Ala, nanfera i mɛxi nxu ra habadan?

Nanfera i xɔlɔma i ya yama kantanxin ma?

2I xaxili lu i ya yamaan xɔn ma,

i naxan xunba xabu waxati xunkuye,

bɔnsɔnna naxan findixi i gbeen na.

I nama ɲinan i dɔxɔden Siyon Geyaan xɔn.

3I xun ti taa xɔnni ito ra.

Nxu yaxune bata kala gbeen ti yire sariɲanxini.

4Nxu yi naralanma i ra dɛnaxan yi,

I yaxune sɛwaxin bata sɔnxɔn nate mɛnni.

E yi e taxamasenne yite na yi.

5E liga mɛnni alo xɛɛ sɛgɛne

naxanye fɔtɔn wudine sɛgɛma e bunbine ra.

6E na sawura wudi tofaɲine birin kala

e bunbine nun e dɛgɛmane ra.

7E tɛɛn so i ya Yire Sariɲanxin na,

a gan fefe.

E yi i xinla batuden naharamu.

8E yi a mirixi, e naxa,

“En ne birin naxɔrima nɛn feu!”

E yi Ala batudene birin gan yamanani.

9Nxu mi fa kabanako taxamasenne toma.

Nabi yo mi fa na sɔnɔn.

Nxu mi a kolon na buma han waxatin mundun.

10Ala, i yaxune i magelen danma waxatin mundun yi?

E luma i xili kalɛ nɛn ba,

han habadan?

11I tondixi nxu maliyɛ nanfera?

I yiini bandun, i yi e raxɔri!

12Ala, i tan nan nxɔ mangan na

xabu a fɔlɔni.

I tan nan marakisi tiin na dunuɲa yi.

13I tan nan fɔxɔ igene yitaxun i sɛnbɛni.

I mɔn yi ige yi sube ɲaxine xunne yibɔ.

14I tan nan ige yi sube magaxuxin xunne kala.

I yi a so burunna subene yii donseen na.

15I tan nan tigine nun xudene ramini.

I tan nan baane yixara.

16I tan nan gbee yanyin nun kɔɛɛn na.

I bata sogen nun kiken dɔxɔ e yirene yi.

17I tan nan dunuɲa danne rafalaxi.

I soge furen nun ɲɛmɛn da.

18Koni Alatala, i xaxili lu ito xɔn ma:

i yaxune gelema i ma!

Xaxilitarene i xili kalama!

19I nama i ya yamaan nabeɲin

alo ganbana sube xaɲɛne yii!

I nama ɲinan i ya muxune xɔn mumɛ,

naxanye tɔrɔxi.

20I xaxili lu i ya layirin xɔn ma,

bayo bɔxɔn yire yi fɔrɛne rafexi gbalotɔne ra.

21I nama tin muxu ɲaxankataxine yi yarabi,

alogo yiigelitɔne nun tɔrɔ muxune xa i xinla matɔxɔ.

22Ala, keli i yi i yɛtɛ xun mayɛngɛ!

I xaxili lu a xɔn,

a xaxilitarene i magelema fɛriɲɛn gbɛn!

23I nama ɲinan i yaxune sɔnxɔ xuiin ma,

i yɛngɛfane e xuini tema mumɛ!