Elihu anamdemurira Ayubu
1Vivi navoya Ayubu, unisikize,
na uphundze chila rorosi ndirogomba.
2Lola, nafwenula kanwa yangu,
ro lilimi ndani ya kanwa yangu rinagomba.
3Go nigombago gala moyo urio sawa,
nayo kanwa yangu indagomba go nimanyago.
4Roho ya Mlungu yeniumba,
na mseho wa iye Mwenye Nguvu Zosi unanipha uzima.
5Nijibu ichiwezekana,
panga manenogo vinono na ulumbe lauro mbere zangu.
6Lola, mimi ni dza uwe mbere za Mlungu,
mimi piya naumbwa na ulongo.
7Taphana sababu ya kuniogopha,
maneno gangu tagandakala maziho kpwako.
8Kpwa kpweli ukagomba,
nami nikasikira go manenogo.
9Uwe unaamba, ‘Mimi ni swafi, sina dambi,
sina ila wala uyi.
10Ela Mlungu akaona sababu ya kukosana na mimi,
na kunihenda nkale aduiwe.
11 Anafunga magulu gangu na magogolo,
na kulolato njira zangu zosi.’
12Lola, kpwa riri uwe una makosa,
mana Mlungu ni mkpwulu kuriko mwanadamu.
13Kpwa utu wani ushindane naye,
kuamba, ‘Kandanijibu hata neno mwenga?’
14Mana Mlungu nkugomba kpwa njira hino na hira,
dzagbwe anadamu taaphundza kpwa makini.
15 Mlungu nkugomba na atu kpwenye ndoso na ruwiya usiku,
anadamu agbwirwapho ni usingizi wa fungo,
wakati arere vitandani mwao,
16ndipho nkuavugula masikiro gao,
na kuaogofyera kpwa kuakanya,
17ili ariche mahendo gao mai,
na kuausira kudzikarya kpwao.
18Mlungu nkuzuwiya roho ya mutu isiinjire kuzimu,
maishage gasiangamike kpwa upanga.
19Mlungu nkumtiya adabu ya kulumiza pho phakpwe chitandani,
na kuhenda mifuphaye itsange bila kuricha.
20Nkuangamiza hamu yosi ya chakurya,
naye nkurema chakurya amendzacho.
21Iye nkuonda hata akakala mifupha mihuphu,
na kutuluka ngungundu ambazo kala tazionekana.
22A phephi asirirwe mbirani,
na maishage ganasengerera ajumbe arehao chifo.
23Chisha ichikala kuna malaika ko uphandewe,
mmwenga kahi ya maelufu,
wa kumuambira mwanadamu afwahago kuhenda,
24amuonere mbazi na aambe,
mtivyeni asitserezwe mbirani,
nina maripho ga kumtivira.
25Hipho mwiriwe undakala dza wa barobaro,
andaweza kuuyiza nguvuze za uvulanani.
26Iye nkuvoya na Mlungu nkukubali mavoyoge,
nkumuabudu Mlungu kuno ana raha.
Iye andasemurira ayae vira Mlungu arivyomtivya na chifo.
27Iye andaimba mbere za atu, aambe,
‘Mimi náhenda dambi nami silungire haki,
chisha siyariphizwa.
28Mlungu wativya roho yangu isitserezwe mbirani,
nami nindakala moyo nione mwanga.’
29Lola, Mlungu nkumuhendera mwanadamu,
gaga gosi kano mbiri au hata kano tahu,
30ili ativye rohoye kula mbirani,
na aone mwanga wa uzima.
31Hega sikiro unisikize uwe Ayubu,
nyamala nami ndagomba.
32Ichikala una ra kuniamba, nijibu,
gomba, mana nalonda nionyese kukala u wa haki.
33Ichikala kuna ra kulavukiza, kala zii,
niphundza, nami ndakufundza ikima.”