1Sinpangan na, pinaychichipeh ni Joswe siraw trībo no Ruben, Gad, kan Mamandāya a Manasses. 2Binata na dyira a kāna, “Pinarin nyo tabo inbilin dyinyo ni Moyses a pachirawatan ni ĀPO, kan tinongpal nyo tabo bilin ko dyinyo. 3Homnabas danaw āro a tawen a mandas changori,* ninonolay nyo aba polos kapayngay nyo a Israelita, basbāli a annadan nyo a tongpalen bilbilin ni ĀPO a Dyos nyo. 4Changori, naitoroh narana ni ĀPO a Dyos nyo talna dyirad kapayngay nyo saw a Israelita a akmas inkari na. Dawa, somabat kamo na do pinakabinglay nyowaw a tana do dayāen Oksong Jordan a iyaw intorohaw dyinyo ni Moyses a pachirawatan ni ĀPO. 5Ki siaannad kamo a mangtongpal so bilinaw kan lintegaw a inbilin dyinyo ni Moyses a pachirawatan ni ĀPO a chadaw nyo si ĀPO a Dyos nyo, as parinen nyo tabo innanawo na dyinyo, as kan tongpalen nyo bilbilin naw. Nāw kamo a mapagtalkan dya, kan magsīrbi dya do tābo pōso nyo kan do tābo katawo nyo.” 6Do dāwri, binindisyonan sa ni Joswe, kan pinayam na sa, as kan somnabat dana sa.

7Intoroh ni Moyses dyirad Mamandāya a Manasses iyaw tana no Basan do dayāen no Oksong Jordan, as dyirad Mamanlāod a Manasses† kan siraw kadwan a trībo, intoroh ni Joswe iyaw tana do laōden no Oksong Jordan. Do kapaybidi daranaw no Mamandāya a trībo, binindisyonan sa ni Joswe. 8Binata na dyira a kāna, “Somabat kamo kan isabat nyo āro a kinabakang nyo a siraw āro a animal, pirak, balitok, bronsi, pasek, kan āro a ayowayob. Binglayen nyo dyirad kaliposan nyo nya sa sinamsam nyo yapo dyirad kabōsor nyo.”

9Dawa, kinarwan dan trībo no Ruben, Gad, kan Mamandāya a Manasses siraw kadwan a Israelita do Silo do tana a Kanaan. Somnabat sa do Gilead a tana da a sinākop da sigon do inpaibilin ni ĀPO di Moyses.

10Do nakapakarapit daw no trībo no Ruben, Gad, kan no Mamandāya a Manasses do Gelilot do tana no Kanaan do laōden no Oksong Jordan, pinatnek daw rakkoh a altar do masngenaw do oksong. 11Ki nadāmag da no Israelitaw‡ a pinatnek dan trībo no Ruben, Gad, kan Mamandāya a Manasses iyaw altaraw do Gelilot do payis no tana a Kanaan a masngen do Oksong Jordan do mangket do tana a dyira no Israelita. 12Do dāwri, naychichipeh sa tabo Israelitaw a mamangket do lāod do Silo, kan nagsagāna sa a machigobat dyirad mamandāya saw a trībo.

13Sinpangan na, tinoboy dan Israelitaw si Pinehas a pōtot ni Eleasar a iyaw pādi a mangay do Gilead dyirad tawotawo no trībo no Ruben, Gad, kan Mamandāya a Manasses. 14Nachangay dyaw asaw a poho a pangpangōlo. Kāda asa dyira, ki pinakainawan no asa dyirad mamanlāodaw a trībo, kan pangōlo da no pamilya dyirad partīdos no Israel. 15Nakarapit sa do trībo no Ruben, Gad, kan no Mamandāya a Manasses do tana a Gilead, as binata da a kon da, 16“Nyaw inbahey dan tabo saw a nachichipeh a tawotawo ni ĀPO a kon da, ‘Āngo ta aryan nyo kapagtalek nyo do Dyos no Israel? Samna, āngo ta tomnadyichokod kamo di ĀPO sichangori do nakapamatnek nyo so bōkod nyo a altar do nakapagsōkir nyo dya? 17Manawob abawriw gatos ta do Peor? Aysa! Mandas changori, ari ta pad madalos do dāwri a gatos a aran dinōsa ni ĀPO tabo tawotawo na do ganyit?§ 18As changori, tomadyichokod kamo nawri di ĀPO? An magsōkir kamo di ĀPO sichangori, isoli naw tabo tawotawo no Israel an delak. 19Ki an dya maikariw pinakabinglay nyowaya a tana a pagdāyawan di ĀPO, mamtang kamo do tana ni ĀPO a yanan tabirnakolo na. Machirapa kamo dyamen. Basta dyi kamo a magsōkir di ĀPO mana dyamen* do kapatnek nyo so bōkod nyo a altar a machitarek do altaraw ni ĀPO a Dyos ta. 20Do nakarārayawaw ni Akan a pōtot ni Sera so kapagtalek maynamot do warawara saw a maikeddeng a marārayaw, nangay abawriw kasoli no Dyos do tabo tawotawo no Israel? Si Akan aba lang nadiman a maynamot do gatos na.’ ”†

