala Nogamana ananinai atona.* Jo 3:36 12 Epen ami negape sisihina negaloma Nogamanai, inimba deiꞌ nefaꞌ ambal namili. Apaꞌ ami owaꞌ nepe sisihina Nogamana Godia, inimba ina nefaꞌ ambal namili ma negape andeandeꞌ lifilafi, owaꞌatin.* Jo 20:31
Apaꞌ mogawa eaꞌ apaꞌ mofaꞌ ambal namili
13 Aeꞌ andaꞌ basef fafeꞌmago ipaꞌ pagahipifa agol Nogamana Godi. Andaꞌefa ipaꞌ pegegawa deiꞌ apefaꞌ ambal namili pape andeandeꞌ.* Jo 14:13, 16:23; 1 Jo 3:21-22 14 Apaꞌ mogawa, iꞌi apaꞌ mila okom Godi atom mondabetena hiahawes mamahisa hiasi, anen atiasi nogameꞌ beten apeꞌinii. Eaꞌ nemaf mamahefa mefeꞌ felefeleꞌma anen mondabeten, ina ombal mohapa ma anen, owaꞌ. Ukup apeꞌipi pepe banagepa. 15 Apaꞌ mogawa anen nagameꞌ betena hiahawes mamahisa dei magahaliꞌanamasi. Eaꞌ mogawa deiꞌ aꞌ mape siꞌi mogofaꞌ hiahawes isimba eaꞌi.* Mt 12:31
16-17 Waf hiafi hiꞌalaf owaꞌ usiꞌifia afamba waf awafi. Epes sandaꞌ waf awafii sawala basef Godi banagafi. Apaꞌ waf hiafi awafi ina fendaꞌ epes sogagaꞌ lamonasi, owaꞌ. Iꞌi anin epen niti anin sahin owan ananini nendaꞌ anef waf awafi owaꞌ fendaꞌ epen inimba negaꞌ higililana, epen inimba nandaꞌ waf afambai aꞌ nendandaꞌ betena Goda, nogasoꞌan ambal namili. Endilisi, anef waf atetef awafi fandaꞌ epes sogagaꞌ lamonasi. Aeꞌ ina aꞌipipa ma pendabetena epes sandaꞌ waf afambai, owaꞌ.* 1 Jo 3:9; Jo 17:5
18 Apaꞌ mogawa epes mamahisa sagape awasi Godi, esis ina sape sandaꞌ waf awafi atapis, owaꞌatin. Deiꞌ main, nogamana Godi numafias andeandeꞌma banagami ananimi ma aman aunai ina nohambombagas, owaꞌatin.* 1 Jo 4:6 19 Apaꞌ mogawa apaꞌ awasi Godi, apaꞌ isimba owaꞌ awasi Godia sape lafela aman aunai Satan dembinai asasinai.* Jo 17:3
20 Apaꞌ mogawa Nogamana Godi nafiꞌi ma nosoꞌapa gawa ma mogogawa anen God endilisinai. Apaꞌ mape sisihipa ma anen endilisinai naloma Nogamana ananinai Jisas Krais. God anamba endilisinai anen kofagonama ambal namili mogape andeandeꞌ lifilafii.* 1 Ko 10:14
21 Awasi aeꞌipai, ipaꞌ pewaꞌ alafugaha god basoꞌamunai eaꞌ pendape banagepa.

*5:1: 1 Jo 4:15

*5:2: Jo 14:15,23-24; 2 Jo 6; Mt 11:30

*5:3: Jo 16:33

*5:4: Ro 8:37; 1 Jo 4:4

*5:5: Jo 1:29-34

*5:6: Jo 15:26

*5:7-8: Jo 5:32-37; Jo 8:18

*5:9: Ga 4:6

*5:11: Jo 3:36

*5:12: Jo 20:31

*5:13: Jo 14:13, 16:23; 1 Jo 3:21-22

*5:15: Mt 12:31

*5:16-17: 1 Jo 3:9; Jo 17:5

*5:18: 1 Jo 4:6

*5:19: Jo 17:3

*5:20: 1 Ko 10:14