1Natugu, gubesi, kuwaloyameli yakato toloyaga yabo kusagui kana yagane koina na nige sowasowam* 2bwaimwa koina kubomamo kam sipwasipwa kuyou yo koina kusipwai am walo bagubaguna kaiwena. 3Tem uginauliyako besiele kabo yagu guguye kumuliya na tem livasi kulobai toloyagane nimana mena. Mwayamwayau kulau na me am nuwalobi ukwawanoi na inuwatu-pwaikiwo am waloyameline kaiwena. 4Tabu ukwekeno kanasiga kulau na uginauli besiele. 5Kubomayoi kulivasiwo besiele man o polo yabo sipwasipwa koina iyabubu-suwala.

6Todagela-kololo ilonamwayagili tem memanu ali paisowa sigitai na ali katai sietulan. 7Bwagana memanu nige ali tobaguna, 8na iyamo sauga namwanamwana koina siesagusagu-wagili na kali sitano-gogon ali lakawa koina tulutulu kanna kaiwena. 9Na todagela-kololo ikenokeno sauga imamalawe. Tawanesana kani itolo? 10Iwaloba, “Kani yakeno sauga kubwakubwana yo nimagu yayakaiyawasili.” 11Na saugana ikenokeno ana gogo wasawasa kani sikwalalele yo itolo yo ilobai ibubutuma, kana koleya besiele tokewali silaoma boniyai mena yo ana gogo sikewalili.

12Toyauyaule yo tonaenaeli sitakitakikili gamwali sikalapowon mwakota kolili, 13kilakilala siginaulili manli mena o nuwana kaekaena kolili o nuwana nimali gibuli kolili yakato naenaena siginauli, 14yo sauga meuloina nuwatu naenaeli sinuwanuwatuili tem kaleya siyatubu. 15Mwa koinaele kani sisilae mwayamwayau yo siboita yo nige kaba saguili yabo.

16Yeoba ana kaba kalomagigili bwaite besiele. 17Gagasa, mwakota, tomo dudududulaili kali unuyamate, 18nuwatu yauyauleli yo kaleya kana tubu. 19Besiele tabe siya simwakomwakota kalikavao kaiweli yo siya kaleya siyatuyatubuli ali boda kaloli mena ikalomagigi-lagili.

20Natugu, tamam ana walo kubenalan yo sinam ana yakayakatai kuobigai. 21Ali guguye kupei katem mena yo sauga meuloina kunuwatu-kalatan. 22Kabo saugana kulokeikeile ali walone kani sisaguiwo kaliyate yo boniyai sigitegite-kalatagiwo. 23Ali yakayakatai kani iyamala besiele mayale ipigapigabu, ali guguye kani miya namwanamwana kana koleya siyakena-yagiwo. 24Ali walo kani sigite-kalatagiwo sinesineo yauyauleli kolili yo tokasole sinesineo ali walo luviluvili kolili.

25Sinesineo kali koleya sinamwanamwa na tabu ali walo luviluviline kubebenalagili yo tabu kulalau kolili kisi kubeku ali sipwasipwa koina. 26Sine ganaganawalina nuwanuwanamo am mane kikiuna ikalai na tomo uloina wainena kani am miyamiya isibayanae. 27Gubesi, sowasowana mayau wedowedolina ukabi-kalatan kam kaleko koina na nige iwewedoli? Nigele, kani iwedoli. 28Sowasowana kulokeikeile mayau wedowedolina pwatana mena na kaekaem sinamwanamwa? Nigele, nigele molosi. Sinesineone besiele kani sigabuwo. 29Besiele tomone ikeno tokasole sine yabo mekanakava, kani maisa polopolowena ilobai. 30Tem tomo yabo iguliyamsosi kabo kan ikewali ikekan tomo meuloili kani nige sikakalomagigilan, 31na iyamo saugana silobai maisana kani ipolowe, ana gogo meuloili kani sikalaili.

32Na tem tomo yabo iganawali iya tomo yauyaulena yo kulukuluna gaibuna kaiwena ibomayoi isibasiba-yanae. 33Kani siunu-gwalagwalai yo kana mwalimwaline imiyayai. 34Kaiwena sinene wainena kani imunamunaisosi yo nuwanuwana kana gum iyai, 35yo bwagana tonaenaenane itonan tem mane lalakina iwolena sinene wainena koina na iyamo tomone kani isikote genuwana.