21Do dāwri, inatbay dan trībo no Ruben, Gad, kan Mamandāya a Manasses saw no pangpangōlo daw no partīdos no Israel a kon da, 22“Iyaw Mabīlegaw, iyaw Dyos! Iya, si ĀPO! On, iyaw Mabīlegaw, iyaw Dyos! Iya, si ĀPO! Chapatak na an āngo ta pinarin namen nyaya, kan chakey namen a mapatakan nyo pa! An nagsōkir kami mana inaryan kapagtalek namen di ĀPO, palobōsan nyo paba yamen a mabyay! 23An napatnek kami so bōkod namen a altar tan tomadyichokod kami di ĀPO, mana tan pangidātonan so masosohan, so irek, mana so pachikapya, si ĀPO pakono mamahes dyamen ah!

24“Aysa! Taywaran pinarin namen nyaya? On, ta chamo namen a āngwan do masakbayan batahen danchin kapotōtan nyo a ‘Āngo bibyang nyo di ĀPO a Dyos no Israel? 25Pinarin ni ĀPO Oksong Jordan a nagbabaetan ta, inyo a trībo no Ruben kan Gad. Abaw binglay nyo di ĀPO,’ kon danchi.

26“Dawa, pinatnek namen altaraw. Ki pangidatōnan namen aba so masosohan mana kadwan a dāton. 27Basbāli a pinarin namen a pangipaneknek dyaten kan dyirad kapotōtan ta sanchi a oyod a magdāyaw kami di ĀPO do salapen masantawan a tabirnakolo na so dāton namen a masosohan, irek, kan pachikapya. Tan komwan, maparin dabanchi no kapotōtan nyo a ibahey do masakbayan a, ‘Abaw binglay no kapotōtan nyo di ĀPO.’ 28As no kapangtokto namen, ki an ibahey danchiw komwan dyamen mana dyirad kapotōtan namen, atbayen namen a, ‘Chiban nyo pa do sinan altar ni ĀPO a pinatnek dan kapoonan namen. Ki pangidātonan aba so masosohan kan kadwan a dāton, an dya pangipaneknek dyaten.’ 29Taywaran magsōkir kami di ĀPO mana tomadyichokod kami dya sichangori do nakapatnek namen so altar a pangidātonan so masosohan, irek, mana kadwan a dāton? On, abaw matarek a altar an dya iyaw altaraw ni ĀPO a Dyos ta a maytēnek do salapen no tabirnakolo na.”

30Do nakadngey ni Pinehas a pādi kan siraw asa pohwaw a pangpangōlo dan tawotawo a nachangay dya a siraw pangōlo saw no partīdos dan Israelita do lāod so inbahey daw no trībo no Ruben, Gad, kan Mamandāya a Manasses, napnek sa. 31Binata dyira ni Pinehas a potōt ni Eleasar a pādi a kāna, “Sichangori, chapatak namen a myan si ĀPO dyamen, ta inaryan nyo abaw kapagtalek nyo di ĀPO. Changori, insalākan nyo tawotawo no Israel do kapangdōsa ni ĀPO.”

32Katayoka no nya, naybidi sa Pinehas a pōtot ni Eleasar a iyaw pādi kan siraw pangpangōlwaw, as kinarwan darana saw trībo no Ruben kan Gad do tana a Gilead. Somnabat sa do tana a Kanaan, kan inpadāmag da dyirad Israelita. 33Napnek saw Israelitaw kan dinaydāyaw daw Dyos. Naychiychirin sa paba a maynamot do kapachigobat da dyira a mangrārayaw so tanaw a pagyanan dan trībo no Ruben kan Gad.

34Pinangaranan dan tawotawo no trībo no Ruben kan Gad so “Pangpaneknek” nya altar. Ta no binata da a kon da, “Nyaw mangipaneknek dyaten a tabo a si ĀPO, ki Dyos.”