20
Jisas notanima nosafel wapani
(Mt 28:1-8; Mk 16:1-8; Lu 24:1-12)
1 Akot ataꞌ tail, felefeleꞌma kuhumbita nemaf Sande Maria Makdalaiꞌwi kosafel kwafeꞌ matmat. Eaꞌ kwati otam ina ataꞌ masopama uta matmati, owaꞌatin. Anin epen nelefatam aꞌ mafeꞌ maꞌoh waꞌol. * Jo 13:23 2 Eaꞌ kotanima kwasagih kwafiꞌmai aeꞌi Saimon Pita wagapoma, aeꞌ alipuwai Jisasi okom magamagailai. Eaꞌ kwaꞌipafa kwaꞌi, “Anis safeꞌ sofaꞌ Dembinai nakwaha matmat asafeꞌ. Eaꞌ afaꞌ ina ogawana safeꞌ sambeꞌana anima.”
3-4 Eaꞌ eaꞌ aloma Pita wasagih wafeꞌ wataga matmat atamba. Wasagih wafeꞌ, apaꞌ aeꞌ ikilaꞌ Pita aliꞌ afaꞌ ataga matmat atamba. 5 Eaꞌ indiwa nembawa etawa ati luwaguf atif faꞌoh nomon apaꞌ ina awis nomon, owaꞌ. * Jo 11:44 6-7 Owaꞌ Saimon Pita nagiꞌmi nafiꞌi nataga eaꞌ nawis matmat bolotaf nomon. Eaꞌ nati luwaguf mogowaꞌanami atom maꞌoh, maloma anef lowaf mandaꞌaf mogowaꞌ balagonafi. Lowaf afamba sindiwaf sambeꞌaf faꞌoh anagon daiagon. Apaꞌ luwaguf ifimba anif faꞌoh dei. 8 Eaꞌ aeꞌ aliꞌ agafeꞌ matmat atambai agiꞌmana awis nomon ati hiahawes isimba aꞌ ahapifana. * Ap 2:24-32; 1 Ko 15:4 9 Nogota atamba afaꞌ ina ogawa basef fagail Buk Baibeli fagaꞌi Jisas nogaꞌ notanima nogosafel wapani, owaꞌ. 10 Eaꞌ afaꞌ biafa utanima wafeꞌ ipat.
Maria Makdalaiꞌwi kwati Jisas
(Mk 16:9-11)
11 Apaꞌ Maria atoꞌw kwalutu kwalopana matmat andoꞌ. Kwalutu kwalopana atin, kwasisil kwati bolotaf matmat nomon, 12 akwati ensel biam mala luwaguf afitimi mape anamba alop Jisasi dokoꞌ pagaꞌoma. Amom biam anona nape balaga Jisasi gagafeꞌma, anona boꞌwagah hagafeꞌma. 13 Eaꞌ mahaliꞌakw maꞌi, “Inaꞌ nalopa main?”
Eaꞌ akoꞌw kwagwamam basef kwaꞌi, “Anis asofaꞌ Dembinai aeꞌanai safeꞌ eaꞌ ina egawa anamba safeꞌ sagambeꞌanama, owaꞌatin.”* Lu 24:16; Jo 21:4
14 Kwaꞌipam basef ifimba ma eaꞌ, kwandambema owaꞌ kwati Jisas nalutu nalomaꞌw. Apaꞌ ina kogawa anen kwaꞌi Jisas, owaꞌ.
15 Eaꞌ Jisas nahaliꞌakw naꞌi, “Nemataꞌw, deiꞌ maina inaꞌ nagalef? Inaꞌ newandoꞌma ami?”
Akoꞌw okom maꞌi owaꞌ anona nandaꞌ maol aofi. Eaꞌ kwaꞌipana kwaꞌi, “Dembinai, iꞌi inaꞌ negefaꞌanama, niꞌipi anamba nefaꞌana nafeꞌ nagambeꞌanama?”
16 Eaꞌ Jisas naꞌipaꞌw naꞌi, “Maria.”
Eaꞌ kwandambema kwati anen kwaipana diga Hibrui kwaꞌi, “Rabonai.” Basef kofagefa faꞌi Dembinai Tisa.* Ro 8:29; Hi 2:11-12
17 Eaꞌ anen Jisas naꞌi, “Ina nigahapila alop aeꞌapi, owaꞌi. Deiꞌ main? Aeꞌ ina deiꞌ aꞌ itanima afeꞌma Ahame gani ilif ataꞌ owaꞌ. Inaꞌ nefeꞌma owape aeꞌami niꞌipam niꞌi, Aeꞌ aꞌ itanima ilita ilifa Ahame aeꞌanai a Ahamepa ipeꞌinai, efeꞌma God Dembinai aeꞌanai, a God Dembinai ipeꞌinai.”
