1Dawa, maynamot do inchirinaya ni Rebekka, pinatawag ni Isaak si Jakob. Kinablaāwan naw pōtot naw, as nakabilin na sya a kāna, “Barok, mangabahay kaba siras mababakes saya do dya Kanaan ah. 2Mangay ka na do Mesopotamya do pamilya ni Betoel a āmang ni ānang mo, kan mangabahay ka so asa dyirad mababakes saw a pōtot ni Laban a maraan mo a kakteh ni ānang mo. 3Bindisyonan pakono imo no Dyos a Manakabalin do Tābo, as torohan na pakono imo so āro a pōtot, kan pārohen na sanchiw kapotōtan mo tan payparinen naymo a āmang no āro a nasnasyon. 4Bindisyonan pakono no Dyos imo kan siraw kapotōtan mo so bindisyonaw ni simna āpong mos Abraham. Tan komwan, madyira monchiw tanaya a gan-ganaet ka pas changori a iyaw intorohaw no Dyos di āpong mo.” 5Katayoka na naychirin, tinoboy ni Isaak si Jakob do Mesopotamya a yanan ni Laban a pōtot ni Betoel no Arameo a tawo. As si Laban, ki kakteh na pa ni Rebekka a ānang da Esaw kan Jakob.

6Sinpangan na, natonngan ni Esaw a binindisyonan ni āmang na si Jakob, as nakatoboy na sya a mangay do Mesopotamya a mangabahay daw. Napatakan na pa a do nakabindisyon naw sya, ki inbilin na a dya mangabahay siras mababakes saya Kananeo. 7Natonngan pa ni Esaw a tongpalen ni Jakob no inbaheyaw ni āmang kan ānang da, ta nangay dana do Mesopotamya. 8As dawa, naawātan na a chakey aban āmang na siraw mababakes saya a Kananeo. 9Do dāwri, nangay si Esaw do yananaw no maraan naw a si Ismael a pōtot ni simna Abraham. Aran myan danaw dadwa baket ni Esaw, ki alit na pa kinabahay na si Mahalat a pōtot ni Ismael, as kan ādi ni Nebayot.*

10Do nakakarwaw ni Jakob do yanan da a Beerseba, ki kominwan do Haran. 11Nakaysan do asa yanan, ta nahpan dana. Ki do nakapaypoktad naw, nanghap so asa bato a nayponganan na, as nakapakaycheh na. 12Sinpangan na, tinayēnep na a nakaboya so asa ayran a yapo do tana a nakarapit do hanyit. Myan saw anghil no Dyos a nāw da maytotopdis a komayat kan gomchin do dawri a ayran, 13kan naboya na si ĀPO a maytēnek do anmwaw no ayran.† Binata dya ni ĀPO a kāna, “Yaken si ĀPO a Dyos a dinaydāyaw ni Abraham a simna āpong mo, kan Dyos a daydayāwen ni Isaak a āmang mo. Nyaya tana a pakaychehan mo sichangori, ki itoroh konchi dyimo kan kapotōtan mo. 14Akma sanchiw kāro no ahbek, kāro no kapotōtan mo. Maychawpit sanchi do tanaya do lāod, dāya, ammyānan, kan abagātan, as kan maynamot dyimo kan kapotōtan mo saw, mabindisyonan sanchiw tabo tawotawo do tanaya. 15Nāw ko na machirayay dyimo, kan aywanan koymo do tabo a ngayan mo, as kan paybidyen konchimo do dya a tana. On, polos a dyi koymo a karwan a mandanchan matongpal ko iyaw kari kwaya dyimo.”

16Katayoka na, nayokay si Jakob, kan binata na do aktokto na, “Ay samna! Myan paya dya si ĀPO, ki chinapatak kwabaya.” 17Namo si Jakob, as binata na a kāna, “Ay ānyan! Makamwamomo sawen nyaya yanan! Nya danaw bahayaw ni ĀPO, kan ayaman a mangay do hanyit.”

18Do kamabekasanaw, minhep a naybangon si Jakob. Inhap naw batwaw a nayponganan na, as pinaytēnek na a pakanaknakman na so naparinaw dya. Somarono, pinadwan na so lana no olibo hapotaw no batwaw.‡ 19Pinangaranan na so Betel§ nawri a tana. Ki Los, ngaran na do kachwaw. 20Sinpangan na, nagsapata si Jakob a kāna, “An myan ka dyaken mo Āpo Dyos, as aywanan mo yaken do kapagbyahi kwaya, kan torohan mo yaken so kanen kan laylay ko, 21as an paybidyen mo yaken a sisasalon-at do bahay ni āmang ko, ayket, imo danaw ĀPO a Dyos ko. 22Iyaw nya bato a pinatnek ko a pakanaknakman, iyanchiw nya logar mayparin a pagdaydayāwan dyimo, kan itoroh konchiw apagkapollo no tabo myan dyaken.”