1Do nakadāmag ni Jabin a āri no Hasor* maynamot do nakapagballīgi no Israel, inpaw-it naw minsāhi naw di Jobab a āri no Madon, siraw ar-āri no Simron kan Aksap. 2Inpaw-itan na pa sa siraw ar-āri saw do katokotokonan saw do ammyānan, do Araba a abagatānen no Kinneret,† do paytoytokonan saw do lāod, kan do Napot-dor‡ a myan do lāod. 3Inpaw-it na paw minsāhi naw dyirad Kananeo do maybīt no Oksong Jordan, dyirad Amoreo, Heteo, Pereseo, Jeboseo do katokotokonan, kan dyirad Hibeo a omyan do tokaran no Tokon a Hermon do tana a Mispa. 4Nangay sa kontodo tabo bōyot da, as nayparin sa a reprep a bōyot a akmaw anay do aptan. As myan pa dyiraw āro a kabalyo kan logan a pachigobat a goyoden no kabalyo. 5Siraw nya saya ar-āri, ki nayrarapa sa kan bōyot da saw. Pinatnek daw kampo da do yanan ranomaw do Merom§ tan gobaten daw Israel.

6Nachisisirin si ĀPO di Joswe a kāna, “Mamo kaba a maynamot dyira. Do nyaya ōras an delak, iparawat ko sanchi dyinyo a Israel tan dimanen nyo sa tabo. Ki pidayan nyo saw kabkabalyo kan sosohan nyo logan da saw.” 7Dawa, si Joswe kan tabo bōyot na saw, ki kinelsat da sa a rinaot do yanan ranomaw do Merom. 8Do dāwri, inparawat ni ĀPO siraw kabōsor daw dyirad Israelita saw. Rinaot dan Israelita kan linakatan daw kabōsor da saw a pinateng a manda do Magdindināmag a Sidon kan do Misrepot-maim.* As siraw kadwanaw, linakatan dan Israelita saw a manda do dāya do Payahosongan Mispa. Nāw da sa ginobat a manda do nakadiman da tabo no kabōsor da saw. 9Pinarin ni Joswe dyira akmas inmandaraw ni ĀPO. Inpapiday na saw kabalyo da, kan inpasosoh na saw logan daw.

10Do nakatayoka no nya, naybidi si Joswe kan bōyot na saw, as sinākop daw Hasor kan diniman daw āri na. (Hasor do dāwri a chimpo, ki kabibilēgan dyirad dya saya pagāryan.) 11Diniman da paw tābo tawotawo. Abaw aran asa a natokos a nabyay. As iyaw idi, ki sinosohan da.

12Sinākop ni Joswe tabo nya saya idiidi kan tiniliw na saw ar-āri da. As inpadiman na tabo tawotawo a akmas inbilinaw ni Moyses a pachirawatan ni ĀPO. 13Ki sinosohan daba no Israelita saw idiidi saw a napatnek do hapot no napōnan a narārayaw a idi, malaksid do Hasor a iya lang inpasosoh ni Joswe. 14Sinamsam no tawotawo no Israel tabo mababalor saw kan siraw animal saw a yapo do idiidi a para dyira. As siraw tawotawowaw, ki diniman da sa no Israelita. Abaw aran asa a natokos a nabyay. 15Akmas inbilinaw ni ĀPO di Moyses a pachirawatan na, komwan inbilin ni Moyses di Joswe. As si Joswe, tinongpal na tabo inbilinaw ni ĀPO di Moyses.

16Sinākop da Joswe iyaw intīrwaw a tana do ammyānan kan do abagātan a siraw katokotokonan kan paytoytokonan saw do lāod. Nairāman paw tabo Negeb, tabo tana no Gosen, kan do Araba. 17-18Iyaw sinākop da a tana, ki yapo pa do Tokon a Halak do abagātan a masngen do Seir† a manda do Baal-gad a myan do ammyānan do Payahosongan Lebanon do tokaran no Tokon a Hermon. Nahay a nachigobat sa Joswe dyirad ar-āri no nya saya tanatana, ki tiniliw da sa tabo kan inpadiman da sa. 19Iya lang idi a nachikapya dyirad Israelita, ki Gibeon a niyanan dan kadwan saw a Hibeo. Sira tabo kadwan saw a idiidi, ki nasākop sa do gobat. 20Ta si ĀPO mismo, pinatwa naw pōso da a gobaten daw Israel tan komplito a rārayawen na sa tan dimanen na sa a abos kāsi. Nyaw inbilin ni ĀPO di Moyses.

21Do dāwri a chimpo, diniman da Joswe siraw tawotawo a siganti a mayngaran so Ānakim a minyan do katokotokonan a mamangket do Jordan a yapo do Hebron, Debir, Anab, as kan do tabo katokotokonan no Joda kan Israel. On, komplito a inabo sa ni Joswe kan idiidi da saw. 22Do dāwri, arabaw Ānakim a natokos do tana Israel, ki myan saw papere a natokos do Gasa, Gat, kan Asdod.

23Dawa, sinākop da Joswe iyaw intīro a tana a akmas inbilinaw ni ĀPO di Moyses. As intoroh na dyirad Israelita saw pinakabinglay da a tana sigon do kāda trībo.

Do dāwri, nayhat tawotawo a maggogobat.