1Kwabenali, sonoga iyogayoga kolimiu kainana lalakina mena. 2Koya pwatana mena na kamwasa mena itotolo. 3Yanuwa kamwasali kaba lusalusaena kolili iyogayoga, 4iwaloba, “Tomo meuloimiu yanuwa yaulina mena, kainagu lalakina mena yawalowalo kolimiu, 5komiu nige ami katai yabo, katai matumatuwana kwaloyai. Komiu toyauyaule, nuwamayale kwaloyai. 6Kwabenali kaiwena walo namwanamwali kani yawalowegili kolimiu. Sopagu mena walo dudududulaili siyawatagilima. 7Gamwagu mena yawalo yawasosi kolimiu kaiwena mwakota yakalomagigilan. 8Walone yawalowegili nige yabo yauyaule, meuloili sidudulai. 9Tomo siya me ali nuwamayale sikatai yagu walo meuloili sidudulai yo tomo siya me ali katai sikatai yagu walo sikapwa. 10Yagu walo kwaloyai kabo muli mena gole yo siliba.

11Kaiwena sonoga iwasawasasosi kabo veku pigapigabuli namwanamwaliyao. Nige ginauli yabo tomo nuwanuwali yanuwa yaulina mena kana namwanamwa besiele iya. 12Yau sonoga me yagu nuwa-mayale yo me yagu katai. 13Tem naenaena ukalomagigilan ee kabo Yeoba kana matamatausi imiyamiya koliwo. Gagasa yo nuwasaesae, mumugana yauyaule yo walo naenaeli meuloili yakalomagigi-lagili.

14Nuwatu namwanamwana yaolena tomo kolili yo yasaguili na paisowa namwanamwali sipaisowaili. Me yagu nuwamayale yo me yagu katai. 15Yau yasaguili kinyao siloina yo toloinao loina dudududulaili siginauliline. 16Gavana meuloili yanuwa yaulina mena siyapaisowayau na ali yanuwa siloiloina-yagili. 17Siya meuloili simulolo koliyau yau tabe yamulolo kolili, yo siya meuloili siloyaiyau silobaiyau. 18Yau koliyau tomo silobai miya namwanamwana, yakasisi yo wasawasa. Na wasawasane ilaulau kanasiga. 19Uwegu sinamwanamwasosi kabo muli mena gole namwanamwana. Yo yagu etulanne siliba namwanamwasosina inamwanamwa-gabaen molosi. 20Yalokeikeile loina dudulai kana kamwasa koina, 21siya simulolo koliyau ali nume kaloli mena wasawasa sikalapowon masumasuwe. 22-23Sauga bagubagunana koina Yeoba iyamayale-baguna-yagau kabo muli mena yanuwa yaulina. 24Yau yamiyamiya kabo Yeoba kalita yo doelu iyamayaleli, 25besiele koya lalakili yo kikiuli tabe. 26Yau yamiyamiya kabo Yeoba yanuwa yaulina yo bubu yo bwatano iyamayaleli.

27Saugana bulibuli ipei ana dedei koina yo kalita kana sigasiga iginauli yau tabe yamiyamiya. 28Saugana yaloyaloi ipeili ali dedei mena yo waila bunubunuwasili ikatububunagili yau tabe yamiyamiya. 29Saugana kalita ana sae kana sigasiga iloinayan yo saugana yanuwa yaulina kana wauwau ipei, yau tabe yamiyamiya. 30Ana paisowa meuloina inuwanuwatuili mekaukava yo sauga meuloina yayaliyaya lalakina. 31Iya te yau kayaliyaya ama yamayamayale paisowana meuloina koina, bulibuli, yanuwa yaulina yo tomo. 32Kabo komiu tomo meuloimiu, yagu walo kwabenalan yo kwamuliya kabo kwayaliyaya.

33Yagu yakayakatai kwaobigai. Me ami sonoga kwanuwatu-kalatan. 34Tomone iya yagu walo ibenalan kani iyaliyaya kaiwena iya itotolo yagu nume kana gamwa mena kaliyate kaigeda kaigeda isanasanaiyau. 35Siya analiyao silobaiyau yawasili silobaili kabo Yeoba kani iyaliyaya kolili. 36Na siya analiyao nige silolobaiyau sibomayoi siyakamkamnali. Yaiya tem isikotanagau imulolo boita koina.”