1Do nakapaypahabas dana no chimpo, myan dadwa dyirad opisyalis saw no āryaw do Egipto a nakagatos. Iyaw asa, ki katatalkanaw a manorotoroh so palek do āryaw, as kan iyaw asaw, ki iyaw katatalkanaw a mamariparin so tināpay a para do āryaw do Egipto. 2Taywara a nakasoli si Paraon dyirad dadwa saya opisyal na. 3Dawa, inpopok na sa do bahayaw no kapitanaw no gwardya, do bahodanaw a nakabahodan ni Jose. 4Si Jose iyaw kinedngan no kapitanaw a magsīrbi dyira, as nahay sa do bahodan.

5Do asa kahep do irahemaw no bahodan, naytayēnep saw dadwaw, iyaw katatalkanaw a manorotoroh so palek do āryaw kan iyaw katatalkanaw a mamariparin so tināpay no āryaw do Egipto. Maytarek tayēnep da, kan maytarek paw chakey da batahen. 6Do kamabekasanaw, do kangayaw ni Jose a magsīrbi dyira, naboya na a mariribokan sa. 7Dawa, inyahes na dyirad dadwa saw a kapayngay na a nabahod do bahayaw no āmo na a kāna, “Inyom sīt, āngo ta akmay maliday kamo sicharaw?”

8Ki binata da a kon da, “On, ata, kahep, naytayēnep kamyaw a dadwa, ki abaya dyaw makaibahey so chakey na batahen no nya saya tayēnep namen.”

Ki tominbay si Jose a kāna, “Si Āpo Dyos, ki iyaw moyboh a manoroh so sīrib no tawo, tan maibahey naw chakey a batahen no asa tayēnep. Ibahey nyo pa dyaken an āngo tayēnep nyo saw.”

9Dawa, inbahey no katatalkanaw a manorotoroh so palek do āryaw iyaw tayēnep naw di Jose. Binata na di Jose a kāna, “Do kapaytayēnep kwaw, nakaboya kwaw so asa katngeh a ōbas do salapen kwaw. 10Myan tatdwa yangaw na. Do kapaybohong na paw, ki nagbōsel kan nay-asi so āro, as kan naynoy sa tabo asyaw no ōbas. 11Inigpet kwaw do dāwri iyaw bāswaw ni Paraon. Do dāwri, namoyis ako, as nakapis ko sya pinatola do bāswaw, as nakaitoroh ko sya di Paraon.”

12Binata ni Jose a kāna, “Nyaw no chakey a batahen no tayēnep mwaya: Tatdwa karaw chakey na batahen no tatdwaya a yangaw. 13Tatdo a karaw a yapo sichangori, pakakarohen nanchimo ni Paraon, as pabidyen naymo do sīgodaw a toray mo. Imonchiw manoroh so bāso na a akmas pariparinen mwaw do kachwaw. 14Ki chāsi mo yaken, ta naknakmen monchi yaken anchan mirwa a maganay kayayan mo. Isarīta mo pakononchi yaken di Paraon, as kan sidongan mo yaken a mohtot do dyaya bahodan. 15Ta no kaoyodan na, ki intālaw da yaken do tana dan Hebreo a tawo. As aran do kayan kwaya dya do tanaya a Egipto, ki aba polos naygatosan ko a nakayapwan nakabahodan ko.”

16Do kadngeyaw sya no katatalkanaw a mamariparin so tināpay no āryaw a maganay chakey a batahen no tayēnepaw no rārayay naw, binata na di Jose a kāna, “Aran yaken, ki aryaw tayēnep ko. Tinayēnep kwaw a maysoson ako so tatdwa bakag a napno so tināpay. 17Iyaw mamanyitwaw a bakag do oho ko, ki myan daw tabo a kīta no tināpay a para di Paraon, ki kanenaw no manomanok.”

18Binata ni Jose a kāna, “Mas nyaw chakey na batahen no tayēnep mwaya: Tatdwa karaw chakey na batahen no tatdwaya bakag. 19Tatdwa karaw yapo sichangori, pahtoten nanchimo ni Paraon, as kaipapotoh na dyimo. Ipalōdyit* nanchimo do kayo, as kanen anchi no manomanok iyaw asi no inawan mo.”

20Iyaw chatatdo naw a araw a nawriw kompli ni Paraon, ki namarin so pasken a para dyirad tabo a opisyalis na. Inpapahtot na saw dadwaw a opisyal† a nabahod a iyaw katatalkanaw a manorotoroh dya so palek kan iyaw katatalkanaw a mamariparin so tināpay, as nakapaiyangay na sira do yanan daw no kapayngay daw a opisyalis. 21Sinpangan na, pinabidi naw katatalkanaw a manorotoroh so palek do sīgodaw a tarabāko na a kapanorotoroh so palek do Paraonaw. 22Ki inpalōdyit naw katatalkanaw a mamariparin so tināpay a akmas inbaheyaw ni Jose dyira. 23Ki aran komwan naparin a akmas binataw ni Jose, ki alit na nawayakan no katatalkanaw a manorotoroh so palek si Jose. Nanakem na paba.