1Walo bwaite kin Lemueli sinana ana yakayakatai natuna koina. 2“Natugu, beyabeyana kowa yakabiwo mwa yamuloloiwo. Yakawanoi Yaubada koina kabo iyeyawa koliyau. Yagu walo kubenalan. 3Tabu am mane kuyayavenuwan sinesineo kolili kaiwena siya nuwanuwali tomo meuloili yo kin ali paisowa sisibayanaeli.

4Lemueli, nige idududulai tem kin wain sinumanuma. Nige inanamwanamwa tem toloinao nuwanuwali lalakina waila kaikaiwena sauga meuloina. 5Tem siginauli besiele loina lalakiliyao sipeiliko kani sinuwa-mwatainagili kisi tobubutuma nige loina dudududulaina silolobai. 6Wain taolena tomo siya kikiunamo siboita o nuwana siya tomo me ali nuwapolowe lalakina. 7Siya wain sinuma kabo ali kamkamna yo ali nuwapolowe yo ali bubutuma sinuwa-mwatainagili.

8Kutolo yo kuedeedede siya tomatausi yo siya nige ali kaiwe ipapagan kaiweli. Kuwalo am toloinao kolili tem siya nige ali gogo sisaguili. 9Kutolo kaiwe yo kuloina dudulai siya toeoma yo tobubutuma molosi kaiweli, kusaguili.”

10Yaiya sowasowana sine namwanamwana ilobai? Iya maisana ilalakisosi kabo muli mena veku wasawasali maisali. 11Wainena tau sinene imeliyan katena meuloina koina kabo nige eoma yabo koina. 12Sinene wainena isagusagui kanasiga iboita. 13Sipi wiyana iloyaloyai yo sauga meuloina kaleko ikonakona. 14Besiele waga ali gogo sitaulili kelamamalawe mena sinene kan meuloina igimwalaili yo ikalailima. 15Malala kikiuna koina itolo yo kan ikatububu yo iwolena ana susu meuloina yo ana topaisowao sinesineo tabe. 16Bwatano yabo igitesipwai kabo igimwalai na koina oine kana tano ipaisowai. 17Ipaipaisowa me ana kaiwe na nige ikakaiyawasi. 18Boniyai kaigeda kaigeda ipaipaisowa kabo mane kana etulan ilobalobai.

19Kaleko ikonakonali sauga meuloina. 20Tobubutuma isagusaguili. 21Nige inuwanuwatu sauga tulutulu kaiwena, kaiwena kali kaleko ikonaliko ana susu meuloili kaiweli. 22Tabe ana kaba keno kana suma ikonaliko yo iboma kana kaleko kali koleya sinamwanamwasosi. 23Wainena wasana ilalaki kaiwena iya toloina yabo ali kaba miyagogo koina mekanakavao. 24Kaleko namwanamwali ikonali yo beleti namwanamwali ipaisowaili na igimwala-yagili togimwala kolili.

25Saugana iyawatagili ilokeikeile kana kaleko iluwuili me ana gagasa yo me ana katepatu inuwanuwatu sauga ilalaoma kaiwena. 26Me ana sonoga iedeedede yo mumugana bigabigana mena iloiloina. 27Natunao igite-kalatan namwanamwaili kisi mumugali nige sidududulai tomo manli mena yo nige sauga yabo ilolo-bwagabwaga. 28Wainena yo natunao sitolo yo siwalo-muloloi. Tabe wainena itolo yo itobalan iba, 29“Sine, am paisowa inamwanamwasosi kabo muli mena sinesineo meuloili ali paisowa.”

30Sine kana koleya namwanamwana nige imimiyayai na sinene iya Yaubada iyakasisiyan ilonamwayagila tatobalan. 31Sinene maisana taolena ana paisowa namwanamwana kaiwena. Kabo ilonamwayagila tatobalan tomo meuloili manli mena.