1Natugu, tabu yagu yakayakatai kununuwa-mwatainan, na yagu walo koliwo ukwabi-kalatagili katem mena, 2kaiwena tem yagu walone kunuwatu-kalatan kani am bolime imamalawe na kuwasawasa. 3Kutalam mulolo yo meli sikalapowon koliwo, ugwaloili galogalom koina yo kuleleli katem mena. 4Tem uginauli besiele, kabo Yaubada yo tomo meuloili kani esam sikeleisin yo sitobalanagiwo. 5Yeoba kana meli meuloina kupei katem mena na tabu kubomamo am katai koina kumemeli. 6Kuobigai sauga meuloina kabo isaguiwo yo am lau kani ikabi-yamalamalaeli.

7Tabu am nuwatu mena kusosonogasosi, na Yeoba kumatausan yo mumugana naenaena kusikotanan. 8Tem uginauli besiele, kani yom sikaikaiwe yo tabe tuwatuwam simatuwa.

9Am wasawasa koina Yeoba kuyakasisiyan yo am bwatano uwena bagubagunana kuwolena koina, 10kabo am lakawa meuloili kani sikalapowon masumasuwe.

11Natugu, tem Yeoba iyokoi-yagiwo tabu me am munamunai yo tabu ana walo ukawa-naenaeyan, 12kaiwena iya mumugana besiele tama namwanamwana, natunao iyokoi-yagili me ana mulolo kaiwena siya ana kaba yaliyaya.

13Tomone sonoga yo katai kana nuwamayale ilobaili Yaubada iwalo-muloloi, 14kaiwena sonoga kaba sagu lalakisosina kabo muli mena siliba yo gole. 15Sonoga iwasawasasosi kabo muli mena veku pigapigabuli yo wasawasali kabo muli mena ginauli meuloina tomo nuwanuwali. 16Sonoga besiele sine itotolo, nima ulaulana mena miya malamalawena ikabi-kalatan, nimana gegebana mena wasawasa yo yakasisi ikabi-kalatagili. 17Ana kamwasa meuloili kolili siyawatagili yaliyaya yo nuwadaumwali.

18Sonoga besiele yawasi mayauna, kabo siya meuloili nuwanuwali sonoga mwa sonogane sikabi-kalatan Yaubada ana walo-mulolo silobai.

19Sonoga koina Yeoba yanuwa yaulina kana wauwau ipeili, yo katai koina bulibuli ikatububunagili. 20Ana katai koina kalita iyakasali yo yaloyaloi koina iwalo galewa italu.

21Natugu, am paisowa meuloina koina, me am nuwamayale yo kuyakasa-yadudulai sauga meuloina. 22Tem uginauli besiele yawasi namwanamwana kulobai yo am sonoga kani iyamala kam galogalo ugaloi galogalom mena. 23Kabo kani nige kusisilae am kamwasa koina, kaekaem kani nige itutupa na kubebeku, 24yo am kaba keno koina kani nige kumamatausi, kani ukeno namwanamwa. 25Kani nige kununuwatu silae kaiwena. Yo tabu me am matausi silaene iya kani tonaenaeli isibayanaeli, 26kaiwena Yeoba mekamkava ikabi-yakaiweo igite-kalatagiwo tabu kubebeku tonaenaeli ali sipwasipwa koina.

27Tem todudulai yabo ilaoma koliwo sagu kaiwena ikawanoi tabu kusisikote. 28Tem gogo siyaele koliwo na kamkava yabo ilaoma na ginauli yabo ikawanoiyan tabu kuwaloba, “Bwaliga kupileyoima kabo yaeyawa.” Nigele, bwai kuwolena mowoi. 29Tabu kamwasa naenaena kunuwanuwatui kamkava kaiwena, kaiwena iya imiya-daumwali salim mena yo ana meli ipeiyako koliwo. 30Tabu ginauli naenaena yabo ugiginauli kamkava koina kaiwena iya nige ginauli yabo naenaena igiginauli koliwo. 31Tabu mumugam besiele kaleya toyatubu mumugana, 32kaiwena Yeoba toyauyaule ikalomagigi-lagili, na todudulai iedeedede kolili yo ikawa-elieliyam-wagili.

33Tonaenaeli bodali Yeoba ana kawa-gula silobalobai, na todudulai Yeoba ana walo-mulolo silobalobai. 34Siya togagasa sitalatalawasi sauga meuloina Yeoba italawasi-yagili, na siya tonuwalobi mulolo lalakina iwolena kolili. 35Siya me ali sonoga Yeoba esaliyao ikeleisinagili, na siya toyauyaule iyamwalimwalineli.