18 Eaꞌ akoꞌw kwafeꞌma alipumi ananimi magapoma kwaꞌipam kwaꞌi, “Aeꞌ ati Dembinai eaꞌ!”
Eaꞌ kwaꞌipama basef ifimba anen nagaꞌipaꞌwafi.* Jo 19:38
Alipumi Jisasi matolona
(Mk 16:14-18; Lu 24:36-49)
19 Nemaf afamba Sande owamb, afaꞌ alipufai Jisasi wandakolas ondotowalo wape anota ipat nomon. Afaꞌ ombal mahafama amom dembami esis Judai. Owaꞌ Jisas nafiꞌi nalutu nalomafa naꞌipafa naꞌi, “Nelelemb ipeꞌilimbi bepe saꞌombel.”* Jo 16:22, 19:34; 1 Jo 1:1
20 Naꞌipafa basef ifimba eaꞌ, nihimbaꞌmafa lagufi lambeh ananisi. Eaꞌ afaꞌ wati Dembinai afaꞌinai eaꞌ, asonahafama anen aꞌowaꞌ.* Jo 17:18
21 Eaꞌ naꞌipafa wapani naꞌi, “Aeꞌ aꞌi nelelemb ipeꞌilimbi bepe awanalemb. Aeꞌ deiꞌ aꞌi esapaꞌepa pefeꞌ piꞌipasa basef Godi siꞌi Ahame nasapaꞌe afiꞌi agaꞌipipa.”
22 Naꞌipafa ifimba ma eaꞌ, aꞌ naomafa ambip naꞌipafa naꞌi, “Ipaꞌ pefaꞌ Ambal buꞌunai Godi. * Mt 16:19 23 Ama iꞌi pegakwaha waf awafi epen ami nandaꞌafi, God wapani aꞌ nokwahomanaf okom mosoꞌanaf. Apaꞌ iꞌi ipaꞌ owaꞌ pekwaha waf afamba awafia, God wapani ina atiasi nokwahef okom mosoꞌanaf, owaꞌatin.”* Jo 11:16, 14:5; Jo 21:2
Tomas nati Jisas
24 Anona ma afaꞌ 12-pelaifa alipufai Jisasi, Tomas agol waꞌagol Didimas. Kofagogola saꞌi maꞌmam kofolam atifi. Nemaf afamba Jisas nafiꞌi nagatolofa, Tomas ina nape nalomafa, owaꞌ. 25 Eaꞌ anom alipumi ananimi mafeꞌ maꞌipana maꞌi, “Afaꞌ wati Dembinai afaꞌinai eaꞌ.”
Owaꞌ Tomas naꞌipam naꞌi, “Iꞌi aeꞌ owaꞌ ataꞌ iti melegwa lagof ananigufi sagahana nigufa, ma esa faf aeꞌafi ma niguf fagawisa eaꞌ esapaꞌ lagol aeꞌagili guwis nomon lambeh ananimbihi, daoꞌ ihapifana. Apaꞌ iꞌi owaꞌ, owaꞌatin.”
26 Nimaguf 8-pelaif fefeꞌma eaꞌ, afaꞌ wape anota ipat nomon, ondotowalo wape. Afamba Tomas wapani nape nalomafa. Owaꞌ Jisas nawisi nalutu nalomafa naꞌipaf naꞌi, “Nelelemb ipeꞌilimbi bepe awanelemb.”
27 Eaꞌ naꞌipa Tomas naꞌi, “Dowa faf ineꞌifi fifiꞌi naꞌa. Eaꞌ niti lagof aeꞌagufi. Nesapaꞌ lagol ineꞌigili guwisi lambeh aeꞌambihi nomon. Ina okom bimbiafim mopaina, owaꞌi. Nindahapifi endilisi.”
28 Eaꞌ Tomas naꞌipana naꞌi, “O, Dembinai aeꞌinai, God aeꞌinai.”* 1 Pi 1:8
29 Eaꞌ Jisas naꞌipana naꞌi, “Inaꞌ natolowe eaꞌ, deiꞌ nahapifi. Apaꞌ epes ami owaꞌ sogatolowaia, sahapifi sonahas endilisi.”* Jo 21:25
Deiꞌ maina aeꞌ andaꞌ basef ifimba fagail buk akwaꞌe?
30 Jisas nandaꞌ hiahaom hiami banagami daiam siꞌi God nandaꞌami ma nogohnaep alipufai ananifai. Basefa hiahaom amamba ina andaꞌef hiꞌalef fape buk akwaꞌe, owaꞌ. * Jo 3:15; Ro 1:17; 1 Jo 5:13 31 Andaꞌ basef ifimba doꞌwanif atifa hiahaom amamba ma ipaꞌ pigahapifa Jisas anen Nogamana Godi, anen Krais, God nandandepana nasapaꞌana nagafiꞌii. Ma pihapifa agol ananigili pefaꞌ ambal namili pegape namipa dondol lifilafi.