परमेश्वरया शहर, सियोन
कोरह वंशयापिनिगु भजन, लय् तइम्हसिगु निंतिं
1परमप्रभु तःधंम्ह खः,
परमेश्वरया शहरय्,
वय्कःया पवित्र पर्वतय्
वय्कः प्रशंसा याये बहःम्ह खः।
2परमेश्वरया पर्वत सियोन
तःजाः अले बांलाः।
तःधंम्ह जुजुया थ्व शहरं
संसार न्यंक लसता हइ।
3परमेश्वर थः हे यरूशलेमया
किल्ला खः,
उकिया रक्षा याइम्ह कथं
वय्कलं थःत क्यनादीगु दु।
4जुजुतय्सं जानाः
सियोन पर्वतय्
हमला याःवल।
5तर उकियात खनाः
इपिं अजूचाल।
इपिं ग्यानाः बिस्युं वन।
6ग्यानाः इपिं अन हे मूहाल।
मचा बू ब्यथा जूम्ह मिसा थें
इपिं वाथावाथा कन।
7पुर्बयागु फसं
तर्शीशया जहाजत
कुचाकुचा दः थें
छिं इमित नाश यानादिल।
8झीसं दकसिबय् बल्लाःम्ह
परमप्रभुयागु शहरय्,
झी परमेश्वरया शहरय् गथे
न्यनागु खः
अथे हे जूगु नं खना।
वय्कलं थ्व शहरयात
न्ह्याबलें रक्षा यानातइ।
सेला
9हे परमेश्वर! छिगु देगलय्
जिमिसं छिगु दया मायाया खँय्
ध्यान बियेगु याना।
10फुक्क थासय्
छिगु प्रशंसा जू।
पृथ्वीया फुक्क थासय्
छिगु नां थ्यंगु दु।
छिं खःकथं न्याय यानादी।
11सियोनयापिं मनूत लय्तायेमा!
छिं यानादीगु न्यायया हुनिं
यहूदाया फुक्क शहर
लसतां जायेमा!
12हे परमेश्वरया मनूत,
सियोनया प्यखेरं चाःहिलाः
ग्वःगः धरःग्वारा दु ल्याःखा!
13छं अन दनातःगु पःखाः
व किल्लायात
बांलाक दुवालाः स्व,
अले छं लिपाया पुस्तायात
कने फइ।
14छाय्धाःसा परमेश्वर न्ह्याबलें
झी परमेश्वर खः।
वय्कलं झीत न्ह्याबलें
लँ क्यनादी।