2Hatretrè’ ty mpandietse hao

t’i El-Sadai?

Manoiña, ry mpañeretse

an’ Andrianañahareo.

3Nanoiñe Iehovà ami’ty hoe t’Iobe:

4Intoy o tsy manjofakeo;

ino ty hahatoiñako azo?

Hampikapefe’ ty tañako ty vavako.

5Indraike ty nivolañeko

fa tsy ho tovoñako;

eka, indroe, fa tsy ho losoreko.

6Aa le nanoiñe Iobe t’Iehovà boak’

an-talio ao, ami’ty hoe,

7Midiaña hoe ondaty;

hañontaneako

le ihe ty hitaroñe amako.

8Hafote’o hao o zakakoo?

Hamatse ahy rehe, hahazoa’o to?

9Amam-pitàñe manahake

añ’Andrianañahare v’iheo?

Mahafañotrok’ am-peo

hambañ’ ama’e hao?

10Mihamina amañ’engeñe

naho havañonañe;

misaroña asiñe naho volonahetse;

11Adoaño o habose’o mandopatseo;

jilovo ze hene mpirengevoke

vaho afotsaho.

12Fonga rendreho ty mpibohaboha,

le arèho;

lialiao ambane o lo-tserekeo.

13Akafiro hitraofa’e an-debok’ ao;

vahoro añ’etak’ ao o lahara’ iareoo.

14Le hiantofako ama’o te mahafandrombak’ azo o fità’o havanao.

15Oniño hey ty Behemote,

i naharoko fitseneañe ama’oy;

mihinañe ahetse re manahake o añombeo.

16Heheke te am-poto-pe’e ao ty haozara’e, amo ozan-tro’eo

ty hafatrara’e.

17Atora-kitsi’e hoe talý ty ohi’e;

mifamanditse iaby o talin-ozan-toha’eo.

18Boda torisike o taola’eo,

hoe tsotsò-by o kitso’eo

19Ie ty lohàñe amo satan’ añahareo;

I namboatse azey

ro mahafitotok’ ama’e am-pibara.

20Toe mamahan-kaneñe aze o vohitseo,

amy fihisa’ o bibin-kivoke iabioy.

21Mandre ambane’ sohihy eo re,

am-pipaliram-binda

an-tane manginakinak’ ao.

22Mañalok’ aze ty talinjo’ o ­sohihio; miarikoboñ’ aze iaby

o bararata añ’olon-dranoo.

23Tsy ihondrahondrà’e

ty fandipora’ i sakay;

mahasibeke re ndra te isorotombaha’

Iordaney mb’am-bava’e.

24Eo hao ty hahatsepak’aze te mañente; eo hao ty hahafangirike i oro’ey

hampikavitse aze?

25Mahatarike i *Leviatàne

am-bintañe v-iheo?

hatindri’o ambane an-tàly hao i lela’ey?

26Lefe’o hao ty mampikiviro i oro’ey,

ndra ty hangirike

i soma’ey am-pengoke?

27Hanao lako halaly ama’o hao re?

Ke hivolañe mora ama’o?

28Hifañina ama’o hao, handrambesa’o aze

ho fetrek’oro’o kitro katroke?

29Ho hisà’o hao hoe voroñe?

ke ho tantalie’o ho amo anak’ ampela’oo.

30Hifampihehetse ama’e hao

o mpanao balikeo?

Ho zarae’ iareo am’

o mpanao takinakeo hao re?

31Ho tsitsihem-pirango hao i holi’ey?

Ndra i loha’ey an-defom-piañe?

32Apaoho ama’e ty fità’o vaho tiahio i ho ali’oy te tsy hindroe’o.