1Hitiry ami’ty foto’ Iisày ty singa’e,
vaho hitomiry boak’am-baha’e ty tora’e.
2Hipetak’ ama’e ty Arofo’ Iehovà,
ty arofon-kihitse naho faharendrehañe,
ty arofom-panoroañe naho haozarañe,
ty arofon-kilala naho ty fañeveñañe
am’ Iehovà.
3Ty fañeveñañe am’ Iehovà
ro mahafale ty arofo’e.
Tsy ty isam-pihaino’e ro hizaka’e,
tsy ty fijanjiñan-dravembia’e
ro hisafiria’e;
4Fa an-kavantañañe
ro hizaka’e o rarakeo,
vaho an-kahiti’e ro handilia’e
o mpirèke an-tane atoio.
Ho lafae’e ami’ty kobaim-palie’e i taney,
le ho zamane’e ami’ty kofòm-pivimbi’e
o tsereheñeo.
5Hidian-kamarentane ty vania’e
vaho hiteveke figahiñañe o toha’eo.
6Hitrao-pimoneñe ty marambolo
naho ty anak’añondry,
hiharo fandreañe ty farasy
naho ty anak’ose;
hifampireketse ty sarake
naho ty liona vaho ty vosy;
Anak’ajaja ty hiarake iareo.
7Hitrao-pihinañe ty añombe rene’e
naho ty dobe;
hiharo fandreañe o ana’ iareoo,
vaho hihota-ahetse manahake
ty añombe ty liona.
8Hihisa ambonen-davan-dapetake
ty ajaja minono,
hajo’ ty anak’ajaja an-doan-davam-boae ao ty taña’e.
9Tsy ho amy vohiko miavakey iaby ty hijoy ndra ty hamono;
fa ho tsitsike ty faharendrehañe
Iehovà ty tane toy,
manahake ty haatsa-drano’ i riakey.
10Ie amy andro zay, hitroatse ho viloñe am’ondatio ty Vaha’ Iesày,
le hipay Aze o Kilakila’ndatio,
vaho ho lifots’engeñe ty toe-pitofà’e.
11Ho tondroke amy andro zay te
hahiti’ i Talè fañindroe’e ty fità’e
hampolia’e ty sehanga’ ondati’eo,
Ty henka’ i Asore, naho
ty boake Mitsraime, naho
ty boake Patrose, naho
ty boake Kose, naho
ty boak’ Elame, naho
ty boake Sinare, naho
ty boake Kamate, vaho
ty boak’ amo tokonose andriakeo.
12Le hampitroara’e viloñe o fifeheañeo,
hatonto’e o naparatsake boak’ Israeleo,
vaho havori’e o naparaitake am’ Iehodà hirik’ an-kotsok’ efa’ ty tane toio.
13Hisitake amy Efraime ty fihàña’e,
naho haitoañe ty helo’ Iehodà;
tsy hitsikirìke i Efraime t’Iehodà,
le tsy hañembetse Iehodà t’i Efraime.
14F’ie hitsiritsioke am-pivariña’
o nte-Pilisty ahandrefañeo;
hitrao-pamaoke o anan-tatiñanañeo;
songa hampitora-kitsie’ iereo fitàñe
t’i Edome naho i Moabe;
vaho hiambane am’ iereo t’i Amone.
15Ho mongore’ Iehovà ty lela’
i ria’ i Mitsraimey;
le ami’ty tio’e mae mihoboboke
ty añelahelà’e ambone’ i Oñey ty fità’e
vaho ho fofohe’e ho torahañe fito,
hampitsaha’e ondatio an-kana.
16Le ho ami’ty sehanga ondati’e boak’ Asoreo ty lalañe dinamoke,
manahake tamy niakara’ o ana’ Israeleo
i Mitsraime.