1Mimosao o vantañeo

fe tsy haoñe’ ty arofo’ ondaty;

rambeseñ’ añe o matarikeo,

fe tsy eo ty mitsakore t’ie nampiengañe amy raty ho aviy.

2Mimoak’ am-pierañerañañe ao re,

mitofa am-pandrea’e eo iereo,

o mpañavelo an-kahiti’eo.

3Fe miharinea ry anam-pamoreke,

ry tirim-­pandrañaotse naho karapilo.

4Ia ty solè’ areo?

Ia ty ampivañavañà’ areo vava,

naho ibolobeaha’ areo?

Tsy anam-piolàñe hao ry

tirim-pandañirañeo?

5Inahareo mpañiri-­mena ambane’ kileo

ambane ze hatae mandrevakeo;

o mpamono ajaja am-bavataneo,

ambane’ o tevam-batoo.

6Amo vato nivañeñe an-goledoñ’ ao

ty anjara’o, mañeva azo zay,

mbore nañiliña’o engan-drano,

nibanabanà’o engan-kaneñe.

Hitsiñe amy tsaraeñey hao raho.

7Fa nalafi’o ambone vohitse mitiotiotse eo ty tìhi’o;

le nimb’eo hañenga soroñe,

8nañoreñ’ajiba amboho lalañe naho tsotsoke ao;

ie nañafa-tsaroñe fa tsy amako,

niañambone, namelatse i tihi’oy,

le nilahatse am’ iereo

vaho nitea’o ty tihi’ iareo

te nitsikaoreñe.

9Nomba’o reke-tsolike i mpanjakay,

le nampitomboe’o o rano-mañi’oo,

nampihitrife’o añe o sorotà’oo,

ihe nihotrake mb’an-tsikeokeoke ao.

10Nahamokotse azo ty halava’ i lia’oy;

f’ie tsy nanao ty hoe:

Po-pitamañe.

Nisolebatse indraike ty fañiria’o,

vaho tsy nilesa.

11Ia ty nihembaña’o naho nañeveña’o?

Akore te nandañira’o naho

tsy nitiahie’o vaho tsy nitsakorea’o?

Kanao hatr’ela’e ty nitsiñako

ihe tsy mañeveñe amako.

12Ho taroñeko ty hamarentane’o,

naho o fitoloña’oo—

f'ie tsy ho vara ama’o.

13Ihe mitoreo,

hahahah’ azo hao o raha nahoro’oo;

fa fonga hasiotsion-tioke,

ho vavèn-kofòke mb’eo;

fa ho fanaña’ i mitsoloke amakoy i taney, vaho ho lovae’e i vohiko miavakey.

14Le ho koiheñe ty hoe:

Ahifiho mañambone,

Aobòño ambone ey,

afaho iaby ze sebañe

an-dala’ ondatikoo.

15Fa hoe ty nafè’ i Antiotiotsey,

i Andindimoneñe mpimoneñe

an-tsi-fimodoañey,

ie kanjieñe ty hoe: Masiñe.

Zaho mpitoboke amy abo naho masiñey—mpiamako ty mibàboke

naho ty mirèke añ’ova’e ao,

hameloñe ty arofo miambane,

vaho hampibodañe ty troke misoloho.

16Toe tsy ­hifañotakotake nainai’e raho,

vaho tsy ho boseke kitro katroke;

hera hamoe’ay o troke aolokoo,

naho o arofo nitsenèkoo.

17Ty haratia’ i fihaña’ey ty nibosehako naho nandafàko,

nietake am-pifomboan-draho;

f’ie nitolom-piola

ami’ty fombàn-tro’e.

18Fa nitreako o sata’eo,

fe ho jangañeko;

naho hiaoloako, vaho ho vaoeko ama’e

naho amo mpandala’eo ty fañohòañe.

19Zaho ty mitsene o vokam-pivimbio;

fanintsiñañe, fanintsiñañe,

amy tsietoitaney naho

amy marivoy, hoe t’Iehovà,

vaho ho melañeko.

20Fa manahake i riake mivalitaboakey

o lo-tserekeo;

amy te tsy mete mipendreñe,

vaho aretsa’ o ranoo mañambone

ty leotse naho loto.

21Tsy am-pierañerañañe

o rati-tserekeo.

hoe t’i Andrianañahareko,