1Inao! fa nitreako iaby zao,

tsinano’ ty sofiko vaho maharendreke.

2Ze fohi’areo, apotako ka;

Zaho tsy zai’ areo.

3Fe te hivolañe amy El-Sadai raho,

te hifanointoiñe aman’ Añahare.

4Mpanosoke vande nahareo,

songa mpanaha tsy manjofake.

5Ehe t’ie vata’e nianjiñe,

le ho natao hihitse!

6Ehe janjiño ty havereko,

vaho janjiño ty fanoroan-tsoñiko

7Hisaontsy hamengohañ’ aman’Añahare hao,

hilañona’areo famañahiañe?

8Handombok’ aze v’inahareoo?

h’ondati-aivo, mpihalaly ho an’Andrianañahare hao?

9Hahasoa anahareo hao te itsikaraha’e?

Hamañahy Aze hao nahareo

manahake ty famañahiañe ondaty?

10Ie ho trevohe’e

te mirihy añ’etake.

11Tsy hampangebahebak’ anahareo hao ty enge’e?

naho hivotrak’ ama’ areo ty fañeveñañe.

12Oha-drehan-davenoke

ty onin-taro’ areo,

fiaron-dietse ty fikala’ areo.

13Mianjiña, apoho raho hivolañe

le adono ho amako ty toly.

14Ino ty andrambesako?

ami’ty nifeko ty nofoko,

vaho apoko an-tañako ty fiaiko.

15Ndra te havetra’e, ie ty fatokisako

fe hiverok’ añ’atrefa’e raho

ty amo satakoo,

16Vaho zao ty ho fandrombahañe ahy:

te tsy hiatrek’aze ty tsy aman-Kake

17Tsendreño o entakoo,

naho ty lañonako an-dravembia’ areo.

18Ingo, fa nalahako i tarokoy,

apotako te hahazo to.

19Ia ty hifanjomotse amako?

le ho nitsiñe amy zao raho

vaho nikenkañe.

20Ehe ty raha roe avao

ty tsy hanoa’o ahy,

le tsy hietahako o lahara’oo.

21Ahankaño amako ty fità’o,

le ehe tsy hampianifañe ahy

ty fañeveñako ama’o

22Ie amy zao koiho, le hanoiñe raho,

ke angao hivolan-draho vaho toiño.

23Fire o fandilarako naho hakeokoo?

Ampahafohino ahy ty fiolako

naho o tahikoo,

24Akore te añetaha’o laharañe,

vaho manao ahy ho rafelahi’o?

25Hampititititihe’o hao ty ravets-atae

asiotsion-tioke,

ho heañe’o hao ty kafo maike?

26Fa anokira’o raha mafaitse raho,

vaho ampandova’o ahy

o hakeoko te niajalahy.

27Añombea’o longòke o tombokoo,

naho efera’o ty ho nilian-tombokoo.

28ie mihamomoke hoe raha lo raho,

hoe saroñe nihanem-bararaoke.