1Natuguwao, yau tamamiu yagu walo kwabenalan namwanamwai na ami katai ilalaki. 2Yawalowalo dudulai kolimiu kabo yagu yakayakatai kwanuwatu-kalatan. 3Yagu sauga gamegame koina, nige dugu nige kaukava, 4tamagu iguguyaiyau iwalo koliyau iwaloba, “Yagu walo meuloili kaiweli kunuwanuwatu, yagu loina kuobigaili kabo kumiya-namwanamwa.” 5Iwaloyoi iba, “Me am sonoga yo me am katai, tabu yagu walo kununuwa-mwatainagili, meuloili kuobigaili. 6Tabu sonoga ukakawa-naenae-yan kaiwena bwaliga am sonoga kani isaguiwo nige sowana kusilae. Kumulolo sonogane koina kabo kani igite-kalatagiwo.

7Sonoga iya ginauli namwanamwasosina koinaele ukwalai bwagana am loyane koina kuyamala tobubutuma na kutonan tem sauga meuloina am nuwatu idudulai yo katai ukwalai. 8Tem nuwanuwam lalakina sonoga kani sonogane esam ikeleisin, tem ukwabi-kalatan kani yakasisi kulobai. 9Yo sonogane kani miya namwanamwana iyeyawa yo am yaliyaya kani iyamala am kaba gagasa besiele kam pwaopwaom wasawasana kulukulum mena.”

10Natugu, yagu walo kubenali-kalatan, kabo am bolime imamalawe. 11Yayakayakataiwo sonoga kana kamwasa koina yabaguna-yagiwo kamwasa namwanamwali kolili, 12na tem am lokeikeile koina kaekaem simalamalae, kabo saugana kusagena kani nige kubebeku. 13Yagu yakayakatai ukwabi-kalatan me am kaiwe kisi ukabi-gabaegili, kaiwena kani yawasim sigite-kalatan.

14Tabu kaekaem kupepei tonaenaeli ali kamwasa koina yo tabu mumugali ipapanaisiwa koliwo. 15Kulosuwala molosi kolili, ali kamwasa kulogabaen na kulau am kamwasa koina. 16Sauga meuloina sinuwanuwatu mumuga naenaena kaiwena. Nuwanuwalimo tem tomo yabo sikabi-yabeku kabo me ali nuwadaumwali yo sikeno. 17Paisowa naenaena ali kaba kekan yo kaleya ali kaba numa.

18Todudulai ali kamwasa besiele dabwelo ana tunsae mayalena ilalaki ilaolaoma kanasiga pwasinasina. 19Na tonaenaeli ali kamwasa besiele boniboniyai, ali kaba beku yaina nige sikakatai.

20Natugu, yagu walo meuloili kubenali-namwanamwaili yo kunuwatu-kalatagili. 21Sauga meuloina ugitagitaili yo ukwabi-kalatagili katem mena, 22kaiwena siya yawasi yaina siya analiyao silobaili sinamwanamwa.

23Ginauli lalakina bwaite, katem ugite-kalatan kaiwena iya yawasi yaina. 24Tabu walo naenaeli siyayawatagilima gamwam yo sopam kolili. 25Manim ilaulau kamwasa dudulaina koina. 26Ugite-kalatagiwo kisi kaekaem kamwasa dudulainane ilogabaen. 27Tabu ugogolulau gegebam mena o nuwana ulaulam mena kisi kaekaem siwoyaiwo naenaena koina kubeku.